Basqarýshy partııa kadrlyq rezerv jasaqtamaq

"Nur Otan» partııasy kadrlyq rezer­vin qalyptastyrý jumysyn bastaıdy. Bul – saılanbaly jáne partııalyq laýa­zym­darǵa joǵary kásibı kadrlardy usynýdyń júıeli resimi. Kadrlyq rezerv tájirıbeli áriptes­terimizden, bastaýysh partııa uıym­darynyń músheleri men belsendi jastardan, sondaı-aq, partııa jaqtastary qatarynan jasaqtalady". "Nur Otan" partııasynyń hatshysy Natalıa Godýnova osylaı dep málimdedi. Ol maqsatty topty, partııalyq kadrlardy orta­lyq jáne jergilikti memlekettik organdarǵa usyný úshin rezervti qalyptastyrý kezeń­deri men merzimderin keńinen túsindirdi. «Partııalyq kadrlyq rezerv týraly» erejege sáıkes, partııa múshesi emes, biraq ony belsendi qoldaýshylardy da rezervke irikteý múmkindigi qaras­ty­rylyp otyr, músheligi joq partııa jaq­tas­tary kadrlyq rezervtegi sany rezervısterdiń jalpy sanynyń 10 paıy­zynan aspaýy tıis. «Nur Otan» partııasynyń kadrlyq rezervi eki deńgeıde – respýblıkalyq jáne aımaqtyq deńgeılerde bekitiledi. – Qazirgi ýaqytta aımaqtyq rezerv qalyp­tas­tyrylýda. Oǵan máslıhat depýtat­ty­ǵyna, aımaqtyq saıası keńester, partııa­lyq baqylaý komıssııalary (PBK), Sybaı­las jemqorlyqqa qarsy is-qımyl jónin­degi qoǵamdyq keńester (SJQIQK) jáne par­tııanyń basqa da organdarynyń músheligine kandıdattar irikteledi, – dedi ol. Onyń aıtýynsha, úmitkerler kelesi kvota boıynsha irikteledi: ár aýdannan – 10, qaladan – 12, oblys ortalyǵynan 25 kandıdattan. Sonymen qatar, N. Godýnova partııanyń aımaqtyq kadrlyq rezervine jalpy respýb­lıka boıynsha shamamen 3 myń adam enetinin jetkizdi. – Respýblıkalyq rezervtiń negizi – aımaq­tyq rezervıster (ár aımaqtan úsh adam­nan artyq emes). Respýblıkalyq rezerv 2017 jyldyń sońynda qalyptastyrylatyn bolady. Aımaqtyq partııalyq kadrlyq rezervke ený úshin  kandıdattar 3 satyly irikteý júıesinen ótýi qajet. Júıe konkýrs­tyq resimder men quzyretterin baǵalaýdan turady. Kandıdattardyń árqaısysy kásibı, partııalyq jáne jeke sıpattary boıynsha keshendi tekserýden ótedi. Mysaly, partııa músheligi boıynsha ótili, jumys ótili, bilimi, partııalyq qyz­met­tegi sińirgen eńbegi boıynsha talap­tar bar. Atalǵan talaptar rezervtiń ár deń­geıi saıyn arta túsedi, – dedi partııa hatshysy. Úmitkerlerdiń qylmys­tyq jáne ákimshilik jaýapkershilikke tar­tyl­maýy, sybaılas jemqorlyqqa jaǵdaı jasaı­tyn teris qylyqtarynyń, alynyp tas­tal­maǵan partııalyq jazalarynyń bol­maýy jónindegi talaptar ár deńgeı úshin mindetti bolyp tabylatynyna da nazar aýdardy. Buǵan qosa, ol partııalyq kadrlyq rezervti qalyptastyrý úsh aı boıy kezeń-kezeńmen ótetinin málim etti. Partııa hatshysynyń sózine qaraǵanda, rezervke alynǵandardy bekitkennen keıin partııalyq kadrlyq rezervti damytý jumy­sy júrgiziletin bolady. Naqtylaı aıt­qan­da, olardyń naqty is-áreketteriniń jos­par­lary ázirlenip, bekitý jáne júzege asyrý sharalary iske asyrylady. Odan ári N.Godýnova úmitkerdiń rezervte bolý merzimi 5 jyldy quraıtynyn aıta kelip, partııanyń Ortalyq apparatynda jáne aımaqtyq, aýmaqtyq fılıaldarynyń apparattarynda (basshylyqtan basqa) bos laýazymdyq oryndarǵa baıqaý negizinde qabyldaý júzege asyrylatynyn jetkizdi. Joldybaı BAZAR, «Egemen Qazaqstan»