Ulttyq onkologııa ortalyǵynda 220 búırek transplantasııasy jasaldy

Memleket basshysy N.Á.Nazarbaevtyń tikeleı qoldaýymen elimizde densaýlyq saqtaý salasyna aıryqsha kóńil bólinip keledi. Keshendi baǵdarlamalar qabyldandy, qomaqty qarjy baǵyttaldy. Sonyń nátıjesinde iri qalalarymyzda, oblys pen aýdan ortalyqtarynda jańa aýrýhanalar men emhanalar salyndy, zamanaýı emdeý ortalyqtary damyǵan shetelderden alynǵan medısına salasyndaǵy ozyq tehnologııalarmen, ozyq qural-jabdyqtarmen qamtamasyz etildi. Halyqqa jańa zaman talabyna saı qyzmet kórsetetin osyndaı ortalyqtyń biri – Ulttyq onkologııa jáne transplantologııa ǵylymı ortalyǵy. El Úkimetiniń 2009 jylǵy 24 qazandaǵy qaýlysyna sáıkes Ulttyq medısınalyq holdıngtiń quramynda «Respýblıkalyq jedel medısınalyq járdem ǵy­lymı ortalyǵy» aksıonerlik qoǵamy quryldy. Al 2014 jyly 7 aqpanda Ulttyq medısınalyq holdıngtiń dırektorlar keńesiniń sheshimi negizinde bul Ortalyqtyń «Ulttyq onkologııa jáne transplantologııa ǵylymı ortalyǵy» («UOTǴO») AQ bolyp ataýy óz­gertildi. Ortalyqty qurýdyń maqsaty – joǵary sapaly jáne básekege qabiletti medısınalyq kómek kórsetýdi qamtamasyz etý, sondaı-aq, medısına ǵylymy, bilim berý men praktıka salasyn­daǵy zamanaýı tehnologııalardy engizý jáne taratý. Sonymen qatar Qazaqstan Respýb­­lıkasynyń Sanıtarlyq avıasııa jelisi boıynsha óńir­ler­den kelgen pasıentterge, onyń ishinde gestasııalyq keze­ńi 32 aptaǵa deıingi júkti áıel­derge jáne ekstragenıtaldy asqynýlary bar analarǵa bo­sanǵannan keıin de joǵary medı­sınalyq kómek kórsetýde erekshe ról atqarady. Sondaı-aq Or­talyqtyń qatysýymen bolatyn basqa da áleýmettik-mańyzdy jo­balar iske asyrylady. Atap aıtar bolsaq, Ortalyqtyń ońtaıly qurylymy bar, klınıkalyq bazada personaldyń shtattyq sany 1000 birlik bolsa, emdelýshiler úshin 240 tósek orny qarastyrylǵan. «UOTǴO» AQ – kópbeıindi medı­sına salasyndaǵy mamandan­dyrylǵan álemdik dárejedegi bi­regeı zamanaýı emdeý tásilin usy­nady. Bul jańa ádisterdi Or­talyqtyń praktıkasyna en­gizýge jol ashady jáne aıryqsha aýyr jáne joǵary tehnologııalyq medı­sına salasynyń biri – aǵza­lar men tinder transplantasııa­syn damytýǵa múmkindik berdi. Bizdiń ortalyqtyń irgesi qalanǵannan beri 56 myńnan astam adam em­delip shyqty, naýqastardyń janyn aman alyp qalý úshin 41 myńdaı jedel áreket etý sharalary, onyń ishinde joǵary mamandandyrylǵan kómek boıynsha shamamen 11 myńdaı operasııa júrgizildi. Gemofılııa jáne osteoonkologııa, qolqa anevrızmalaryn keshendi emdeý kezinde súıek kemiginiń allagendi jáne gaploıdti transplantasııasy, teri transplantasııasy (ksenotransplan­tasııa patenti bar) baýyrǵa transplantasııa jasaý, modýldik býyndardyń ortopedııasy sııaqty eksklıýzıvti tehnologııalardy otan­dyq den­saýlyq saqtaý prak­tıka­syna engizý­diń erekshe mańyzy bar. 2010 jyly tamyz aıynda onkogematologııa jáne súıek kemigi transplantasııasy bólimshesiniń ashylýy otandyq gematologııanyń tarıhyndaǵy eleýli jańalyq boldy. Qazaqstan Respýblıkasynyń gematologııalyq qyzmeti densaý­lyq saqtaýdy reformalaý jáne da­mytýdyń «Salamatty Qazaqstan» memlekettik baǵdarlamasy sheń­berinde Densaýlyq saqtaý jáne áleýmettik damý mınıstrliginiń bastamasymen 2010 jyly onko­gematologııalyq patologııalar – súıek kemigi transplantasııasyn emdeýdiń biregeı tehnologııasyn júrgizýge múmkindik alǵanyn aıtqanymyz jón. Gemoblastozasy bar naýqas­tarǵa súıek kemigi transplantasııasyn júrgizýdi bastaǵannan keıin (2010 jyldan bastap) shetelge emdelýge kezekte turǵan pasıentterdiń óz elimizde emde­lýine jol ashyldy. Jyl saıyn transplantasııalar sanyn arttyra kele, qazaqstandyq gematologtar shetelde keńinen tara­ǵan qan aýrýlaryn emdeý men dıag­nostıkalaýdyń jańa ádisterin engizdi. Olar: gemopoetıkalyq baǵanalyq jasýshalardyń (donordan) allagendi transplantasııa­sy (súıek kemigi), halyqaralyq tizilimge birigý, shetel donorlaryn tarta otyryp, týys emes adamnan transplantasııa júr­gizý. Orta­lyqta gematologııa bólimshesi ashylǵannan bastap 200-den astam súıek kemigi transplantasııasy júrgizildi. Ortalyqtyń klınıkalyq qyz­me­tindegi negizgi basymdyq­tardyń birin damytý – gepatobılıarly transplantologııa, sondaı-aq, otan­dyq densaýlyq saqtaýdyń aldyńǵy qatarly keshenin usy­nady. Sonymen, 2011 jyly Or­talyqtyń bazasynda elimizde alǵash ret tiri donordan búırekti laparoskopııalyq alý arqyly, 2012 jyly – elimizde tuńǵysh ret óli donordan aǵzalardy (búırek, júrek) mýltıaǵzalyq alý arqyly, 2013 jyly – alǵash ret óli donordan baýyrdy ortoptıkalyq transplantasııa arqyly aýystyrý jáne elimizde alǵash ret balaǵa tiri donordan baýyrdy transplantasııalaý júrgizilgen bolatyn. 2015 jyly tiri donordan baýyr transplantasııasy jasaldy. Ortalyq qurylǵaly beri 220-dan astam búırek transplantasııasy, 170 súıek kemigi transplantasııasy, shamamen 100 teri jáne 20-dan astam baýyr transplantasııasy júrgizildi. 2015 jyly Qazaqstan Respýb­lıkasynyń tuńǵysh Prezıdenti kúnine arnalǵan is-sharalar sheńberinde 220-dan astam transplantasııa júrgizilgen bolatyn. Al 2015 jylǵy 13 tamyzda Densaýlyq saqtaý jáne áleýmettik damý mınıstrliginiń buıryǵymen «UOTǴO» AQ bazasynda gastroenterologııa jáne gepatologııa boıynsha Respýblıkalyq úılestirý keńesi quryldy. Onyń maqsaty – baýyr transplantasııasyna muqtaj pasıentterdi irikteý, olarǵa qoldaý kórsetý jáne baqylaýǵa alý. Ortalyqtyń barlyq (243) negizgi klınıkalyq mamandary AQSh, Japonııa, Ońtústik Koreıa, Germanııa, Belgııa, Ita­lııa, Shveısarııa jáne basqa da shetelderdiń eń iri medısınalyq ortalyqtarynan taǵylymdamadan ótti. 2013 jyldan bastap bizdiń mamandardyń tálimgerlik etýimen 6 mamandyq boıynsha 60-qa jýyq rezıdentter bitirip shyqty. Ortalyqtyń jańartylǵan materıaldyq-tehnıkalyq bazasy jáne bizdiń mamandardyń joǵary biliktiligi men kásibı sheberligi naýqastardyń densaýlyǵyn tek­serýdi joǵary deńgeıde júrgizip, eń aýyr klınıkalyq jaǵdaıdaǵy aýrýlardy dıgnostıkalaý men emdeýdi júzege asyrýǵa múmkindik beredi. Ortalyqta óz salasynyń bilgiri, tájirıbesi mol jáne dıagnostıka men emdeýdiń álem boıynsha jetekshi klınıkalarynda zamanaýı ádisterdi meńgergen medısına ǵylymdarynyń kandıdattary men doktorlary, joǵary sanattaǵy dárigerler qyzmet jasaıdy. Elimizdiń barlyq óńiri­nen telemedısınalyq konferen­sııa­nyń kómegimen jan-jaqty aqyl-keńes júrgizýde Ortalyqtyń dári­gerlerine degen suranys óte joǵary. Sondaı-aq, mamandar kóshpeli konsýltasııalar ótkizedi jáne bizdiń Ortalyqtyń bazasynda joǵary mamandandyrylǵan medısınalyq kómek kórsetý úshin respýblıkanyń ár óńirlerinen, onyń ishinde naý­qastardy sa­nı­tarlyq avıasııa jelisi boıynsha jetkize otyryp, emdeýdi júzege asyrady. Ortalyq qu­ryl­ǵan kezeńnen bastap shamamen 1000-nan as­tam syrqat adamǵa medısınalyq kó­mek kórsetildi. Aýrýlardyń aldyn alý maqsatynda da atqarylyp jat­­qan jumys aýqymy da aı­tar­lyqtaı. Máselen, Qazaqstan Res­pýb­lıkasy táýelsizdiginiń 25 jyl­dy­ǵyna oraı 2016 jylǵy 21-23 qyr­kúıek kúnderi «UOTǴO» AQ  ha­lyqty óz densaýlyǵyna kóńil bó­lýge baǵyttaý úshin jáne aýrýdy erte satysynda anyqtaý úshin Ashyq esik kúnin ótkizdi. 750-den astam adam Ortalyqtyń joǵary sanattaǵy dárigerlerine qaralyp, tegin aqyl-keńes aldy. Qoryta aıtqanda, «Ulttyq onkologııa jáne transplantologııa ǵylymı ortalyǵy» AQ –  Qazaqstan Respýblıkasynda jáne jeke klınıkalyq baǵyttar boıynsha Ortalyq Azııa aýmaǵynda jetik mamandandyrylǵan medısınalyq kómek kórsetetin joǵary deńgeıdegi qýatty, kóp beıindi stasıonar. Basty maqsatymyz – halyqqa qaltqysyz qyzmet kórsetý. Narıman TABYNBAEV, «Ulttyq onkologııa jáne transplantologııa ǵylymı ortalyǵy» AQ basqarma tóraǵasy