Astanada Ońtústik Qazaqstannyń jármeńkesi ashyldy

Astanaǵa qara sýyq túsip, qar jaýyp ketse de, elorda turǵyndary ońtústiktiń qarbyz-qaýynyn jeýge múmkindik aldy. Qurt-irimshik, qymyz-shubat, baýyrsaq sııaqty ulttyq taǵamdar jáne bar. Búgin tańerteń «Han Shatyr» saýda oıyn-saýyq ortalyǵynyń aldynda Ońtústik Qazaqstan oblysynyń jármeńkesi bastaldy. Sórege qoıylǵan ónimderdi alyp jatqan adamdardyń qatary qalyń kórinedi. Jármeńkede sábiz, kartop, pııaz sııaqty kókónisterdiń kılosy 50 teńgeden, baıaldy – 100 teńgeden, qurttyń kılosy – 1 400 teńgeden, irimshik – 1 100 teńgeden, jylqy eti – 1 200 teńgeden, jylqynyń qazysy – 1 500 teńgeden, jumyrtqa – 22 teńgeden satylýda. Ásirese, qarbyz-qaýyn satyp alýshylardyń kezegi uzaqqa sozylypty. —Astanada qarbyzdyń maýsymy tez ótip ketedi, toıyp jep úlgermeımiz. Sol sebepti, ońtústiktiń qarbyz-qaýynynan aýyz tıeıik dep satyp aldym. Kılosy 90 teńgeden eken,— deıdi jármeńkege kelgen satyp alýshy Aıman esimdi astanalyq. Oblystyq Aýyl sharýashylyǵy basqarmasynyń bastyǵy Serik Turbekovtiń aıtýynsha, satylyp jatqan azyq-túliktiń barlyǵy oblystyń sharýalarynyń ónimi. Ońtústik Qazaqstan oblysy kókónispen ózin-ózi qamtyp qana qoımaı, kórshiles elderge eksporttaýǵa da úlgeredi. — Qazaqstanda jasalǵan aksııasynyń aıasynda oblystyq óndirýshiler 300 tonnadan astam aýylsharýashylyq ónimderin ákeldi. Saýda jasaýǵa kelgen adamdar kóp, ónimderimiz jaqsy ótip jatyr,— deıdi S.Turbekov. Ońtústik Qazaqstan oblysy bıylǵy jıyn-terim naýqanyn zor jetistikpen aıaqtaǵanyn aıta ketý kerek. Bıyl oblys boıynsha, 470 myń tonna astyq jınalypty. Bul byltyr bul kórsetkish 246 myń tonna kórsetkishten áldeqaıda mol kórsetkish. Astyqtyń ortasha túsimdiligi gektaryna 22 sentnerdi quraǵan. Bul táýelsizdik jyldaryndaǵy eń joǵarǵy rekordtyq ónim ken. Sonymen qatar, oblys ákimdigi jemis-jıdek, kókónis egiletin jerlerdiń kólemin de jyl saıyn ulǵaıtyp, dıhandarǵa qoldaý kórsetýdi júıeli túrde júrgizip kele jatyr. Sáıkesinshe ónim kólemi de artýda. Oblys sharýalarynyń ónimderinen Astanaǵa da aýyz tıgizizetin jármeńke búgin jáne erteń, ıaǵnı, eki kúnge sozylady. Nurhan ASQAR