"Astana" qarjy ortalyǵy men Nasdaq yntymaqtastyq jóninde kelisim jasady

Nıý-Iorkte «Astana» halyqaralyq qarjy ortalyǵy (AHQO) delegasııasynyń AQSh-qa sapary aıasynda AHQO Basqarýshysy Qaırat Kelimbetov pen Nasdaq, Inc prezıdenti Adena Frıdman О́zara túsinistik pen yntymaqtastyq týraly memorandýmǵa qol qoıdy. Memorandým jasaýdyń basty maqsaty AHQO-nyń bırjalyq ınfraqurylymy sheńberinde ózara tıimdi qarym-qatynas ornatý bolyp tabylady. Memorandýmǵa qol qoıý - Nasdaq, Inc kompanııasynyń AHQO (AIX) bırjasynyń qurylýyndaǵy qoldaý kórsetýdiń alǵashqy qadamy. Nasdaq, Inc AHQO-ǵa jasaǵan strategııalyq seriktestik boıynsha usynysynda qarjylyq quraldardy, eseptik-klırıngtik operasııalardy saýdalap jáne júzege asyratyn halyqaralyq standarttardy, bıznes erejeler men retteý, AHQO Qor bırjasynyń jumysyna joǵarǵy tehnologııalyq sheshimderdi daıyndap, engizý, operasııalyq prosedýralardy daıyndaý, qyzmetkerlerge trenıngter uıymdastyrý, sonymen qatar, jańa qarjylyq tehnologııalardy engizýdiń joldaryn izdeý boıynsha is-sharalardy qarastyrǵan, dep habarlady qarjy ortalyǵynyń baspasóz qyzmeti. AHQO Basqarýshysy Qaırat Kelimbetov atap ótkendeı, jumysy 2017 jyldyń ortańǵy sheninde bastalatyn AHQO bırjasynda ártúrli baǵaly qaǵazdar men óndiristik qarjylyq quraldary saýdalanatyn bolady. Q.Kelimbetovtiń sózinshe AHQO bırjasy ulttyq naryqtar men jetekshi bırjalardyń halyqaralyq saýda júıesimen yqpaldasýyn qamtamasyz etetin bolady. Iаǵnı, AHQO bırjasy jergilikti ınvestorlar men  sheteldik ınvestorlardyń birlesýine yqpal etpek, jáne álemdik qarjynyń Astanaǵa kelýine áser etpek. «Biz AHQO-nyń úzdik álemdik standarttarǵa saı keletin joǵary tehnologııalyq bırjalyq ınfraqurylymdy qurý boıynsha josparlaryn qoldaımyz jáne aldaǵy ýaqytta uzaq merzimdik yntymaqtastyq jasaýǵa daıynbyz», - dep atap ótti Nasdaq, Inc prezıdenti Adena Frıdman. Jalpy alǵanda, taraptar atap ótkendeı, atalǵan memorandýmnyń qol qoıylýy AHQO-nyń bırjalyq ınfraqurylymyn damytýǵa arnalǵan mańyzdy qadam bolyp sanalady. Eske sala ketsek, AHQO 2015 jyldyń jeltoqsan aıynda Qazaqstan Respýblıkasynyń Prezıdenti Nursultan Nazarbaev «Astana» halyqaralyq qarjy ortalyǵyn (AHQO) qurý týraly Konstıtýsııalyq zańǵa qol qoıdy. AHQO-nyń maqsaty qarjylyq qyzmetterdi kórsetetin halyqaralyq deńgeıdegi jetekshi ortalyq qalyptastyrý bolyp tabylady. Postkeńestik keńistikte tuńǵysh ret aǵylshyn quqyǵynyń qaǵıdattary engiziledi, qarjy ortalyǵynyń resmı tili  -  aǵylshyn tili bolady. AHQO-nyń mindetteri qarjylyq qyzmetter salasynda ınvestısııalaý úshin tartymdy orta qurý arqyly el ekonomıkasyna ınvestısııalar tartýǵa járdemdesý, Qazaqstan Respýblıkasynyń baǵaly qaǵazdar naryǵyn damytý, onyń halyqaralyq kapıtal naryqtarymen yqpaldasýyn qamtamasyz etý bolyp tabylady. AHQO sondaı-aq elimizde saqtandyrý, bank qyzmetteri men ıslamdyq qarjylandyrý naryǵyn damytýǵa nıettenedi. Al, Nasdaq, Inc - bul iri qor bırjasy, oǵan barlyq ashyq túrdegi aksıonerlik qoǵamdardyń jartysynan kóbi tirkelgen. Ol sondaı-aq  osy bırjada saýda jasaıtyn kompanııalardyń naryqtyq kapıtalızasııasy boıynsha Nıý-Iork qor bırjasynan keıingi álemdegi ekinshi iri bırja bolyp sanalady, bırja álemniń basqa bırjalarymen salystyrǵanda elektrondyq saýdanyń eń joǵarǵy kólemine ıe. Bırjanyń ataýy  National Association of Securities Dealers Automated Quotations (Baǵaly qaǵazdar jónindegi dılerlerdiń ulttyq qaýymdastyǵynyń avtomattandyrylǵan baǵa belgileýleri) abbrevıatýrasynan shyqqan.