О́leńniń egiz órimi

Muńly mýza ıesi Muqaǵalı, jumbaq oıly Jumeken, tentek minez Toqash, birbetkeı Farızalardyń qatarynda názik sezim ıesi Kúlásh Ahmetova da qazaq óleńindegi órnegi ózgeshe aqynǵa aınalǵany anyq. Asqar taýdaı Ábdilda Tájibaevtyń bir kezdegi «Kúlásh – aqyn» degen pikiri qazaq óleńinde ózindik orny bar kórnekti tulǵany tap basyp kóre bilgeni bolsa kerek. Al óleń joldary syrǵa da, muńǵa da toly Qaıyrbek Asanov ta jeke basynyń qamyn kúıttemedi. Qazaqtyń qasıetin jyrlady. Áli de jyrlap keledi. Jaqynda Taraz tórinde talantty aqyndar, Qazaqstannyń eńbek sińirgen qaıratkeri Qaıyrbek Asanov pen Memlekettik syı­lyqtyń laýreaty Kúlásh Ahme­tovanyń Táýelsizdiktiń 25 jyl­dyǵyna arnalǵan poezııa keshi ótti. Bir shańyraq astynda erli-zaıypty bolyp kún keship, qazaq poezııasynyń damýyna ólsheýsiz úlesterin qosyp, óleń­degi ózge­lerden ózgeshe dara jol­daryn sala bilgen qos aqyn Qaıyrbek Asanov pen Kúlásh Ah­me­tova búginde jetpis jasqa tolyp otyr. Jambyl oblystyq qazaq drama teatrynda ótken poezııa keshinde qos aqynnyń jas kezi, stýdent shaǵy beınelenip, olardyń alǵash tanystyǵy, aralaryndaǵy ińkár­lik sezimderiniń oıanǵan sáti ádemi sýretteldi. – Kúlásh – aıaýly aqyn, súıikti jar, meıirimdi ana, aqyl­dy qaryndas. Onyń janynyń náziktigi, syrshyldyǵy, meıirim­diligi óleńderinen de tógilip tu­rady. Poezııasy tunyp turǵan adamgershilik, ınabattylyq, kisilik, parasattylyq. Jyrla­rynan keıde Qoja Hafızdiń, Saǵdıdyń úni estilse, endi birde Abaımen tildeskendeı bolatyn Kúlásh – perishte aqyn. Sol úshin ony bárimiz jaqsy kóremiz. Kúláshtiń týǵan jer, ósken ól­keni jyrlaýy aqıyq aqyn Muqa­ǵalımen úndesedi. Qazaqta bul taqyrypty Muqaǵalı men Kúláshtan artyq jyrlaǵan eshkim joq, menińshe. Bizdiń Kúláshti aıalap, alaqanynda ustap kele jatqan Qaıyrbektiń de sonaý Syrdaǵy jyrshylyq ortanyń qaınarynan shyqqan tasqyn talant ekenin bárimiz bilemiz. Onyń da óneriniń baǵasy bıikte ekenin aıta alamyz, – degen Memleket jáne qoǵam qaıratkeri Myrzataı Joldasbekov aqyndar shy­ǵarmashylyǵy týraly óziniń áde­mi de áserli oı-pikirlerimen bólisti. Jambyl oblysynyń ákimi Kárim Kókirekbaev aqyndar Qaıyrbek Asanov pen Kúlásh Ahmetovany 70 jasqa tolý mereıtoıymen arnaıy quttyqtap, temir tulpar syılady. Oralhan DÁÝIT, «Egemen Qazaqstan» Jambyl oblysy Sýretti túsirgen Aqádil RYSMAHAN