OPEK munaı óndirý kólemin qarashada qysqartady

Venesýelanyń Munaı mınıstri Eýlohıo del Pıno OPEK uıymynyń munaı óndirý kólemin azaıtý jónindegi kelisimi qarasha aıynda júzege asa bastaıtyndyǵyn jetkizdi, dep habarlaıdy Blýmberg agenttigi. Onyń sózinshe, OPEK uıymyna múshe emes Reseı, Oman sııaqty ózge de birqatar memleketter ózderiniń munaı óndirý kólemin azaıtýǵa kelisimderin beredi. Ol sondaı-aq munaı óndirýshi memleketterdiń jaqyn kúnderde taǵy da bir ret bas qosatynyn aıtty. «Biz bul máselede kelisimge kelýge umtylyp jatyrmyz. OPEK uıymyna múshe emes elder sany neǵurlym kóp bolǵan saıyn bul sharanyń jaǵdaıdy turaqtandyrýǵa degen yqpaly da zor bolady»,-dep keltiredi del Pınonyń sózin Blýmberg. OPEK Aljırde 28 qyrkúıek kúni ótken beıresmı kezdesýde munaı óndirý kólemin shektep, táýligine 32,5-33 mıllıon barrel ǵana óndirý jóninde kelisimdi talqyǵa saldy. Alaıda, ár memleket úshin naqty mejeni belgileý baǵytynda kelisim joq. Bul máselege qatysty sońǵy sheshim OPEK uıymynyń qarashanyń 30-y kúni Venada ótetin resmı kezdesýinde qabyldanýy kerek. Uıym naryqty turaqtandyrý jumystaryna ózge de munaı óndirýshi elder qosylady degen úmitte. Ol birinshi kezekte Reseıge qatysty. OPEK uıymynyń arnaıy komıteti Aljır kelisimin júzege asyrý aıasynda alǵash ret 28-29 qazan aralyǵynda Venada kezdesedi. RF Energetıka mınıstri Aleksandr Novaktyń aıtýynsha, Reseı onda OPEK uıymynyń tehnıkalyq kezdesýine jáne naryqty turaqtandyrý maqsatynda munaı óndirý kólemi boıynsha naqty sıfrlardy talqylaý usynylyp otyrǵan Venada, 29 qazan kúni ótetin kezdesýge qatysady. Novaktyń sózinshe, RF bul kezdesýge kóptegen elderge shaqyrtý jiberiletindigine, olardyń arasynda AQSh-ta bolatyndyǵynan úmitti.