Keshe Qazaqstan Respýblıkasynyń Sıngapýr Respýblıkasyndaǵy Elshisi Úsen Súleımen Sıngapýrdyń syrtqy ister mınıstri Vıvıan Balakrıshnamen kezdesti, dep habarlaıdy egemen.kz syrtqy ister mınıstrliginiń saıtyna silteme jasap.
Basqosý barysynda sıngapýrlyq mınıstr Qazaqstan Respýblıkasyn Táýelsizdiktiń 25 jyldyǵymen quttyqtady. Kezdesý kezinde Qazaqstan men Sıngapýr arasyndaǵy saıası, saýda-ekonomıkalyq jáne ınvestısııalyq salalardaǵy yntymaqtastyq máseleleri talqylandy.
Sondaı-aq, taraptar sońǵy ýaqytta eki eldiń arasyndaǵy yntymaqtastyqtyń joǵary deńgeıge shyqqanyn aıtty. Onyń sebepteriniń biri retinde 2016 jyly qyrkúıekte Sıngapýrdyń burynǵy premer-mınıstri Go Chok Tongtyń Astanaǵa sapar jasaǵanyn atady. Qazaqstan Elshisi Sıngapýrdyń syrtqy saıası vedomstvosynyń basshysyn Qazaqstannyń negizgi damý baǵyttary týraly, sonyń ishinde «Bes ınstıtýsıonaldyq reformalardyń» júzege asyrylýy, ınfraqurylymdyq jobalar «Nurly jol» jańa ekonomıkalyq saıasaty, Astanada «EKSPO-2017» kórmesiniń ótkizilýi men «Astana» halyqaralyq qarjy ortalyǵynyń qurylýy týraly habardar etti.
Kezdesý barysynda kelesi jyldyń birinshi jartysynda «Qazaqstannyń ınvestısııalyq klımaty – Sıngapýr men Azııa-Tynyq muhıt aımaǵyna jetildirilmegen múmkindikteri» Qazaqstan-sıngapýr bıznes forýmynyń ótetindigi, jaqyn arada Sıngapýrda ornalasatyn «Qazaqstan-Azııa-Tynyq muhıt saýda-ınvestısııalyq palatasynyń» (Kazakhstan-Asia Pacific Trade & Investment Chamber (KAPTIC) qurylatyndyǵyn habarlandy. Sondaı-aq, Elshi Qazaqstan tarapynyń sheshimine sáıkes 2015 jylǵy 16 shildeden bastap sıngapýrlyq azamattar elimizde 15 kúnge deıin vızasyz sapar shege alatynyn eske saldy.
О́z kezeginde, Sıngapýrdyń syrtqy ister mınıstri elimizdiń halyqaralyq sahnadaǵy jetistikterine jáne memleket ishindegi júrgizilip jatqan reformalaryna joǵary baǵa berip, Qazaqstan Ortalyq Azııa óńirindegi ekonomıkalyq damýyndaǵy kóshbasshysy ekendigin atap ótti.
