Seltık Manchester Sıtıge 3 gol soqty. Bavarııa jeńildi. Chempıondar lıgasyna sholý (vıdeo)

Búgin Chempıondar lıgasy toptyq kezeńiniń ekinshi aınalymy máresine jetti. A tobyndaǵy aǵylshynnyń «Arsenaly» óz alańynda Shveısarııanyń «Bazel» komandasyn qabyldap, oıynnyń taǵdyryn birinshi taımda-aq sheship qoıdy. Alǵashqy 26 mınýttyń ishinde Teo Ýolkott dýbl jasap, sol nátıje matchtyń sońyna deıin saqtaldy. Osy toptaǵy ekinshi kezdesý Bolgarııanyń Razgrad qalasynda ótti. Onda jergilikti «Lýdogores» fransýzdardyń «PSJ» komandasyn qabyldap, 1:3 esebimen jeńildi. Matchtyń basynda esep ashqan bolgarlar bul basymdyqty taım sońyna deıin saqtap qala almady. Al ekinshi taımda «Lýdogores» qorǵaýshysy Kosmın Mosı esepti teńestiretin múmkindikti jiberip aldy. 11 metrlik aıyp dobyn oryndaǵan ol «PSJ» qaqpashysy Alfons Areoladan aılasyn asyra almady. B tobyndaǵy Italııanyń «Napolı» komandasy óz alańynda portýgalııalyq «Benfıkany» jeńdi. Birinshi taımda buryshtamadan berilgen dopty qaqpaǵa baspen dál baǵyttaǵan Marek Gamshık esep ashty. Al matchtyń ekinshi bóliginde alań ıeleri qarsylastar qaqpasyna nebári jeti mınýt ishinde qatarynan úsh gol soǵyp úlgerdi. Arkadıýsh Mılık penaltıdi sátti oryndasa, Drıs Mertens dýbl jasady. Oıyn sońyna qaraı «Benfıka» sapynan Gonsalý Gýedesh pen Edýardo Salvıo bir-bir goldan soǵyp, esep aıyrmasyn qysqartty. Túrkııanyń «Beshıktash» komandasy Kıevtiń «Dınamosyn» qabyldap, 1:1 esebimen teń oınady. «Beshıktashtyń» jartylaı qorǵaýshysy Rıkardý Kýarejma matchtyń 28-mınýtynda aıyp soqqysynan gol soqty. Al oıynnyń 65-mınýtynda «Dınamo» sapyndaǵy Vıktor Sygankov esepti teńestirdi. S tobynda nemistiń «Borýssııa Mıonhengladbah» komandasy óz alańynda Ispanııanyń «Barselonasyn» qabyldady. 34-mınýtta nemister jyldam shabýyl uıymdastyryp, Torgan Azar esep ashty. Al ekinshi taımda «Barselona» oıynshylary alań ıeleriniń óreskel qatelikterin tıimdi paıdalana bildi. Arda Týran esepti teńestirse, jeńisti goldy qorǵaýshy Herard Pıke soqty. О́z alańynda aǵylshynnyń «Manchester Sıtı» komandasyn qabyldaǵan Shotlandııanyń «Seltıgi» keremet oıyn órnegin kórsetip, jankúıerlerin qýanyshqa bóledi. Eki komanda da nátıjeli oıyn kórsetip, birinshi taımdy 2:2 esebimen aıaqtady. Oıyn bastala salymymen aǵylshyndar óreskel qatelikke boı aldyryp, Mýssa Dembele 3-mınýtta esep ashty. Kóp uzamaı «Manchester Sıtıdiń» jartylaı qorǵaýshysy Fernandıno esepti teńestirdi. Al oıynnyń 20-mınýtynda «Seltık» qaıtadan tizgindi óz qolyna aldy. Olarǵa Rahım Sterlıngtiń avtogoly kómektesti. Biraq, osydan 8 mınýttan keıin aǵylshyn shabýylshysy óz qateligin túzep, esepti qaıta teńestirdi. Ekinshi taımda Mýssa Dembele taǵy bir gol soǵyp dýbl jasady. Kezdesýde sońǵy goldy 55-mınýtta Nolıto soqty, sóıtip match 3:3 esebimen teń aıaqtaldy. D tobynda Madrıdtiń «Atletıkosy» Mıýnhenniń «Bavarııa» komandasyn qabyldady. Bul kezdesý chempıondar lıgasynyń ótken maýsymdaǵy jartylaı fınaldyq oıynyn eske túsirdi. Ol kezde ıspanııalyqtar eki match qorytyndysy boıynsha nemisterdi jarys jolynan shyǵaryp tastaǵan bolatyn. «Bavarııa» dopqa ıelik etýde basymdyq tanytqanymen, «Atletıko» qaqpaǵa kóbirek soqqy baǵyttaı bildi. Osylaısha, oıynnyń 35-mınýtynda Iаnnık Ferreıra-Karrasko týra soqqysymen esep ashty. Qalǵan ýaqytta «Atletıko» oıynshylary saýatty qorǵanyp, qarsylastaryna eshbir múmkindik bermedi. Tipti, 84-mınýtta olar esep aıyrmasyn kóbeıtýge múmkindik aldy. Alaıda, Antýan Grızmann penaltıden múlt ketti. Osy toptaǵy Reseıdiń «Rostovy» Gollandııanyń «PSV» komandasyn qabyldap, 2:2 esebimen teń tústi. Tórt goldyń barlyǵy birinshi taımda soǵyldy. «Rostov» sapynda Dmıtrıı Poloz dýbl jasasa, qarsylastar komandasynan Devı Propper men Lıýk de Iong gol soqty. Sonymen qatar, E, F, G, H toptarynda ótken ekinshi aınalym oıyndarynyń nátıjelerin nazarlaryńyzǵa usynamyz: «Monako» — «Baıer» — 1:1 (Glık, 90+4 — Chıcharıto, 74); SSKA — «Tottenhem» — 0:1 (Son, 71); «Borýssııa» (D) — «Real» (M) — 2:2 (Obameıang, 43, Shıýrrle, 87 – Ronaldý, 17, Varan, 68); «Sportıng» — «Legııa» — 2:0 (Rýıs, 28, Dost, 37); «Lester» – «Portý» — 1:0 (Slımanı, 25); «Kopengagen» — «Brıýgge» — 4:0 (Densvıl, 53 (ag), Dıleını, 64, Santander, 64, Iorgensen, 90+2); «Dınamo» (Zagreb) – «Iýventýs» — 0:4 (Pıanıch, 24, Igýaın, 31, Dıbala, 57, Semper, 85 (ag)); «Sevılıa» — «Lıon» — 1:0 (Ben Iedder, 53). Aıdar О́RISBAEV