Qazaqstanda balalar ınterneti paıda bolýy múmkin

  Jyl basynan beri Qazaqstanda 20 myńnan astam ártúrli taqyryptaǵy beıádep ınternet-materıaldar buǵattaldy. Bul derekti Aqparat jáne kommýnıkasııa mınıstrliginiń jaýapty hatshysy Janat Qojahmetov jarııa etti, dep habarlaıdy egemen.kz tilshisi. «16 jasqa tolmaǵan tulǵalardyń áleýmettik jelilerde tirkelýin shekteý» taqyrybynda ótken otyrysqa memlekettik organdar men memlekettik emes uıym ókilderi, qoǵam belsendileri qatysty. Janat Qojahmetov mınıstrliktiń memlekettik mekeme retinde ınternet pen áleýmettik jelilerdi muqııat baqylap otyratynyn, mazmuny bala psıhologııasyna zııan saıttarmen qatar, zııandy málimetterdiń de buǵattalatynyn aıtty. «Biz quzyrly organdarmen birlese otyryp paıdasynan zııany kóp saıttardyń jumysyn toqtatamyz. Odan bólek, jetkinshekter kóp qyzyǵatyn áleýmettik jelilerdiń ózin de qatań qadaǵalap, saraptap otyramyz. Bıyldyń ózinde 20 myńnan astam materıaldy buǵattadyq. Sebebi, olardyń basym bóligi balalardy óz-ózine qol jumsaýǵa ıtermeleıtin, teris aǵymdarǵa shaqyratyn, buzaqylyq áreketter arqyly qatigezdikke baýlıtyn jáne  pornografııalyq mazmundaǵy materıaldar», dedi ol. Jıynda balalardy ınternettiń qaýip-qaterinen qorǵaý úshin tehnıkalyq múmkindikter arqyly shekteý qoıý týraly da túrli usynystar aıtyldy. Solardyń biri – «balalar ınternetin» qosý múmkindigi. «Bálkim, baılanys operatorlarymen birlese otyryp jetkinshekterge arnalǵan «balalar ınterneti» qyzmetin iske qosý kerek shyǵar. Bul keıbir elderdiń tájirıbesinde bar nárse. Belgili bir deńgeıde  ınternettiń tarıfin engizip, ózgesine shekteý qoıylýy kerek. Onyń ereksheligi, balalarǵa arnalǵan ınternette zııandy kontentti buǵattaý mindetteletin bolady», dedi Qojahmetov. Nurlybek DOSYBAI, «Egemen Qazaqstan»