Astananyń Máskeýdegi mádenıet kúnderi

Reseıdiń iri kórme alańy – Halyq sharýashylyǵy jetistikteri kórmesinde qazaqtyń etnoaýyly ashyldy. Qazaq mádenıeti men salt-dástúrleriniń ekspozısııasy Astananyń Máskeýdegi mádenıet kúnderi aıasynda ótkizilip, bul halyqaralyq mádenı shara Qazaqstan Táýelsizdiginiń 25 jyldyǵyna arnaldy. Kúnderdiń ashylý saltanaty Astana qalasynyń ákimi Áset Isekeshevtiń jáne Máskeý qala­sy úkimetiniń mınıstri Sergeı Cherıomınniń qatysýymen ótti. – Mádenıet kúnderine úlken jaýapkershilikpen daıyndaldyq. Munda 400-den astam adam keldi, sonyń ishinde ártister, bı ansam­blderi, sýretshiler, búrkit baptaý­shy qusbegiler, sándik-qoldanbaly óner sheberleri bar. Bir sózben aıtqanda, Máskeý turǵyndary men qonaqtaryn Qazaqstan máde­nıetimen jan-jaqty tanystyrý úshin bar jaqsymyzdy ala keldik, – dedi Astana qalasy Mádenıet basqarmasynyń basshysy Bolat Majaǵulov. Kórme qonaqtaryna qolóner­shilerden bastap handarǵa deıin ejelgi kóshpelilerdiń turmysymen tanysýǵa múmkindik beretin ártúrli taqyryptarda bezendirilgen bir­neshe kıiz úı tigildi. Hannyń eń úl­ken jáne ádemi jasaqtalǵan úıi – «Aq Orda», munda qonaqtarǵa ulttyq taǵamdar usynylady. Al «Qolónershiler sheberhanasyn­da» qoldan kilem toqý ónerin ta­ma­shalaýǵa bolady. «Ańshynyń úıinde» qazirgi qazaqtardyń arǵy atalary ań aýlaý úshin paıdalanǵan kerek-jaraqtar kópshilik nazaryna usynylsa, «Sheberlerdiń kıiz úıine» kelýshiler saz balshyq pen asyl metaldardan buıymdar jasaý joldaryn kórip, ony estelikke satyp ala alady. Kıiz úılerdiń biri keler jyly Qazaqstanda ótetin EKSPO-2017 halyqaralyq mamandandyrylǵan kórmesine arnalǵan. – Astana ónerpazdarynyń Más­keýde qoıǵan konsertteri uzaq ýa­qytqa deıin umytylmaıdy dep oı­laımyn. Osy sııaqty má­de­nı sharalar eki memlekettiń qa­­rym-qatynastaryn ári qaraı damytýǵa oń yqpal etetin bolady. Máskeýlikter de EKSPO-2017 – «Bo­lashaqtyń energııasy» kórme­sinde reseılik ekspozısııalar quramynda Astanada mádenıet kúnderin ótkizýdi josparlap otyr. Ol da osy Máskeýdegi shara sekildi esten ketpes jarqyn oqıǵalardyń biri bolady dep sanaımyn, – dedi Máskeý qalasy úkimetiniń mınıstri Sergeı Cherıomın. Aıta keteıik, Qazaqstan men Reseı arasyndaǵy tyǵyz ynty­maqtastyqqa qaramastan, Máskeýde Astana kúnderi tek 2002 jyly mamyr aıynda ǵana ótkizilgen. Al Reseı astanasy tól mádenıeti men ónerin Astanada eki ret – 2001 jáne 2008 jyldary tanystyrǵan. Máskeý tek Reseıdegi ǵana emes, sondaı-aq, álemdegi de iri tarıhı-mádenı ortalyq bolyp tabylady. Munda kóptegen ataqty sáýlet es­kert­­­kishteri ornalasqan, qalada 100-den astam teatr men 60 mýzeı bar. Sondyqtan mádenıet pen óner salasyndaǵy yntymaqtastyq Qazaqstan úshin asa mańyzdy. Mu­ny­men qosa, qazaqtyń baı mura­syn nasıhattaý sheteldik azamattardy halqymyzdyń tarıhymen jáne mádenıetimen tanystyrý úshin qajet. Máskeýdegi etnoaýylǵa kelýshiler naǵyz batyrlardy kórip, olardyń kúsh-qýatyna tánti boldy. – Men ulttyq kıim kıgen qazaq­tyń batyrlaryn kórip, tań qaldym. О́te ádemi. Qazaqtar sondaı suńǵaq boıly bolady dep oılamappyn. Eks­pozısııalardyń barlyǵy  – qus­tar da, kıiz úıler de – bári de qyzyq, birden Qazaqstanǵa baryp, kórgiń kelip ketedi, – deıdi etnoaýyl qonaqtarynyń biri Marına Gromova. Astananyń Máskeýdegi máde­nıet kúnderi aıasynda keshe keshke Úlken Kreml saraıynda Qazaqstan ónerpazdarynyń qatysýymen gala-konsert ótti. Sahnada Álibek Dinishev, Roza Rymbaeva, Maıra Muha­medqyzy men Súndet Baı­ǵojın án shyrqady. Sonymen qatar, konsertke estrada ánshileri men reseılik ártister qatysty. Sáýlebek BIRJAN