Qoshemet qushaǵynda

ákeli-balaly kompozıtorlar Aıtqalı jáne Arman Jaıymovtar Kongress-Holl saraıynda ótken Aıtqalı Jaıymov pen onyń uly Arman Jaıymnyń shyǵarmashylyq keshinde kórermenderdi daryndy óner ıeleriniń kúrdeli mýzykalyq týyndylary tánti etti. Konserttiń shymyldyǵy túrilgen kezde Qazaq halyq aspaptary orkestri­niń kórkemdik jetekshisi ári bas dırıjeri, Qazaqstan Respýblıkasynyń eńbek sińirgen qaı­ratkeri, professor Aıtqalı Jaıymov qazaqtyń qońyr domby­rasyn qolyna alyp, sahnaǵa shyq­ty. Ol óziniń el Táýelsizdigine arna­ǵan «Erkin el», «О́mir-ózen» jáne Dına Nurpeıisovaǵa arnaǵan «Kúı-Ana» kúılerin oryn­daǵan­da, kórer­men­der uzaq qol soǵyp, qoshemet bildirdi. Osy keshte elorda turǵyndary men qonaqtary klassıkalyq shyǵarma­lardy súısine tyńdady. Tereń sezimge boı­laıtyn, birneshe bólimnen turatyn shyǵarmalardy tyńdaǵan jurtshylyq has ónerdi joǵary baǵalap, shynaıy qurmet kórsetti. Aıtalyq, Ǵazıza Jubanova atyndaǵy memlekettik ishekti aspaptar kvarteti Arman Jaıymnyń kvartetke arnalǵan tórt bólimdi №1 konsertin oryndady. Sondaı-aq, kórermen nazaryna qos kompozıtor birlesip jazǵan «Beıbarys» operasynan úzindi usynyldy. Osy oraıda, Qazaqstannyń eńbek sińirgen qaıratkeri Azamat Jyltyrkózovtiń oryndaýyndaǵy Beıbarystyń arııasy sátti shyqty. Al Qazaqstannyń eńbek sińirgen qaıratkeri Bıbigúl Januzaq Aıdananyń arııasyn naqyshyna keltire shyrqady. Halyqaralyq konkýrstardyń laý­reaty Shahrızada Tynyshtyq «Tóle bı» kan­tatasynan «Qarlyǵashtyń ánin» oryn­dap berdi. Qobyzshy Botagóz Táshimova orkestrdiń súıemeldeýimen Arman Jaıymnyń qobyzǵa arnalǵan kon­sertin usyndy. Sonymen qatar, keı­bir shyǵarmalardy árlep, «Shalqyma» halyq bı ansambli de óner kórsetti. «Bul bizdiń el Táýelsizdiginiń 25 jyl­dyǵyna arnaǵan konsertimiz. Sondyqtan da «Shattyq Eli» dep ataldy. Konsertke kelip, Qazaq halyq aspaptary orkestrine jáne ózge de óner kórsetken azamattarǵa qoshemet bildirgen kórermenderge úlken rızashylyǵymyzdy bildiremiz», – dedi Aıtqalı Jaıymov. Konsert barysynda Astana qalasy ákimdiginiń memlekettik akademııalyq fılarmonııasynyń Qazaq halyq as­pap­tary orkestri qalyptasqan óner ujy­my ekenin aıqyn baıqatty. Nebir kúrdeli kúılerdi, basqa da mýzyka­lyq týyndylardy asqan sheberlikpen jetkize bildi. «Egemen-aqparat»