Tyń serpilister kezeńi

Táýelsizdik ata-babalary­myz­dyń ǵasyrlar boıy ań­saǵan asqaq armany edi. Son­dyqtan da, Táýelsizdik – biz úshin kópten kútken eń qasterli mereke. Elimiz táýelsizdigin jarııalap, derbes memleket retinde álemge tanyldy. Elba­sy­myz aıtqandaı, «Qazaq­stan­nyń táýelsizdigi qazaq halqyna taǵdyrdyń tartqan syıy emes, óziniń ejelgi jerinde qıly kezeńdi bastan keshý arqyly qol jetkizgen óz memlekettiligin qurýǵa degen zańdy quqyǵy, bul daýsyz jáne saıası faktige eshkim kúmán keltirmeýi tıis». Birtutas azat el bolýdy ar­man­daǵan Alash azamattary osy jolda óz ómirlerin qıdy. Olar­dyń arman-tilegi sol kezderi jú­ze­ge aspaǵanymen, ulttyq sanany oıatýda úlken ról atqardy. Al jal­pysynda Qazaqstanǵa bul táýel­sizdik ońaı jolmen kelmegeni bárimizge belgili, tarıhqa kóz jú­girter bolsaq, qazaq halqy táýel­sizdik jolynda san qıly qıyn­shylyqtardy basynan ótkerdi. О́tken ǵasyrdyń basynda sany 1,5 mıllıondaı qandasta­ry­myz Qytaı, Mońǵolııa, Aýǵan­­stan, Túrkııa asty. Kóp­tegen ult zııalylary repres­sııaǵa ushyrady. Ata-baba armany búgingi kúni shyndyqqa aınaldy. Ańsaǵan Táýel­sizdigimizge qol jetkizdik. Alda sol Táýelsizdigimizdiń 20 jyldyǵyn toılaǵaly otyrmyz. Elimizdiń tuńǵysh Prezıdenti sol eli úshin jan aıamaǵan batyr ba­balarymyz bizge qaldyrǵan taý­sylmas dáýleti men sarqylmas mu­rasynyń jalǵastyrýshysy retinde qazaq halqynyń júreginde máńgi qalatyndyǵy aqıqat. Nur­sultan Nazarbaevtyń ótken 20 jyl ishinde Táýelsiz Qazaq elin óziniń júrgizip otyrǵan kóregen saıasatynyń arqasynda talaı belester men jetistikterge jetkizgeni tek qazaqstandyqtarǵa ǵana emes, búkil dúnıe júzine belgili. Búginde álem 130-dan astam etnos ókilderi turatyn Qazaq elin tatý­lyǵy men birligi aırandaı uıy­ǵan aldyńǵy qatarly el dep tanıdy. Sonymen qatar, osy jyldar ishinde elimizde qyrýar ister atqaryldy. Atap aıtsaq, memlekettik shekaramyz halyqaralyq sharttarǵa saı bekitildi. Memlekettik rámizderimiz, Ata Zańymyz qabyldanyp, ulttyq valıýtamyz aınalysqa engizildi, Saryarqa­nyń tósinde barsha eldi óziniń ásem kórkimen tańqaldyrǵan jańa Astanamyz boı kóterdi. Álem­dik qaýymdastyq aldynda Qazaqstan Respýblıkasy asqaq rýhty el ekenin moıyndattyq. El ekono­mı­kasy da jyldan-jylǵa ny­ǵaı­yp, mádenı, rýhanı damý deńgeıi jańa beleske kóterilýde. Sóıtip, ózine tán barlyq ınstıtýttary bar, álemdik qaýymdastyqtyń yq­paldy múshesi bolyp taby­latyn táýelsiz memleket qurdyq. El Prezıdentiniń jyl saı­ynǵy halyqqa Joldaýlary men Úkimettiń memlekettik baǵdar­lama­lary qarapaıym halyqtyń turmysyn jaqsartyp, táýelsiz­digimizdi nyǵaıtýǵa baǵyttalǵan. Elbasy óziniń sońǵy Joldaýynda ishki saıasat pen ulttyq qaýipsizdiktiń 2020 jylǵa deıingi negizgi maqsattary qoǵamda kelisim men turaqtylyqty saqtaý, el qaýipsizdigin nyǵaıtý ekenin atap ótti. Saıası júıeni jetildirýde quqyqtyq reformanyń mańyzdy ról atqaratynyn, quqyq qorǵaý júıesin reformalaý boıynsha quqyq qorǵaý organdary fýnk­sııalaryndaǵy oryn alǵan ja­ǵym­syz faktilerden, sondaı-aq quqyq qorǵaý júıesi qyzme­tin­degi móldirlik pen baqylaýdyń joqtyǵynan týyndaǵan problemalardan arylý qajettigin atap kórsetti. Elbasy Joldaýynda quqyq qor­ǵaý júıesin reformalaýdyń ba­ǵyttaryn kórsetip berdi, olar – quqyq qorǵaý júıesin ońtaı­lan­dyrý, árbir memlekettik or­gan­nyń naqty quzyretin belgileý, zańdardy izgilendire otyryp sapasyn arttyrý, quqyq qorǵaý júıesiniń qyzmetinde ishki ve­domstvolyq múddeden azamattar­dyń quqy men memlekettiń múd­desin joǵary qoıý, sondaı-aq parlamenttik jáne qoǵamdyq qatal baqylaýdy qamtamasyz etý, qu­qyq qorǵaý organynyń qyzme­tin­de eseptilik pen baǵalaý júıesin jetildirý. Barshamyzǵa belgili, «Qanat­ty barys» beınesi – el táýel­sizdiginiń jáne «Qazaqstan – 2030» Strategııalyq damý baǵ­dar­lamasynyń sımvoldarynyń biri. Biz ótken Barys jyly mártebesi bıik Eýropadaǵy qaýipsizdik jáne yntymaqtastyq uıymyna Azııa jáne TMD memleketteri, musyl­man elderi arasynan tuńǵysh ret tóraǵalyq ettik. Mundaı bıikke qazaq balasy buryn-sońdy esh­ýaqyt­ta qol jetkizgen emes. Mu­nyń Elbasymyz júrgizip otyr­ǵan kóregen saıasattyń nátıjesi ekeni taǵy aqıqat. Elimiz sońǵy jyldary tyń serpilis jasap, damýdyń jańa belesine kóterildi. Alaıda, bizdiń alar asýymyz, baǵyndyrar bıigimiz áli alda. Sondyqtan da keleshegi jarqyn, armany asqaq Qazaq eliniń budan ári de órkendep, damı berýi úshin aıanbaı óz úlesimizdi qosa bereıik. Erzat ÁLZAQOV, Parlament Májilisiniń depýtaty, «Nur Otan» HDP fraksııasynyń múshesi.