Teristikti sazben terbetedi

Qurmanǵazy atyndaǵy Qazaq memlekettik akademııalyq halyq aspaptary orkestriniń gastroldik saparyn soltústikqazaqstandyq ónersúıer qaýym óte jyly qabyldady. Osydan 7 jyl buryn óńirge sońǵy ret at basyn burǵan irgeli ujymnyń tyń baǵdarlamasyn aýyl turǵyndary da úlken rızashylyqpen tamashalap, rýhanı lázzatqa bólendi. Orkestrdiń dırektory Nurǵısa Dáýeshovtiń aıtýynsha, Táýelsizdigimizdiń shırek ǵasyrlyq mereıtoıyna arnalǵan «Uly Dala murasy» atty konserttik baǵdarlama Astanadan bastaý alyp, óńirlerde jalǵasyn tapqan. Alǵashqy tusaýyn akademık Ahmet Jubanov kesken, sodan bergi 80 jyldyq tarıhynda dúnıeniń tórt buryshyn túgel sharlap, dúnıejúzilik jáne halyqaralyq konkýrstardyń talaı márte laýreaty atanǵan orkestrdiń ómirbaıany óte baı. Qazaqtyń ulttyq mýzyka ónerin talmaı nasıhattap, aıdaı álemge tanytyp keledi. Orkestr qorytyndy konsertin oblys ortalyǵyndaǵy Jastar saraıynda qoıyp, qarashańyraqtyń abyroı-bedelin asyrǵan mártebeli kesh boldy. Biz Memlekettik syılyqtyń laý­reaty, Astanadaǵy Ulttyq óner ýnıversıtetiniń professory, tanymal ánshi Shahmardan Ábilovpen sóıleskenimizde bylaı tolǵandy: – Qazaq dalasy Uly Túrki dúnıesiniń qutty mekeni sanalsa, búgingi urpaqtary Uly Dala perzentteri ekeni daýsyz. Altaı men Atyraý, Jaıyq pen Ile, Alataý men Saryarqa Táýelsiz elimizdiń bir-bir bólshegi retinde myzǵymas tutastyǵymyzdy, birligimizdi aıǵaqtap tur. Olaı bolsa, árkez kórermenderin qýantyp júrgen ujymǵa memlekettiligimizdiń irgesin nyqtap, baıandy etken 25 jyldyq mereıtoı qarsańynda ún-túnsiz otyrý jaraspas bolar. Ásirese, jas urpaqqa ónerdiń, mýzykanyń qudiretin uǵyndyryp, patrıottyq, otanshyldyq qasıetterdi sanasyna sińire bilsek,biz úshin odan asqan mártebe joq. Máńgilik El bolý sekildi jalpyulttyq, mańyzdy memlekettik mindetti talmaı túsindirý ulaǵatty paryzymyzdyń biri desek te bolady. Maǵjannyń «Iаpyraı-aı» ánin jurtshylyqqa tuńǵysh ret tanytqan Shahmardan aǵamyz sóz arasynda myna bir usynysyn jergilikti bıliktegilerdiń nazaryna jetkizýdi ótindi. Qurmanǵazy atyndaǵy ulttyq konservatorııada 35 jylǵa jýyq dekan, kafedra meńgerýshisi qyzmetterin atqarǵan ol Qyzyljar óńiriniń týmasy Ermek Serkebaevpen kóp jyl áriptes, aınymas dos bolypty. Klassıkalyq-akademııalyq mýzykanyń damýyna teńdessiz úles qosqan ataqty tulǵanyń esimi el jadynan óshpese eken, týǵan jerinde onyń atynda festıval turaqty uıymdastyrylsa, kóshelerge, óner ordalaryna esimi berilse degen tilegin alǵa tartty. Orkestrdiń bas dırıjeri, «Daryn» memlekettik jastar syılyǵynyń ıegeri Batyrjan Myqtybaev Elbasynyń «alys aımaqtardaǵy turǵyndardyń mádenı órleý isine atsalysý» tapsyrmasy negizinde Mádenıet jáne sport mınıstrligi tarapynan qoldaý tapqan gastroldik sapar Mamlıýt, Qyzyljar, Aqqaıyń, Esil, Jambyl aýdandarynda úlken tabyspen ótkenin, jańa baǵdarlama aıasynda otandyq, sheteldik klassıkalyq shyǵarmalar qamtylatynyn atap ótti. Konsert Túrkeshtiń «Kóńil­ashar» kúıimen bastalyp, Qur­manǵazy, Táttimbet, Dınanyń qu­laq quryshyn qandyratyn kúı­leri, kópulttyq jáne álemdik kompozıtorlardyń ólmes týyndylary asqan shabytpen oryndaldy. Shahmardan Ábilov týǵan jerdiń ulylyǵyn, qadir-qa­sıe­tin uqtyratyn, júrek ter­beı­tin saǵynyshty ánderdi áýe­let­se, Tuńǵysh Prezıdent qory syı­lyǵynyń laýreaty Erlan Rys­qalı dástúrli ánderdi na­qyshyna keltire shyrqady. Halyqaralyq konkýrstardyń laýreattary Ásel Raqymjan, Gúlnur Kóshenova, Fahad Kýbıev te óz ónerlerimen tánti etti. Kópshilik nazaryna usy­nylǵan qaı shyǵarma bolsyn qazaq dalasynyń keńdigimen, darhandyǵymen bite qaınasyp jatqandaı áser qaldyrdy. О́mir ESQALI, «Egemen Qazaqstan» Soltústik Qazaqstan oblysy