«Shahter» tómengi topqa túspeıdi

Fýtboldan premer-lıga komandalary arasyndaǵy Qazaqstan chempıonatynyń jalaý túsirýine bir týr qaldy. 29 qazan kúni bolatyn bul matchtarda júldelerdiń taǵdyry sheshilip qana qoımaı, joǵary toppen qosh aıtysatyn komandalar da anyqtalmaq. Bir esepten munyń ózi bıylǵy birinshiliktiń tartysty hám qyzǵylyqty ótip jatqanyn kórsetse kerek. Osydan eki-úsh jyl buryn bireý Qaraǵandynyń «Shahteri» úshin bıyl premer-lıgada qalýdyń ózi muńǵa aınalady dese, senbegen de bolar edik. О́kinishke qaraı, elimizdiń eki dúrkin chempıony bul maýsymda asa kúrdeli jaǵdaıdy bastan ótkerdi. Eń bastysy, qar­jylyq qıynshylyqqa tap bolǵan kenshiler komandasynyń quramynda sheber oıynshylar turaqtamaı, olardyń ornyn ortańqol fýtbolshylar basty. Árıne, mundaı jaǵdaıdyń jasaqtyń oıyn órnegine keri áserin tıgizgeni anyq edi. Abyroı bolǵanda, senbi kúni «Shahter» Taldyqorǵannyń «Jetis­ýyn» qabyldap, 4:1 esebi­men utty. Kezdesýde qaqpa qul­pyn kenshilerdiń jartylaı qorǵaý­shysy Soke ashty. Birinshi taım sońynda qurama oıynshysy Baıjanov esepti 2:0-ge jetkizdi. Oıynnyń ekinshi bóliginde Ýbbınk pen taǵy Baıjanov mergen­dikterimen kózge tústi. Al qonaqtar jaǵynan jalǵyz goldy kezdesýdiń sońǵy mınýtynda Azovskıı soqty. Osy jeńisten keıin ǵana kenshilerdiń  basyndaǵy qaýip bulty seıilip, ujym joǵary topta áýpirimmen qaldy. Bul týrda ekinshi «altylyqtyń» kóshbasshysy «Tobyl» syrt alańda «Tarazdan» 1:2 esebimen jeńilgenine qaramastan, óziniń 7-ornynda nyq tur. Olardyń 31 oıynnan keıin 41 upaıy bar. Oralda «Aqjaıyqtan» 1:3 esebi­men utylǵan «Atyraý» «Shahterdi» alǵa jiberip, 9-orynǵa turaqtady. Bul ekeýiniń enshisinde 36 upaıdan bar. Al kósh sońyndaǵy «Aqjaıyq», «Taraz» jáne «Jetisý» koman­dalarynyń taǵdyry 29 qazanda ótetin sońǵy týrda sheshilmek. Alǵashqy ekeýiniń qorjynynda 32 upaıdan bolsa, sońǵysynyń 31 upaıy bar. Bul kúni «Aqjaıyq» pen «Jetisý» Taldyqorǵan qalasynda ózara taıtalasqa tússe, «Taraz» óz alańynda qaraǵandylyqtardan qaıtse de basym túsýge bar kúshin salady. Qaırat ÁBILDINOV, «Egemen Qazaqstan» QARAǴANDY