Astanada Raqymjan Qoshqarbaevqa eskertkish qoıyldy

Búgin Astanada Raqymjan Qoshqarbaevqa arnalǵan eskertkishtiń resmı ashylýy ótti. 1945 jyly qazaq jaýyngeri reseılik Grıgorıı Býlatovpen birge Qyzyl ásker quramynda birinshi bolyp Reıhstagqa Jeńis týyn tikken. 11 metrlik monýment B.Momyshuly men R. Qoshqarbaev dańǵyldarynyń qıylysynda ornalasqan, dep habarlady Astana qalasynyń mádenıet, muraǵattar jáne qujattama basqarmasynan. Jobaǵa sáıkes, músindik kompozısııanyń bıiktigi - 6 metr, al granıt tuǵyrdyń bıiktigi - 4,5 metr. Eskertkishtiń avtory - «Qazaq Eli» monýmentin jasaýǵa qatysqan belgili músinshi Asqar Nartov. Saltanatty shara barysynda Astana qalasy ákiminiń orynbasary Ermek Amanshaev qala turǵyndaryn eskertkishtiń ashylýymen quttyqtady. «Búgin qazaq jaýyngeri Raqymjan Qoshqarbaevtyń erligin máńgilik etý úshin osy monýmentti ashyp otyrmyz. Onyń esimi óskeleń urpaqtyń jadynda erliktiń sımvoly retinde saqtalýy kerek, sol sebepti Qazaqstan táýelsizdiginiń 25 jyldyǵy qarsańynda elordada aty ańyzǵa aınalǵan naǵyz jaýyngerimizge arnap eskertkish ornatyldy», - dedi Ermek Amanshaev. Saltanatty sharaǵa Raqymjan Qoshqarbaevtyń qyzy - Álııa, aty ańyzǵa aınalǵan keńes jaýyngeriniń nemereleri, sondaı-aq, leıtenant Qoshqarbaev týraly kitaptyń avtory Qasym Appasuly qatysty. Sonymen qatar, eskertkishtiń ashylýyna qatysqan júzdegen adam uly qazaq jaýyngeriniń músinine gúl shoqtaryn qoıdy. Monýmentti ornatýǵa elorda ákimdigi bastamashy boldy, eskertkishti daıyndaǵan jáne ornatqan «BI-Group». Raqymjan Qoshqarbaevqa arnalǵan eskertkishtiń ashylýy mańyzdy oqıǵa, óıtkeni ol qazaq jaýyngeriniń Ekinshi Uly Otan soǵysynda jasaǵan ólsheýsiz erligi týraly taǵy da bir eske salady. Kóp jyldar boıy keńestik tarıhshylar onyń erligin moıyndamaı kelgenin aıta ketý kerek. 2007 jyly ǵana reseılikter Ekinshi dúnıejúzilik soǵysta Berlınde Reıhstagty basyp alý kezinde Raqymjan Qoshqarbaev pen Grıgorıı Býlatovtyń birinshi bolyp tý tikkenderin resmı túrde málim etti. Osy erlikti jasaǵan kezde Qoshqarbaev nebári 21 jasta bolǵan. Batyrlyǵyna qaramastan Keńes áskeri qazaq jaýyngerin eshqandaı marapatqa usynǵan joq. Alaıda 2001 jyly Qazaqstan Respýblıkasy Prezıdentiniń jarlyǵymen Raqymjan Qoshqarbaevqa qaıtys bolǵannan keıin «Halyq Qaharmany» ataǵy berildi.