N.Nazarbaev qarjy mınıstrin qabyldady

Nursultan Nazarbaev QR qarjy mınıstri Baqyt Sultanovty qabyldady, - dep habarlaıdy egemen.kz Aqordaǵa silteme jasap. Kezdesý barysynda Baqyt Sultanov Qazaqstan Prezıdentine Qarjy mınıstrliginiń bıylǵy 9 aıda atqarǵan jumysynyń qorytyndysy, respýblıkalyq jáne jergilikti bıýdjettiń atqarylýy, sondaı-aq Memleket basshysynyń tóraǵalyǵymen 2016 jylǵy 9 qyrkúıekte ótken Úkimettiń keńeıtilgen otyrysynyń qorytyndysy boıynsha berilgen tapsyrmalardyń iske asyrylýy týraly baıandady. Elbasy bıýdjet úderisteriniń tıimdiligin odan ári arttyrýǵa, bıýdjetti qalyptastyrý barysynda ekonomıkanyń ósimine yqpal etetin memlekettik baǵdarlamalarǵa negizdelgen utymdy tásilderdiń qoldanylýyna basa nazar aýdardy. Sondaı-aq, Qazaqstan Prezıdenti jekeshelendirýdiń ekinshi kezeńin iske asyrý jónindegi sharalardy júzege asyrý qajettigine aıryqsha toqtaldy. "Memlekettik nysandardy otandyq jáne sheteldik ınvestorlardyń menshigine berý isiniń meılinshe jarııalylyǵy men tıimdiligin qamtamasyz etý qajet", - dedi Nursultan Nazarbaev. Budan bólek, Memleket basshysy múlikti zańdastyrý jónindegi naýqannyń sońǵy kezeńine qatysty mindetter qoıdy. Máselen, Qazaqstan Prezıdenti bul naýqandy júrgizý barysynda qalyptastyrylǵan jarııalylyq jaǵdaıyn atap ótip, onyń el ekonomıkasy úshin nátıjeliligin aıtty. "Múlikti zańdastyrý salyq esebinen bıýdjetti tolyqtyryp, odan ári ekonomıkaǵa paıdasyn tıgizetin aktıvterdi anyqtaýǵa múmkindik beretin bolady. Bul - salyq júıesiniń basty mindetteriniń biri", - dedi Elbasy. Qarjy mınıstri tıimdi ekonomıkalyq saıasat pen "Nurly jol" memlekettik baǵdarlamasyn iske asyrý barysynda zańnamalarǵa ózgerister engizý, salyq pen kedendik basqarýdy jetildirý esebinen bıýdjet kirisiniń turaqtanýy jáne bıyl onyń 7,4 paıyzǵa ósýi baıqalyp otyrǵanyn málimdedi. Kezdesý qorytyndysy boıynsha Elbasy birqatar naqty tapsyrma berdi.