Kelisim tetigi bekidi

Abý-Dabıde Qazaqstannyń Birikken Arab Ámirlikterindegi Tótenshe jáne ókiletti elshisi Qaırat Lama Sháripti BAÁ Prezıdenti Ákimshiliginiń basshysy Mansur ben Zaıd ál Nahaıan qabyldady. Qos memleket arasyndaǵy saıası únqatysýlardyń zamanaýı deńgeıine joǵary baǵa bergen sheıh Mansur ben Zaıd ál Nahaıan Astana men Abý-Dabı Qazaqstan Táýelsizdik alǵan jyldardan beri negizi qalanǵan ekijaqty jáne ózara tıimdi yntymaqtastyq aıasyndaǵy jaqyn jáne ózara senimge qurylǵan qarym-qatynasty aldaǵy ýaqytta da jalǵastyra beretinin jetkizdi. Onyń aıtýynsha, osy merzim aralyǵyndaǵy yqpaldastyqtyń damýyna eki el lıderleri – Nursultan Nazar­baev pen Halıfa ben Zaıd ál Na­haıan ornatqan dostyq ráýishtegi áriptes­tik sep bolǵan. Kezdesý barysynda Qazaqstan men BAÁ arasyndaǵy yntymaqtastyqty túrli aspektiler boıynsha damytý tóńireginde pikir almasyldy. BAÁ Prezıdenti Ákim­shiliginiń basshysy Qazaqstannyń 2017 jyldyń 16-17 qańtar kúnderi Abý-Da­bıde «Bolashaqtyń energııasy» taqy­rybynda ótetin X Dúnıejúzilik mereı­toılyq sammıtke qatysýǵa nıet tany­typ otyrǵanyna rızashylyǵyn bildirdi. «Bul sammıtke Qazaqstannyń qaty­sýy EKSPO-2017 kórmesiniń taqy­ryp aıasyn halyqaralyq alańdarda nası­hat­taýǵa, sol arqyly óziniń ımıdjdik artyq­shylyqtaryn qamtamasyz etýine, son­daı-aq, Qazaqstannyń ınvestısııalyq tar­tym­dylyǵy deńgeıin joǵarylatýǵa sep bolady dep oılaımyn» – dedi sheıh Mansur óz sózinde. «Bolashaqtyń energııasy» Dúnıe­júzilik sammıti sheńberinde «Astana EKSPO-2017» UK» AQ pen «EXPO-2020 Dubai» bıýrosy yntymaqtastyq jónin­degi ke­lisimge qol qoıýdy kózdep otyr. Al Qaırat Lama Shárip Qazaqstan men Ámirlikter arasyndaǵy birlesken úki­­met­aralyq komıssııasynyń 6-shy ke­zek­t­i otyrysyn ótkizýdiń mańyzdy­lyǵy­na toqtaldy. Sondaı-aq, ol saý­da-eko­no­mı­ka­lyq yntymaqtastyq máseleleriniń, sony­men qatar, ınvestısııany ózara qor­ǵaý jáne yntalandyrý jónindegi úkimet­aralyq kelisimge qol qoıýdyń ózektiligin atap ótti. «Egemen-aqparat»