Qazaqstan men Qyrǵyzstan tirkeýsiz eki elde bolý merzimin uzartady

Búgin Astanada Qazaqstan men Qyrǵyzstannyń syrqy saıasat vedomstvolarynyń basshylary Erlan Ydyrysov pen Erlan Abdyldaev birqatar mańyzdy qujattarǵa qol qoıdy. Taraptar Qazaqstan Respýblıkasy men Qyrǵyz Respýblıkasy azamattarynyń eki el aýmaǵynda bolý tártibi týraly Kelisimge ózgeris engizý týraly Hattamaǵa, Readmıssııa týraly kelisim jáne 2017-2018 jyldardaǵy Qazaqstan Respýblıkasy Syrtqy ister mınıstrligi men Qyrǵyz Respýblıkasy Syrtqy ister mınıstrligi arasyndaǵy yntymaqtastyq baǵdarlamasyna qol qoıdy. «Biz azamattarymyzdyń eki elde tirkeýsiz bolýyn retteıtin qujatqa qol qoıdyq. Bul eki el azamattarynyń eki el aýmaǵynda bolý tártibi týraly kelisimge ózgeris engizý týraly Hattama. Osyǵan sáıkes eki el azamattary 30 kúnge deıin tirkeýsiz eki eldiń aýmaǵynda bola alady. Árıne, bul qujat memleket ishindegi bekitý rásimderin talap etedi. Biz eki eldiń azamattary kútip júrgen osy qujat bekitý kezinde Parlamentte kidirip qalmaıdy degen senimdemiz», - dep habarlady  E. Abdyldaev. Sondaı-aq, mınıstrler shekaradaǵy ótkizý pýnkterinin damytý máselelerin talqylady. «Bul jumys bastalyp ketti jáne sáıkesinshe nátıjesin berip jatyr. Biz jumysty toqtatpaı, eki el azamattaryna bir-biriniń eline bararda jaıly jaǵdaı jasaý úshin, barlyq shekara boıynsha, barlyq baqylaý-ótkizý pýnkterinde jumystardy jalǵastyramyz dep kelistik», - dedi Qyrǵyzstan SIM basshysy. E. Abdyldaev qyrǵyz delegasııasynyń kelissózderdiń qorytyndysyna kóńilderi tolatyndyǵyn aıtty. Onyń aıtýynsha, elder arasyndaǵy qarym-qatynastyń ilgerilemeli damý serpini bar. «Bizde birqatar sheshilmegen másele bolsa da, mazmundy atqarylǵan jumys kólemi men aıtarlyqtaı áleýet bar. Eń bastysy bizde kún tártibinde turǵan barlyq máselelerdi sheshýge degen nıet pen úlken umtylys bar. Biz odaqtas, aǵaıyndy memlekettermiz. Biz sondaı boldyq, solaı bolyp qalamyz da», - dedi ol.