Alǵashqy qar jambyldyqtardy ájepteýir ábigerge saldy. Tótenshe jaǵdaı qyzmeti óńirde kún sýytyp, jańbyr jaýyp, sońy qarǵa ulasatynyn eskertken bolatyn. Biraq eki keshtiń ortasynda japalaqtap qar jaýyp, jer-dúnıeniń bárin áp-sátte bir qarystaı qar basyp qalady dep eshkim oılamaǵan edi.
Keshegi beısenbiniń keshinde appaq qar óndirip jaýyp tastady. Aýyl-aımaqty bylaı qoıǵanda kóshesinen kólik qurǵamaıtyn Taraz qalasynyń ózinde ary-beri qatynaý qıyn bop qaldy. Al, keshe tańerteń oblys ortalyǵynyń kósheleri adam tanymastaı bop ózgerdi. Kóshe boıynda uzynynan sulap jatqan tal-terek kóp. Erip jaýǵan qardy kótere almaı tamyrymen qoparylyp qulap jatqan aǵashtar, synyp túsken butaqtar trotýar túgili úlken kóshelerdiń ózin bógep, kólik qoǵalysyna qıyndyq týdyrýda. Jol boıy úzilip jatqan jeliler de kóp.
Taraz qalalyq ákimdigi baspasóz qyzmetiniń bizge bergen málimetine qaraǵanda osy alǵashqy qar jaýǵan túni oblys ortalyǵynda 3 myńnan asa tal qulapty. Qazir qulap jatqan tal terekterdi kesip, joldardy tazalaý úshin 35 «KamAZ», 9 júk salatyn kólik jáne ákimdiktiń bólimderinen 12 brıgada jumyldyrylyp, 300-den astam adam shuǵyl iske kiristi.
Budan bólek tótenshe jaǵdaı qyzmeti 4 brıgada, elektr júıeleri mekemesi árqaısysy 5 adamnan turatyn 20 brıgada shyǵardy. Elektr mamandary úsh kúnniń ishinde jaryq berý máselesin tolyq qalpyna keltiremiz dep otyr. Qar jaýǵan túni qalanyń kóp jerlerinde jaryq sónip qalǵan bolatyn. О́ıtkeni qulaǵan aǵashtar kóptegen elektr jelilerin úzip ketti. Qazir jaryq bar, degenmende keıbir kósheler áli de jaryqsyz qalýda.
Oblysta jylý 15-qazannan bastap berilýi tıis edi. Qazirdiń ózinde «Jambyl jylý», «Temirjol jylý» mekemeleri keıbir turǵyn úılerge jáne áleýmettik nysandarǵa jylý berip jatyr. Áıtse de Taraz qalasynyń negizgi kóshelerinde jylý qubyrlaryn jańalaý jumystary áli júrip jatqanyna qaraǵanda jylý berý máselesi birazǵa sozylatyn sııaqty.
Jalpy alǵanda qar jaýǵan túni tótenshe jaǵdaı qyzmetine «Jaryq joq», «Terek qulady» degen syńaıdaǵy 124 ótinish túsken. Sondaı-aq, tótenshe jaǵdaı qyzmet 7 kólikti aǵash basyp qalǵanyn aıtady. Zardap shekkender joq.
Búgin aýa-raıy jylynyp, qar kúrt eridi. Aýdan-aýyldarmen kólik qatynasy qalypty jaǵdaıǵa tústi.
Oralhan DÁÝIT,
Foto Aqádil Rysmahan
Jambyl oblysy.
