Qaraǵandy oblysynda 15 turǵyn qulaǵaly turǵan úıden kóshpeı otyr

Qaraǵandy oblysyndaǵy Shet aýdanyna qarasty Aqjal aýylyndaǵy kópqabatty úılerdiń biri qulaǵaly tur. Qazirgi ýaqytta munda turyp jatqan 303 adam basqa jaqqa kóshirilgen. «Saqtyqta qorlyq joq» degen, úıdiń aınalasy qorshalyp, kúzet te qoıylypty. Aqaýy bar bul úı 1980 jyly salynǵan eken. Bıylǵy  jyldyń 6 qyrkúıeginde Shet aýdany ákiminiń qaýlysymen vedomstvoaralyq komıssııa qurylyp, úıdiń apatty jaǵdaıda turǵany anyqtalypty. Al bir aptadan keıin úıge qatysty tótenshe jaǵdaı jarııalanǵan. Sol kúnnen bastap aýdan ákimshiligi turǵyndar arasynda túsinik jumystaryn júrgizip, aqaýly úıdegi 69 páterdiń 288 turǵynyn basqa jaqqa kóshirgen. Olardyń bir bóligi (15 otbasy) burynǵy dárigerlik ambýlatorııaǵa qonystandyrylypty. Apattyń aldyn alý úshin úıdiń qabyrǵalaryndaǵy jaryqshaqtardy bekitip, jertólesin sýdan tazartyp, qurǵatý kerek. Sondaı-aq shatyr da tozyp ketken: kúrdeli jóndeý júrgizýdi qajet etedi. Basqa da maıda-shúıde jumystary jeterlik. О́kinishke qaraı, úıdiń qulaǵaly turǵany týraly eskertýlerdi elemegen tórt páterdiń 15-ke tarta turǵyny mekenderin  bosatqylary kelmeı otyr. Búgingi kúnde bul adamdarǵa ýaqytsha baspana berý máselesi talqylaný ústinde. Jergilikti bılik ókilderi apatty jaǵdaıda turǵan úıdi áli  sý men jylýdan ajyratqan joq. Qaraǵandy oblysynyń basshylyǵy qazirgi ýaqytta Aqjaldaǵy apatty úıdi qalpyna keltirýdiń joldaryn qarastyrýda. Al smetalyq qujattarǵa sáıkes, jóndeý jumystaryna az da emes, kóp te emes, shamamen 100 mıllıon teńge qarajat qajet eken.   Qaırat ÁBILDINOV, Qaraǵandy oblysy,