Bıylǵy jyly elimizdegi basqa da buqaralyq aqparat quraldarymen birge, «Habar» telearnasynyń resýrstaryn jańǵyrtý úderisi belsendi túrde júrgizile bastady. Bul baǵyttaǵy jumystar Elbasynyń otandyq buqaralyq aqparat quraldarynyń sapasyn arttyrý jónindegi tikeleı tapsyrmasy boıynsha iske asyrylýda.
Medıa salada taǵy bir jaǵymdy jańalyq bar. Ol – aqparat keńistiginde ózindik orny bar «Kazakh TV» telearnasynyń jańa formatqa kóshýi. Bul týraly Qazaqstannyń Aqparat jáne kommýnıkasııalar mınıstri Dáýren Abaev aıtty.
– Búgingi tańda aldymyzda turǵan mańyzdy mindetter bar. Olardyń biri – elimizdi halyqaralyq deńgeıde nasıhattaý. Osyǵan oraı, sheteldik aýdıtorııany qamtyǵan tuńǵysh otandyq «Kazakh TV» telearnasy «Bilim jáne mádenıet» telearnasymen biriktirilip, jańarǵan formatta habar taratýǵa kiristi. Osylaısha, elimizdiń saıası-ekonomıkalyq jáne mádenı jańalyqtary álem nazaryna keńinen usynylmaq. «Bilim jáne mádenıet» telearnasyndaǵy sapaly kontent mine, osy úshin qoldanylady. Jalpy, buqaralyq aqparat quraldarynyń ishinde telearnanyń asa qýatty qural ekeni belgili. Osyny el maqsaty men ult múddesine utymdy paıdalana bilý asa mańyzdy. Jańarǵan arnanyń ujymy bul mindetti oıdaǵydaı atqarady dep senemin, – dedi Dáýren Áskerbekuly.
Sonymen qatar, ol memlekettik telearnalar básekelestik jaǵdaıynda ómir súrip kele jatqanyn, máselen, telearnalar naryǵynda habar taratýdyń jańa ádis-tásilderin, pıar-strategııasyn ıelengen «jańa oıynshylar» paıda bolǵanyn, básekelestiktiń jandanýynda túrli onlaın-servıster men beıne-hostıngter de úlken ról atqaratynyn atap ótti. Mundaı jaǵdaıda mass-medıany damytýǵa yqpal etetin negizgi trendterden qalyp qoımaý qajet. О́zgerýge beıil bolyp, aýdıtorııamen baılanys ornatýdyń jańa tásilderin oılap tapqan jón. Bálkim, kórermenderge qyzyǵýshylyq týǵyzbaıtyn «eskirgen qaǵıdattardy» ysyryp tastaý da qajet shyǵar. Iаǵnı, biz ózgerýimiz kerek. Ol úshin aýdıtorııaǵa qandaı aqparat resýrstary qajettigin sezinip, kreatıvti bastamalardy ilgeriletetin tıimdi menedjmentti qalyptastyrýymyz kerek. Bir sózben aıtqanda, aqparattyq salada júrip jatqan ózgerister árdaıym jiti nazarda turǵany jón, – dedi mınıstr.
Bul oraıda, ol «Kazakh TV» telearnasy elimizdi aqparattyq jaǵynan alǵa jyljytatyn flagman bolyp otyrǵanyn jetkizdi. Álemniń 118 eline habar tarata otyryp, bul telearna Memleket basshysynyń ǵalamdyq syrtqy saıası bastamalaryn, «EKSPO-2017», «Ýnıversıada-2017» sekildi aýqymdy is-sharalardy nasıhattaýda mańyzdy strategııalyq ról atqarady. Endeshe, telearnanyń jańa formaty otandyq telearna ónimderiniń sapasyn kóterýge, sol arqyly kórermender aýdıtorııasyn keńeıtýge sep bolady dep oılaımyn, – dedi vedomstvo basshysy.
Dáýren Áskerbekulynyń aıtýynsha, telearna efırinen taratylatyn aqparattyq baǵdarlamalar 15 paıyzǵa deıin qysqarmaq. Iаǵnı, el turǵyndary qandaı da bir jańalyqty negizinen Internet pen aqparat agenttikteri arqyly bilip otyratyndyqtan, bul arna arqyly Qazaqstannyń mádenıetine, tarıhyna, salt-dástúrine, ekonomıkasyna jáne tańǵajaıyp tabıǵatyna arnalǵan tanymdyq baǵdarlamalar jaryqqa shyǵarylmaq. Bul óz kezeginde Qazaqstannyń týrıstik jáne ınvestısııalyq tartymdylyǵyn arttyrýǵa da yqpal etpek, – deıdi Dáýren Abaev.
Jańa formatqa kóshirilgen, jalpy aýdıtorııasy 300 mıllıon adamdy qamtıtyn telearnanyń til saıasaty da ózgeriske ushyraǵan. Iаǵnı, ishki aýdıtorııa úshin efır qazaq jáne orys tilderinde, al sheteldik aýdıtorııa úshin qazaq jáne aǵylshyn tilderinde taratylmaq.
Sóziniń sońynda mınıstr: «Mundaı ózgerister, sózsiz, Qazaqstan turǵyndarynyń ǵana emes, sheteldikter tarapynan da joǵary baǵaǵa ıe bolady dep oılaımyn», – deı kele, «Kazakh TV»-nyń ujymyna sáttilik pen shyǵarmashylyq tabys tiledi.
Láıla EDILQYZY,
«Egemen Qazaqstan»
Sýretterdi túsirgen
Erlan OMAROV,
«Egemen Qazaqstan»
«Egemen Qazaqstan»
