Májilis depýtaty Sergeı Dıachenko qaıtys boldy

Kórnekti qoǵam qaıratkeri, QR Parlamenti Májilisiniń depýtaty Sergeı Dıachenko ómirden ozdy. Bul týraly búgin Májilistiń jalpy otyrysynda palata tóraǵasy Nurlan Nyǵmatýlın málim etti, dep habarlaıdy egemen.kz QazAqparatqa silteme jasap. «Uzaqqa sozylǵan aýyr syrqatynan keıin bir saǵat buryn bizdiń áriptesimiz, kórnekti qoǵam qaıratkeri Sergeı Dıachenko ómirden ozdy. Ol óziniń kúsh-jigerin, bilimin, tájirıbesin bizdiń elimizdiń ıgiligine baǵyttady. Sergeı Aleksandrovıchtiń týysqandaryna, jaqyndaryna qaıǵyryp kóńil aıtamyz. Ol Qazaqstannyń naǵyz patrıoty, bizdiń dosymyz ári áriptesimiz týraly estelik árqashanda bizdiń júregimizde saqtalady», - dedi N. Nyǵmatýlın. Jalpy otyrys aldynda depýtattar Sergeı Dıachenkony bir mınýt únsizdikpen eske aldy. Dıachenko Sergeı Aleksandrovıch Ekonomıkalyq reforma jáne óńirlik damý komıtetiniń múshesi Qazaqstan Respýblıkasy Aqmola oblysynyń Shortandy eldi mekeninde 1952 jyly 18 qyrkúıekte dúnıege keldi. 1973 jyly Kýıbyshev josparlaý ıstıtýtynyń ónerkásip-ekonomıka fakýltetin ekonomıst mamandyǵy boıynsha bitirdi. Saıası bilimi bar (Almaty Joǵary partııa mektebi). Saıası ǵylymynyń doktory. Doktorlyq dıssertasııasynyń taqyryby - «Qazaqstandaǵy demokratııalyq jańǵyrtý máseleleri (saıası taldaý)». Qazaqstan Respýblıkasy Saıası ǵylym Akademııasynyń korrespondent-múshesi. Júzden astam ǵylymı jumystardyń, kitaptardyń, oqýlyqtar men ádistemelik quraldardyń avtory. Eńbek jolyn 1973 jyly Penza oblysy Kýznesk qalasyndaǵy aspaptyq jabdyqtaý jáne kondensatorlar zaýytynda ınjener-ekonomıst bolyp bastady. 1973 jyly KSRO Qarýly Kúshteri qataryna áskerı qyzmetke shaqyryldy. Áskerı qyzmetin Reseı Federasııasynyń Prımore ólkesindegi Qyzyl týly qıyr shyǵys áskerı okrýginde atqardy. Áskerı qyzmetten soń týǵan eli Qazaqstanǵa qaıta oralady. Qazaqstan Respýblıkasy Qarýly Kúshteriniń zapastaǵy polkovnıgi boldy. On jyl kóleminde Shortandy aýdandyq komıtetiniń nusqaýshysy qyzmetinen Qazaqstan komsomoly Ortalyq Komıtetiniń ekinshi hatshysyna deıingi eńbek jolynan ótti. 1985-1991 jyldary aralyǵynda - Qazaqstan Kompartııasy Kókshetaý qalalyq komıtetiniń birinshi hatshysy jáne sonymen qatar (1990 jyldan bastap) halyq depýtattary Kókshetaý qalalyq keńesiniń tóraǵasy boldy. 1991-1993 jyldary Qazaq KSR Jastar isi, dene tárbıesi jáne sport jónindegi memlekettik komıteti tóraǵasynyń orynbasary, Qazaqstan Respýblıkasy týrızm, dene tárbıesi jáne sport mınıstriniń orynbasary boldy. 1993 -1999 jyldar aralyǵynda qoǵamdyq uıymdarda jumys istedi. 1999 jáne 2005 jyldarda ótken Memleket basshysyn saılaý naýqandarynda Almaty qalasy boıynsha N.Á.Nazarbaevtyń senimdi ókili boldy. 1999-2004 jyldar aralyǵynda - ekinshi saılanǵan Qazaqstan Respýblıkasy Parlamenti Májilisiniń depýtaty. 2004-2007 jyldar aralyǵynda - úshinshi saılanǵan Qazaqstan Respýblıkasy Parlamenti Májilisiniń depýtaty. 2004 jyldyń qarasha aıynan bastap - Qazaqstan Respýblıkasy Parlamenti Májilisi Tóraǵasynyń orynbasary boldy. 2006 jyldan 2009 jylǵa deıin Qazaqstan halyqtary Assambleıasy tóraǵasynyń orynbasary bolyp saılandy. 2007-2009 jyldar aralyǵynda - tórtinshi saılanǵan Qazaqstan Respýblıkasy Parlamenti Májilisiniń depýtaty. 2007 jyldyń qyrkúıek aıynan bastap - Qazaqstan Respýblıkasy Parlamenti Májilisi Tóraǵasynyń orynbasary. 2010 jyldyń naýryz aıynan bastap Qazaqstan Respýblıkasy Prezıdentiniń Jarlyǵymen Aqmola oblysynyń ákimi laýazymyna taǵaıyndaldy. 2012 jyldyń qańtar aıy - 2016 jylǵy naýryz aıy aralyǵynda besinshi saılanǵan Qazaqstan Respýblıkasy Parlamenti Májilisiniń depýtaty, Qazaqstan Respýblıkasy Parlamenti Májilisi Tóraǵasynyń orynbasary boldy. 2016 jyldyń naýryz aıynan bastap - altynshy saılanǵan Qazaqstan Respýblıkasy Parlamenti Májilisiniń depýtaty boldy. «Nur Otan» halyqtyq demokratııalyq partııasy Saıası Keńesiniń múshesi. «Qurmet belgisi», «Parasat», I dárejili «Dostyq» ordenderimen, TMD-nyń «Dostastyq» ordenimen, segiz medalmen, Qazaq KSR Joǵary Keńesiniń Qurmet gramotasymen marapattalǵan. Artynda jary, úsh balasy  men úsh nemeresi qaldy.