«Dıplommen aýylǵa» 46 myńnan astam maman tartyldy

«Dıplommen aýylǵa» jobasy iske qosylǵannan beri aýyldyq jerlerge jalpy somasy 9,3 mlrd teńge kóterme járdemaqy alǵan 46 631 maman tartylsa, onyń 19 263-ine turǵyn úı satyp alý úshin 43,6 mlrd teńge bıýdjettik nesıe berilgen. Bul týraly búgin Ortalyq kommýnıkasııalar qyzmetinde ótken baspasóz máslıhatynda Ulttyq ekonomıka mınıstrliginiń ekonomıkanyń ınfraqurylymdaryn damytý departamentiniń dırektory Ulan Jazylbek málimdedi. Departament dırektorynyń derekterine súıensek, aǵymdaǵy jyly joba sheńberinde respýblıka boıynsha 5 850 mamandy aýylǵa tartý úshin kóterme járdemaqy usynýǵa 2,1 mlrd teńge jáne 2 725 mamanǵa turǵyn úı satyp alý úshin 8,6 mlrd teńge bıýdjettik nesıe usyný qarastyrylǵan. 2017 jyly 3 232 mamanǵa turǵyn úı satyp alýǵa 11,0 mlrd teńge bólý josparlanǵan. Bul joba Memleket basshysynyń tapsyrmasymen 2009 jyly bastalǵan bolatyn. Ol jas mamandardy jumyspen qamtı otyryp, áleýmettik qoldaý sharalaryn kórsetýdi kózdeıdi. Mamandar atalǵan jobany iske asyrý búginde birqatar oń nátıjelerge qol jetkizýge múmkindik berip otyrǵanyn atap ótti. Ásirese ótken jyldarmen salystyrǵanda aýyldyq jerlerge kadrlar kelýiniń artqandyǵy baıqalýda. Jalpy «dıplommen aýylǵa» kelýshi mamandar sany ár salada ártúrli. Máselen, bilim berý salasyna – 33 400, densaýlyq saqtaýǵa – 9 813, mádenıetke – 1 289, sportqa – 616, áleýmettik qamsyzdandyrýǵa 403 jáne agroónerkásip keshenine 1 110 adam tartylǵan. Departament dırektory atap ótkendeı, jobanyń tıimdi sharttaryna qaramastan, ony júzege asyrý barysynda problemalyq máseleler de joq emes. Keıbir mamandardyń úsh jyldan kem emes ýaqyt jumys isteý mindettemesin oryndamaý jaǵdaılary kezdesedi. Bul rette maman ózine usynylǵan áleýmettik qoldaý sharalaryn tolyq kólemde qaıtarýǵa mindetti. Dınara BITIKOVA