Kenen atyndaǵy konkýrs

talaı talanttyń tusaýyn kesti Qazaqtyń óner álemindegi Alataýdaı asqaq aqyn, kerbez kompozıtor Kenen Ázirbaevtyń keıingi urpaqqa qaldyrǵan ólmes murasy men óshpes ónegesi Taraz tórinde taǵy bir pash etildi. Naqtyraq aıtsaq, Jambyl ob­lystyq mádenıet, arhıvter jáne qujattama basqarmasynyń uıymdastyrýymen Kenen Ázir­baev atyndaǵy «Shyrqa, daýsym!» atty VIII respýblıkalyq ánshiler konkýrsy Áýlıeata aspanyn án-jyrǵa bóledi. О́skeleń urpaqty K.Ázir­baevtyń shyǵarmashy­lyǵymen tereńirek tanystyryp, urpaqtan-urpaqqa jetkizýdi jáne dástúrli oryndaýshylyq ónerdi jan-jaqty nasıhattaý, sondaı-aq, daryndy jastardyń oryndaýshylyq sheberligin shyńdap, kópshilikke keńinen tanylýyna múmkindik jasaýdy basty maqsat tutqan bul án konkýrsyna bıyl darqan dalamyzdyń Astana, Almaty qalalarynan jáne Aqmola, Al­maty, Qyzylorda, Shyǵys Qa­zaqstan, Ońtústik Qazaqstan, Jam­byl oblystarynan barlyǵy 22 án­shi men óner maıtalmandary qatysty. Jalpy alǵanda, Kenen Ázir­baev atyndaǵy «Shyrqa, daýsym!» atty respýblıkalyq ánshiler konkýrsy dástúrli túrde eki jylda bir ret ótkizilip keledi. Aýqymy keń bul baıqaýdyń júldegerleri qazirgi tańda úlken sahnalardyń sańlaǵyna aınalyp, halyqtyń júreginen oryn alǵan. Ramazan Stamǵazıev, Sholpan Darjanova, Ardaq Balajanova, Saıat Medeýov, Ońal Azamatova syndy elimizge tanymal óner maıtalmandary qazylyq etken bul konkýrsta almatylyq Danııar Rahymbaevtyń baǵy janyp, bas júldeni jeńip aldy. Sóıtip, ol Kenen ata urpaqtary atynan tigilgen temir tulpardy jeńimpazdyń qanjyǵasyna baılady. Al taǵy bir Jetisý dástúrli án mektebiniń ókili Qaıratbek Bektursyn júldeli birinshi (700 myń teńge) orynǵa laıyq dep tabylsa, Ońtústik Qazaqstan oblysynan kelgen Qurbanáli Muhammed ekinshi oryn (500 myń) bıiginen kórindi. Elordalyq Aıdos Ońǵarbaı úshinshi oryndy (300 myń) jeńip aldy. Tórtken Kenenqyzy atyndaǵy arnaıy syılyqty almatylyq jas ánshi Aıdana Asanbaı ıelense, basqa da óne­rimen erekshe kózge túsken úsh qatysýshyǵa yntalandyrý júl­desi berildi. Árıne, jambyldyq aǵaıyn­­dardyń qazaq eliniń maq­ta­nyshy bolyp kele jatqan per­zent­tiń esimin ardaqtap, ul­ty­myzǵa qal­dyrǵan ulaǵatyn ulyqtap jatqany ónerimizge, tarı­hymyzǵa jasalǵan qurmet ekeni anyq. Endeshe, keń dalanyń boztorǵaıy atanǵan Kenen Ázir­baev atyndaǵy án konkýrsy áli talaı talanttyń tusaýyn kesip, Áýlıeata tórin án-jyrǵa bóleı beretini sózsiz. Oralhan DÁÝIT, «Egemen Qazaqstan» TARAZ Sýretti túsirgen Aqádil RYSMAHAN