Eldos Smetov: Erejesiz jekpe-jekke aýysý oıymda joq

Rıo Olımpıadasynda birneshe qazaqstandyq dzıýdoshy  júldeger atandy. Bul elimizde dzıýdonyń qarqyndy damyp kele jatqanyn bildiredi. Rıo dúbiri basylǵannan arada eki aı ótkende biz sol oıyndardyń kúmis júldegeri Eldos Smetovpen kezdesip, qysqasha suhbat jasaǵan edik. – Eldos, Olımpıadany taǵy bir eske alsaq. Esh ókinishińiz joq pa? – Olımpıada men úshin sátti ótti. Bul sporttaǵy eń úlken  jetistigim. Kóńilim tolmaıtyn, ókinetin tusym joq. Tek sáttilik jetispedi. Degenmen, kúresime ózim tántimin, ekinshi oryn alǵanyma óte qýanyshtymyn. – Fınaldaǵy qarsylasyńyz Beslan Mýdranov reseılik jýrnalısterge bergen suhbatynda «Smetov – óte jyldam. Biraq sońǵy mınýttarda sharshap qalady eken, sony baıqap daıyndaldym» dedi. Kelisesiz be? – Joq, men sharshaǵan joqpyn. Kerisinshe, jeńiske degen kúsh-jigerim oıanyp ketti. О́zime qatty senip, emosııaǵa berilip qoıdym. Al tehnıkalyq, fızıkalyq, psıhologııalyq turǵyda bári óte jaqsy boldy. – Dzıýdoda eń kóp qoldanatyn ádisińiz qandaı? – Shyn balýanǵa oń men soly birdeı ǵoı. Sol sııaqty eki jaqqa da kire beremin. Bir ádisti jıi qoldanatyn sportshylar qatarynan emespin. – Tatamıdegi qarsylastarmen ómirdegi qarym-qatynasyńyz qandaı? – О́mirde eshqaısysymen qarsylas emespin. Sálemimiz túsý, aralasamyz, bir-birimizdi syılaımyz, ishke búkken syrymyzdy jasyrmaı baıandamasaq ta, ortaq taqyryptaǵy áńgimeler tabylyp jatady. Dos degen ataýǵa laıyqtylar da bar, laıyqsyzdar da tabylady. Olardy, halyqaralyq syndarǵa birge qatysyp júrgen sheteldik dzıýdoshylardy tanystar kategorııasyna jatqyzamyn. – Tatamıge qashan shyǵasyz? – Jarysty Dıýseldorfta ótetin halyqaralyq «Grand Prix» týrnırinen bastaımyn. Ool kelesi jyly aqpan aıynda ótedi. – Kýmırińiz kim? – Dzıýdodaǵy kýmırim – Tadohıro Namýra. 60 kelide Olımpıadanyń úsh dúrkin chempıony retinde tarıhta aty qalǵan sportshy. – Olımpıada chempıony bolyp jatsańyz, erejesiz jekpe-jekke aýysatyn oıyńyz bar ma? – Joq, ondaı maqsatym joq. Ol densaýlyqqa óte zııan sport túrleriniń biri. – Sportshylar ádette bir Olımpıadadan keıin sporttyq karerasyn aıaqtap jatady. Bul jaıly oılap kórdińiz be? – Ekinshi oryn alǵanym da jaqsy bolǵan shyǵar. Rıo Olımpıadasynda altyn alǵanymda, cporttyq kareramdy aıaqtaýym da múmkin edi. Sebebi, qalǵan jarystardyń bárinen altyn medal alyp bolǵam. Tek Olımpıada altyny jetispeı tur. Rıodaǵy olqylyqtyń ornyn toltyratyn kez keletinine senemin. Jeńilgen kúreske toımas deıdi ǵoı. Rıo Olımpıadasynda marapattaý sátinen keıin «Myna altyn medal meniń moınyma taǵylýy kerek. Myna ánniń ornyna qazaqtyń ánurany shyrqalýy kerek» dep, ishteı bulqynyp turdym.  Qudaı qalasa, Tokıoǵa baramyn. Sportshy bolǵannan keıin altyn úshin eńbek etemin. Biraq, kim biledi, aldaǵy tórt jyldyqta menen de myqty sportshy el ishinen shyǵyp qalar. Olımpıada oıynyna qatysý úlken bir jetistik. – Jattyqtyrýshy bolǵyńyz kele me? – Shynymdy aıtsam, áli jattyqtyrýshylyq týraly oılanyp kórmedim. Qazaqta «Eki qaıyqtyń basyn ustaǵan sýǵa ketedi» deıdi ǵoı. Sport jolymdy áli de jalǵastyryp, kelesi Olımpıadaǵa daıyndalamyn. Olımpıadanyń altyn medalin alam dep aldyma maqsat qoıǵan soń soǵan jetýim kerek. Basqa eshteńe oılamaýym kerek, basqa eshteńeni josparlamaýym qajet. Qazirden ár nárseniń basyn bir shalsam, maqsatyma jetý qıyndaıdy.   Áńgimelesken Áıgerim Toqsanbek