Qyzylordada Aqtóbe oblysynyń kúnderi ótýde

Senbi kúni, 15 qazanda Aqtóbe oblysy delegasııasynyń baǵdarlamasy qalanyń óndiristik nysandaryn aralap, teatrlandyrylǵan qoıylymdardy tamashalaýmen jalǵasty. Qonaqtar «Orda Glass» JShS shyny tabaqshalaryn shyǵaratyn zaýytynyń qurylys alańyna (2017 jyly paıdalanýǵa beriledi) jáne «Jan-Araı» JShS agroındýstrıaldy keshenine bardy. Osy kúni Aqtóbedegi Q.Jubanov atyndaǵy memlekettik ýnıversıtetiniń stýdenttik teatrynyń, S.Báıishev atyndaǵy Aqtóbe ýnıversıtetiniń jastar teatrynyń qoıylymdary uıymdastyryldy. Sondaı-aq, T.Ahtanov atyndaǵy Aqtóbe oblystyq drama teatry ujymynyń spektakli kórsetildi. «Taǵzym» alańynda kórshi aımaqtyń taýar óndirýshileriniń aýylsharýashylyǵy ónimderi  jármeńkesine bardy. Aqtóbe oblysynyń sharýalary satylymǵa kartop, tary, basqa da kókónis túrleri, jemis-jıdekter, et-sút jáne ózge de baqsha ónimderin ákeldi. Budan bólek, jármeńke barysynda sporttyq jarystar uıymdastyrylyp, shyǵarmashylyq ujymdardyń óneri kórsetildi. Esterińizge sala keteıik, B.Saparbaev bastaǵan Aqtóbe oblysynyń delegasııasy Qyzylorda oblysyna aımaqaralyq yntymaqtastyqty nyǵaıtý maqsaty aıasynda kelgen bolatyn. Aımaqtar áleýmettik-ekonomıkalyq damýdyń ártúrli salalary boıynsha tájirıbe almasty.