1993
*25 qazanda Qazaqstanǵa Iran Islam Respýblıkasynyń Prezıdenti Alı Akbar Hashemı-Rafsandjanı resmı saparmen keldi. Nursultan Nazarbaevtyń ótken jylǵy kúzde Iranǵa barǵan saparynan keıin ekijaqty baılanystar ózara tıimdi yntymaqtastyqtyń barǵan saıyn jańa salalaryn qamtı otyryp, qarqyndy damyp kele jatqandyǵy kezdesý barysynda atap ótildi. Bul jóninde «Egemen Qazaqstan» gazetiniń 26 qazan kúngi nómirinde «Iranmen ózara tıimdi yntymaqtastyq nyǵaıýda» atty maqala jarııalandy.
*3 qarashada Máskeýde ótken Reseı men Qazaqstan premer-mınıstrleriniń kezdesýinde elimizdiń som aımaǵynan shyǵatyndyǵy týraly sheshim habarlandy.
* 5 qarashada Qazaqstan Prezıdentiniń «Aqsha júıesin turaqtandyrý jónindegi shuǵyl sharalar týraly» Jarlyǵyna qol qoıyldy. Sondaı-aq bul kúni Prezıdent N.Á.Nazarbaev «Bolashaq» baǵdarlamasyn taǵaıyndady. Osy jyly «Bolashaq» baǵdarlamasy boıynsha shetelge jastardy oqytý bastaldy.
*12 qarashada Prezıdenttiń «Qazaqstan Respýblıkasynyń ulttyq valıýtasyn engizý týraly» Jarlyǵy shyqty. Osy kúni túnde Qazaqstan Respýblıkasy Joǵarǵy Keńesi men Mınıstrler Kabınetiniń «Qazaqstan Respýblıkasy Prezıdentiniń ulttyq valıýta – teńgeni engizý týraly sheshimi jóninde» qaýlysy qabyldandy.
* 13 qarashada Prezıdent N.Á.Nazarbaevtyń «Qazaqstan Respýblıkasynyń ulttyq valıýtasyn engizý týraly» Jarlyǵy men Elbasynyń Qazaqstan Respýblıkasynyń azamattaryna, barlyq halyqtaryna Úndeýi «Egemen Qazaqstan» gazetinde jarııalandy.
*15 qarashada Qazaqstan Respýblıkasynyń ulttyq valıýtasy – teńge engizildi. Osy kezge deıin jańa valıýtanyń banknottary men tıyndary respýblıkanyń barlyq oblystary men aýdandaryna tasyp jetkizilgen bolatyn.
*16 qarashada Prezıdent Nursultan Nazarbaev AQSh-tyń Qazaqstandaǵy elshisi Ýılıam Kortnıdi onyń ótinishi boıynsha qabyldady. Prezıdent Bıll Klıntonnyń Qazaqstan basshysyna jeke hatyn tapsyrǵan elshi AQSh Qazaqstannyń ulttyq valıýta engizý týraly sheshimin jaqtaıtynyn jáne halyqaralyq qarjy uıymdary tarapynan keń kólemde qoldaý uıymdastyrý jolymen elge qajetti kómek kórsetýge ázir ekendigi týraly habarlady.
* 19 qarashada elimizdiń valıýta bırjasynda AQSh dollaryna kezekti saýda ótti. Nátıjesinde 1 AQSh dollarynyń belgilengen baǵam deńgeıi 4 teńge 68 tıynǵa teń bolyp shyqty.
* 20 qarashada Nursultan Nazarbaevqa «Jyl adamy» qurmetti ataǵy berilgeni týraly habar «Egemen Qazaqstan» gazetinde jarııalandy. «Rýhanııat» halyqaralyq qaýymdastyǵy bul qurmetti ataqty Qazaqstan basshysyna TMD Ekonomıkalyq odaǵyn qurýǵa, memleketter arasyndaǵy qatynastardy turaqtandyrýǵa, beıbitshilik pen tatý kórshilikti jaqtaý isine qosqan zor úlesi úshin berdi.
* 25 qarashada «Tótenshe jaǵdaıdyń quqyqtyq rejımi týraly» Qazaqstan Respýblıkasynyń Zańy «Egemen Qazaqstan» gazetinde jarııalandy.
* 8 jeltoqsanda Prezıdent N.Á.Nazarbaev memlekettiń turaqty jumys isteıtin birden-bir zań shyǵarýshy jáne joǵary ókildi organ retindegi birinshi saılanatyn Qazaqstan Respýblıkasy Joǵarǵy Keńesi depýtattarynyń jáne Qazaqstan Respýblıkasynyń oblystyq, aýdandyq jáne qalalyq ókiletti organdary depýtattarynyń saılaýyn 1994 jylǵy 7 naýryzǵa taǵaıyndaý jóninde Zańǵa qol qoıdy.
* 9 jeltoqsanda «Qazaqstan Respýblıkasy halyq depýtattary jergilikti keńesteriniń ókilettigin merziminen buryn toqtatý týraly» Zańǵa Prezıdent qol qoıdy.
* 10 jeltoqsanda Joǵarǵy Keńes óz ókilettigin merziminen buryn toqtatý týraly sheshim qabyldady. Parlament tarady.
* 13 jeltoqsanda AQSh-tyń vıse-prezıdenti Albert Gor Qazaqstanǵa resmı saparmen keldi. Albert Gor Memleket basshysy Nursultan Nazarbaevqa muhıttyń arǵy jaǵyna resmı sapar jasaýǵa AQSh Prezıdentiniń shaqyrýyn tapsyra otyryp, Bıll Klıntonnyń Prezıdent Nursultan Nazarbaevpen múmkindiginshe jaqynyraq tanysqysy keletinin atap ótti.
* 16 jeltoqsanda Qazaqstan halqy Táýelsizdik kúnin keń kólemde atap ótti.
* 17 jeltoqsanda Muhtar Áýezov atyndaǵy Qazaq memlekettik akademııalyq drama teatrynda Qazaqtardyń dúnıejúzilik qaýymdastyǵynyń tusaýkeser saltanaty ótkizildi. Jınalǵandar aldynda Qazaqstan Prezıdenti, Qaýymdastyqtyń qurmetti Tóraǵasy Nursultan Nazarbaev sóz sóıledi.
* 22 jeltoqsanda Ekibastuz-2 GRES-iniń ekinshi energııa blogy iske qosyldy. Osyǵan oraı ótkizilgen mıtıngide Prezıdent Nursultan Nazarbaev búkil respýblıka úshin mańyzdy oqıǵamen energııa qurylysshylaryn, energııa montajshylaryn jáne paıdalanýshylardy quttyqtap, budan bylaı jeltoqsannyń 22-si Qazaqstan energetıkasynyń kásiptik merekesi bolatyndyǵyn málimdedi. Bul týraly «Egemen Qazaqstan» gazetiniń 24 jeltoqsandaǵy nómirinde «Ekibastuz qýaty – el qýaty» taqyrybymen maqala jaryq kórdi.
* 24 jeltoqsanda Ashǵabadta TMD elderi basshylarynyń kezekti kezdesýi ótti. Plenarlyq májilis 21 qujatqa qol qoıýmen aıaqtaldy.
* 27 jeltoqsanda aýyl turǵyndarynyń qajetin neǵurlym tolyq qanaǵattandyrý maqsatynda Prezıdent N.Á.Nazarbaev «Selolyq jerdiń taýar óndirýshileri men halqyna qyzmet kórsetýdi jaqsartý sharalary týraly» Jarlyqqa qol qoıdy. Qazaqstan Respýblıkasy Tutyný qoǵamdary odaǵynyń selo halqyna qyzmet kórsetýdi jaqsartý jáne kooperatıvtik uıymdar qyzmetiniń aıasyn keńeıtý jónindegi baǵdarlamasy maquldandy.
