Terrorızmmen kúres týraly zańǵa ózgerister tezirek qabyldanýy tıis - Turysbekov

«Nur Otan» partııasynyń Ortalyq apparatynda partııa janyndaǵy Quqyqtyq keńes «Terrorızmge jáne ekstremızmge qarsy is-qımyldyń ózekti máseleleri: zańnamalyq bastamalardy qaraý» taqyrybynda keńeıtilgen otyrys ótti. Oǵan Májilis depýtattary, adam quqyqtary boıynsha táýelsiz sarapshylar, úkimettik emes uıymdar jáne EQYU ókilderi qatysty, dep habarlaıdy Egemen-aqparat partııanyń baspasóz qyzmetine silteme jasap. QR Parlamenti Májilisiniń Zańnama jáne sot-quqyqtyq reforma komıtetiniń tóraǵasy, «Nur Otan» partııasy janyndaǵy Quqyqtyq keńestiń tóraǵasy Nurlan Ábdirov qazirgi tańda terrorızm jáne ekstremızm adamzat úshin aıtarlyqtaı qaýip bolyp tabylatyny týraly aıtyp ótti. «Buryndary terrorızm bizdiń elge jat uǵym edi. Qazirgi kúni jaǵdaı ózgerip, qazaqstandyqtar da el birligin, tynyshtyǵyn buzýǵa baǵyttalǵan jat aǵymdardyń jetegine erip ketýde. Er men áıel adamdar, tipti balalar da álemdegi tepe-teńdikti buzýǵa arnalǵan qaýipti sharalar men soǵystarǵa qatysýda. Jaqyndarymyzdyń terrorızmniń jolymen júrýlerine jol bermeýimiz kerek. Adam dúnıege basqa bireýdiń ómirin qııý úshin kelmeıdi. Bul uǵymdy ár adam jastaıynan sanasyna sińirýi qajet. Qoǵamda, halyq arasynda adamgershilik pen beıbitshilikti nyǵaıtyp, meıirimge toly qarym-qatynasty kúsheıtýimiz kerek», - deıdi Nurlan Ábdirov. Depýtattyń aıtýynsha, Qazaqstanda ekstremızm men terrorızmdi joıý men aldyn-alý boıynsha jumysty kúsheıtý máselesinde quqyq qorǵaý organdary jáne arnaıy qyzmettermen qatar, barlyq qazaqstandyq qoǵam, sarapshylar, ǵalymdar, din qaıratkerleri sondaı-aq, buqaralyq aqparat quraldary mańyzdy ról atqarýy tıis. «Búginde «Nur Otan» partııasy qoǵamda ekstremızm men terrorızmge tótep berý maqsatynda túrli deńgeıde san alýan jumystar júrgizýde», - dep atap ótti depýtat. EQYU-nyń Astanadaǵy baǵdarlamalar keńsesiniń basshysy Derd Sabo Qazaqstanda Úkimet, Parlament jáne azamattyq qoǵam terrorızmge qarsy turý máselesine úlken kóńil bóletinin aıtty. «Terrorızm máselesi búgingi kúni kúlli álemdi tolǵandyryp otyr. Terrorlyq aktilerden qarapaıym halyq zardap shegýde. Qazirgi kúni memleketter bul dertke qarsy turýdyń tıimdi joldaryn izdestirip jatqany belgili. Barlyǵy terrorlyq áreketten keıin emes, odan erterek birlese jumys isteý kerektigin uǵyp otyr. Aldyn alý sharalary - birigip áreket etýdiń eń tıimdi joly. Osy baǵytta zań da, adam quqyqtary da buzylmaýyn qamtamasyz etý qajet. Bizge qoǵam derti terrorızmmen kúresýde osy eki máseleni tepe-teńdikte ustaıtyn amaldardy qarastyrý kerek», - deıdi Derd Sabo. Sondaı-aq, Derd Sabo EQYU-nyń demokratııalyq ınstıtýttar men adam quqyqtary bıýrosy «Qazaqstan Respýblıkasyndaǵy ekstremızm jáne terrorızmge qarsy is-qımyl týraly» zańnamasyna engizilgen túzetýler boıynsha aldyn ala qorytyndymen tanysyp, óz usynystaryn jasaǵanyn jetkizdi. «Nur Otan» partııasynyń hatshysy Zaýytbek Turysbekov «Terrorızm men ekstremızmge qarsy is-qımyl týraly» zań jobasyna tezirek sapaly ózgeris engizý Parlament pen Úkimettiń kún tártibindegi máseleleriniń biri bolý tıis dep sanaıdy. Partııa hatshysy «Nur Otan» partııasynyń saılaýaldy baǵdarlamasynda saıası uıym jappaı qyryp-joıý qarýynyń taralýyna, halyqaralyq terrorızm men ekstremızmge, narkotrafıkke jáne zańsyz kóshi-qon úderisine tosqaýyl qoıýda belsendi bolatynyn málimdegenin eske saldy. «Nur Otan» partııasy elimizdiń jetekshi saıası kúshi retinde óziniń aınalasyndaǵy azamattyq qoǵamnyń barlyq resýrsyn terrorızm men ekstremızmge qarsy qoıady jáne partııa alańdaryn ortalyqta da, jergilikti jerlerde de tıimdi paıdalanady. Bizdiń aldymyzda partııa alańdarynda qabyldanatyn zań jobalaryn keńinen talqylaý jáne oǵan úkimettik emes uıymdardyń ókilderi men qoǵam múshelerin jumyldyrý mindeti tur», - dedi partııa Hatshysy. Z.Turysbekovtiń pikirinshe, terrorızmmen kúreste aldyn alý sharalaryna basymdyq berilýi qajet. Sonymen qatar, terrorızm týdyratyn sebepter anyqtalyp, terrorıstik aktilerge jol bermeýdiń amaldary qarastyrylýy kerek. «Barlyq áreket terrorızm kórinisterin azaıtýǵa jáne joıýǵa baǵyttalýy tıis. Munda terrorızm men ekstremızmge qarsy is-qımyl zańy mańyzdy ról atqarady. Memlekettik organdar zań jobasyn ázirleýde úlken jumys tyńdyrdy. Zań jobasynyń 24 aktine ózgeris engizildi», - dedi partııa hatshysy. Tanymal quqyq qorǵaýshy Evgenıı Jovtıs terrorızmmen kúresýde adam quqyǵyn buzbaıtyn zamanaýı tásilderdi qoldaný qajet dep sanaıdy. Quqyqtyq keńes otyrysynyń qorytyndysy boıynsha birqatar usynys qabyldandy.