Qallekı teatrynyń qıly tarıhy

(Q.Qýanyshbaev atyndaǵy mýzykalyq drama teatryna 25 jyl tolýyna oraı) Aldan Smaıyl, Memlekettik syılyqtyń laýreaty, jazýshy 1990 jyldyń 10 mamyrynda Selınograd qalasynda «Til jáne mádenıet» atty oblystyq qazaq qoǵamy quryldy da men sonyń tóraǵasy bolyp saılandym. Qoǵamnyń qurylýyna uıytqy bolǵan azamattarmen, atap aıtqanda, oblystyq partııa komıteti men aýyl sharýashylyǵy basqarmasynyń jaýapty qyzmetkerleri Jeńis Káribaev, Qanat Qalıevpen keńesip, negizgi mindet-maqsatymyzdy aıqyndadyq. Qala men oblystyń tarıhı ataýyn qaıtarý, qazaq mektepteri men balabaqshalaryn kóbeıtý, ulttyq drama teatryn ashý sekildi birneshe iri sharalar belgilendi. Qoǵamnyń tóraǵasy retinde oblys basshysyna kireıin, maqsat-múddemizdi aıtaıyn dep oıladym. Alǵa qoıǵan mindetterdiń sheshýi, túptep kelgende, túgeldeı sonyń yqylas-nıetine táýeldi bolǵan soń, erterek keńesken jón. Umytpasam, mamyrdyń 20-synda obkomnyń birinshi hatshysy Andreı Georgıevıch Braýn ótinishim boıynsha qabyldady. Atshaptyrym kabınettiń tórindegi ústelde kóıleksheń otyr eken. Ornynan turǵan joq, sálemime basyn ızedi de: – Aıta berińiz, – dedi. Qoǵam qurylǵanyn, el jaǵalaı qoldaǵanyn, halyqtyń talap-tilegi boıynsha osyndaı da osyndaı sharalardy qolǵa almaq bolyp, soǵan qam jasap jatqanymyzdy aıttym. – Keshirersiz, – dedi ol. – Bularyńyzdyń bári búginniń emes, keleshektiń isi. Qala men oblystyń tarıhı ataýyn qaıtarý jónindegi máseleni alyp qaraıyq. Jaraıdy, ádildik ornasyn, meniń qarsylyǵym joq. Biraq óńir turǵyndarynyń basym kópshiligi bul usynysty qoldamaıdy. «Selına» degen sóz tyń ıgerýshiler úshin qymbat sóz. Kerek deseńiz, qasıetti sóz. Al teatrǵa kelsek, ony ashýǵa tarıhı deımiz be, álde mádenı-rýhanı deımiz be, naqty ári mándi sebep kerek. – Ondaı sebep bar, – dedim. Qala men oblysta alǵashqy qazaq drama úıirmeleri men tuńǵysh qazaq teatry qashan ashylǵanyn, qandaı sebeppen qaı kezde jabylǵanyn keńinen áńgimelep berdim. Anyǵynda bul da bir qalyń tarıh. Taratyp aıtsam, Aqmola qalasynda qazaq drama úıirmesi 1913 jyly qurylǵan. Ony uıymdastyrǵan – Abdolla Asylbekov, alǵashqy qazaq pýblısısteriniń biri. Bizge jetken derekter boıynsha úıirme uzaq jumys istemegen, Abdolla Torǵaıda bastalǵan ult-azattyq kóterilisine qatysýǵa attanady da taraıdy. О́ńirdegi teatr óneriniń budan keıingi tarıhy Aqmola qalasymen tikeleı baılanysty. Shahardyń ótkenine qanyq el Sáken Seıfýllınniń osynda «1917 jyldyń sáýirinde qoǵamdyq-saıası jáne mádenı maqsat kózdegen «Jas qazaq» uıymyn qurǵanyn jaqsy biledi. Bul tolysyp kele jatqan talantty aqynnyń Sherýbaı-Nuranyń boıyndaǵy Buǵyly mektebin ashyp, sonda bir jyl sabaq bergen soń, Aqmolaǵa qonys aýdarǵan kezi edi. Júrektegi jastyq jalyn, qanynda bar qaıratkerlik qasıet tynym taptyrsyn ba, qala ómirine erekshe jigermen belsene aralasady. Qazaq jastaryn tóńiregine toptastyryp, rýhanı azattyq, el men jer erkindigi jaıly aıta bastaıdy. Sol ekpinmen «Baqyt jolyna» dramasyn jazady. Mine osy pesany «Jas qazaqtyń» músheleri 1918 jyly 1 mamyr merekesinde qoıǵan. Eldiń sahna ónerine degen osynsha qushtarlyǵy aqyry jemisin berdi. 1919 jyly Aqmolada oblystyq orys-qazaq teatry ashyldy. Buǵan osy ýaqyt aralyǵynda «Tirshilik» gazetin shyǵaryp úlgergen Sákenniń ózi de, jurtty dúr silkindirgen alǵashqy dramasy da aıryqsha yqpal etken edi. Úshinshi jeltoqsanda shymyldyǵyn ashqan osy alǵashqy resmı teatrdyń turaqty sahnasy bolǵan joq. Ár jerge kóship-qonyp júrdi. 1923 jyly ǵana Halyq úıi dep atalǵan, mýzeı t.b. mádenı oshaqtar shoǵyrlanǵan ǵımaratqa ornyqty. Arada jeti jyl ótkende bul ǵımarat órtenedi. Osydan soń teatr da jumysyn toqtatqan. Al halyqty qıly zaman-alapat soǵys kútip tur edi. Er-azamat túgel maıdanǵa attandy. Teatr akterleriniń kóbi birge ketti. Oıyn-saýyqty osylaı umytyp, kóńili kúpti bolǵan el 1942 jyly jaý qolynda qalǵan Voroshılovgradtan kóship kelgen teatrdyń qoıylymdaryna bara qoımady ma, álde qala qarjylandyrmady ma, turaqtamaı Mahachkalaǵa ketedi. Kelesi 1943 jyly oblys basshylyǵy kútpegen jerden burynǵy orys-qazaq teatryn qaıta ashady. Qolaıly úı de tabylady. Tóńkeriske deıin qyzdar semınarııasy bolǵan ǵımarat bıiktetilip qaıta salynady da teatrǵa basy bútin beriledi. Ýaqyt zymyrap ótip jatty. Qyrǵyn soǵys ta jeńispen aıaqtaldy. El etek-jeńin jınap, beıbit ómirdiń shýaǵyna bólene bastady. Er-azamaty maıdannan esen-saý oralǵan shańyraqtar shalqar teńizdeı shalqysa, qara qaǵaz alǵan qam kóńil oshaqtar eldiń amandyǵyn dátke qýat etti. Án alańsyz aıtylyp, kúı kúrsinissiz shertilip, teatr da jańa jaıdary kezeńge beıimdelip jatqan-dy. Kútpegen jerden qazaq tobyn jabý týraly qaýly qabyldanady. Sebebi – ol ózin ózi qarjylyq jaǵynan aqtamaǵan kórinedi. Shyndyǵynda bul qurǵaq syltaý bolatyn. Bıýdjetten qarjy bólinbeı tek ózi tapqan aqshamen kún kórgen teatr bolǵan emes, áli kúnge joq. Kommýnıstik rejım soǵysta jeńiske jetken soń soǵan deıin qylyshtyń júzimen júrgizilgen násildik alalaý saıasatyn qaıta tiriltken-di. Ult tili, ulttyq mádenıet pen tarıhqa myltyqsyz maıdan ashylǵan. О́ńirdegi qazaq sahna óneri uzaq ýaqyt bir turyp, bir súrinip aqyry quryp tynsa, orys teatry dáýirlep kele jatqan-dy. Sol 1955 jyly oǵan proletarıat jazýshylarynyń sardary Maksım Gorkıı esimi berilip, qazirgi ǵımaratqa birjola ornyqty. 1909 jyly Aqmola ýezi qurylyp, qala basqarmasynyń bastyǵy iri kásipker S.Kýbrın semınarııaǵa arnap saldyrǵan bul úı teatrǵa laıyqtalyp kúrdeli jóndeýden ótkizildi, Máskeý men basqa da qalalardan sahna sheberleri shaqyryldy, barlyq kerek-jaraq tabyldy. Qazaq teatry, mine osyndaı shyrǵalańdy bastan keshirgen-di. – Túsinikti, – dedi Andreı Georgıevıch, – aqsha tappady degen syltaýmen qasaqana jabylǵan qazaq teatryn qaıta ashý kerek. Solaı ma? – Iá. Dál solaı. – Negizinde bul máselemen oblystyq atqarý komıteti aınalysýǵa tıis. Sondaǵylarǵa keńes túrinde aıtaıyn. Zerttesin, kesip-pishsin. Kóńil kónshitpeıtin áńgime osymen bitti. Erteńine qoǵam basqarmasynyń múshelerin jaınadym. Obkomnyń eki hatshysynda bolǵan áńgimeni talqylap, Andreı Georgıevıchke baratyn aqsaqaldardyń tizimin jasadyq ta olarmen sol jerde habarlastyq. Biri kelisti, biri syltaýratty. Irikteı kele, qoǵamdyq uıymdardyń jetekshileri, oblystyq «Kommýnızm nury» gazetiniń bas redaktory, aǵa býyn ǵalymdar, «Til jáne mádenıet» qoǵamynyń basshylary bar top quryldy. Arada aptadan astam ýaqyt ótti. Obkomda kúnde jıyn, kúnde keńes. Sóıtip júrgende respýblıkalyq qoǵam qurylady, uıymdastyrý jıyny ótedi. Oǵan oblystardan ókilder qatysady dep Almatyǵa shaqyrtty. Jasaqtaǵan tobymyzdy Braýn men sol jaqta júrgende qabyldapty. «Oblystyq atqarý komıtetine buryn da aıtqanmyn, taǵy da aıtamyn» – dep qaıtarǵan. Osydan keıin keshikpeı Braýnǵa barǵan topty atqarý komıteti tóraǵasynyń orynbasary Raýshan Qanapııanova shaqyrdy. Jaqsylyq shyǵar dep jelip jettik. – Qazirgi jaǵdaıdy bilesizder, – dep bastady ol áńgimeni. – Qıyn kúnderdi bastan keshirip jatyrmyz. Osyndaı kezde teatr ashý aýyrǵa soǵatyn túri bar. Odan da respýblıkadaǵy qazaq teatrlaryn jıi shaqyryp turaıyq. Basqa da ulttyq óner oshaqtary jetkilikti, olar da keledi. – Joq, – dedik japatarmaǵaı. – Bizge tól teatr kerek. Eger máseleni ózderiń sheshpeıtin bolsańdar, Almatyǵa baramyz. Bizde basqa amal qalǵan joq. Obkomnyń birinshi hatshysy naqty tapsyrma bermegeni osydan belgili boldy. Ne isteımiz, oǵan taǵy da suranamyz ba dep júrgende Qaısar Omarov shaqyrdy. Álgi áńgimeni Andreı Georgıevıch estigenin, oılana kele Qaırıden Káribaevqa qazaq qoǵamynyń usynysyn qoldaıtynyn aıtqanyn jetkizdi. – Teatrdyń endigi taǵdyry sonyń qolynda, – dedi. Osy tusta oblystyq atqarý komıtetiniń tóraǵasy bolǵan Qaırıden Káribaev Aqmola óńiriniń azamaty edi. Buǵan deıin Atbasar, Teńiz sekildi iri aýdandardy basqarǵan qazaqnamaıy adam. Durys sheshim qabyldar jáne kópke sozbas dedik. Anyǵynda solaı boldy da. 1990 jylǵy 28-shildede oblystyq atqarý komıtetiniń oblystyq qazaq mýzykaly-drama teatryn qurý týraly sheshimi shyqty. Sol shaqta oblystyq atqarý komıtetinde kadrlyq aýys-túıis te boldy. Raýshan Qanapııanova Máskeýge oqýǵa ketip, ornyna Saılaý Baıbolov keldi. Bul azamatty birazdan biletinmin. Ulanǵaıyr qazaq dalasynyń shejireli óńirleriniń biri Ereımentaýda týyp ósken. Aımaqtyń tarıhynan mol habary bar, basshylyq qyzmette ysylǵan ultjandy adam. Ol qajet kezimizde shaqyryp júrip, teatrdyń barlyq sharýasyn yń-shyńsyz tyndyryp jatty. Al jumys kóp edi. О́ner shańyraǵyna úı kerek, qural-jabdyq kerek, basshy kerek... Sol kúnderi Saılaýǵa Jambylbek esimdi teatr mamany shyǵyp, ózin bas rejısserlikke usynypty. Umytpasam qostanaılyq-aý deımin. Men bul orynǵa Qaraǵandydaǵy Sáken Seıfýllın atyndaǵy oblystyq drama teatrynyń bas rejısseri Jaqyp Omarov laıyq dedim. Ol oılana kele kelisti. Bul tańdaýdyń ózindik sebebi bar edi. Qaraǵandy men Aqmolanyń arasy jaqyn. Jaqyp akterlerin ertip jyl saıyn keletin. Teatry joq qala qazaǵy úshin olardyń ár sapary mereke. Qoıylymdaryna halyq atkópir jınalady. Birde Aqan seri men Aqtoqtynyń, birde Shoqannyń, endi birde Záýreshtiń taǵdyryna kúıip-janady. Mine, osylaı kórshi shahar teatryna baýyr basqan edik. Ramazan, Serdesh, Qaırat, Shámil, Keńes sekildi akterlerdiń týma talant ekeni kórinip turatyn. Aldyńǵy úsheýi ánge de júırik. Shyndyǵyn aıtqanda Jaqypqa solar úshin de toqtaǵam. Saılaýdyń kelisimin alǵan soń Qaraǵandyǵa habarlastym. Sáken Seıfýllın atyndaǵy oblystyq drama teatry bas rejısseriniń qabyldaý bólmesine qońyraý shalǵam. – Jaqań búginde bizde jumys istemeıdi, – dedi telefon tutqasyn kótergen áıel. – Qyzmetin aýystyrǵan ba? – Iá. – Qazir qaıda? – Almatydaǵy Áýezov atyndaǵy teatrda. Ol jaq Shymkentke siltedi. Shymkenttiń teatryndaǵylar onyń jumysta udaıy otyra bermeıtinin, repetısııasy bolsa ǵana keletinin aıtty. Telefonyn surap edim, jeke kabıneti joq dedi. Sodan ózimniń meken-jaıymdy aıtyp, sálemimdi jetkizýdi ótindim. Jaqyp erteńine habarlasty. Aqmolada teatr ashylǵanyn estigende: – Men tez jeteıin, – dedi. – Kelesiz, eger bizdiń bir shartymyzdy oryndasańyz, – dedim. – Qandaı? – Qaraǵandy teatrynyń mańdaıaldy akterlerin alyp kelesiz. – Ol jaqtan ketip edim... Sóıleseıin. Arada úsh kún ótkende taǵy da qońyraýlatty. – Men Selınogradtyń temirjol vokzalynda turmyn. Jumys orynyń qaı jerde? – dedi. – Taba almassyz, ózim baraıyn, – dedim tań qalyp. Ol dál osylaı eskertýsiz jetip keledi dep oılaǵan joq edim. Sol kúni úıde keń otyryp sóılestik. Qaraǵandydan nege ketkenin suraǵan joqpyn, ózi aıtpady. Áńgimeniń uzyna boıynda osy saparynda Aqmolaǵa ornyǵatyndyǵyna senip kelgenin ańǵartýmen boldy. Oblys pen qala basshylaryna jolyqtyrýymdy ótindi. Men álgi shartty taǵy da esine saldym. – Qaraǵandyǵa baryńyz, Ramazandarmen sóılesińiz, bizge kelýge kóndirińiz, – dedim. Erteńine sol jaqqa júrip ketti de, arada eki kún salyp oraldy. – Shartyń oryndalady, aıtqan akterleriń túgel keledi, – dedi senimmen. Ýáde – qudaı sózi, aıtqanymyzda turdyq, teatrdyń bas rejısseri bolyp taǵaıyndaldy. Iske qyzý kiristi. Saılaý Baıbolov arqyly sharýasyn sátti tyndyryp jatty. Qalanyń orta tusyndaǵy erterekte salynǵan eki ǵımarattyń biri jataqhana, ekinshisi sheberhana túrinde berildi. Osydan keıin Qaraǵandydaǵy akterler de kele bastady. Olarǵa ýaqyt óte kele 15 páter berildi. Jaqyp tórt bólmeli úıge kirdi. Kóńili osylaı jaılanǵan Jaqyp Mádenıet mınıstrligi Selınograd oblystyq atqarý komıtetiniń ony bas rejısser etip taǵaıyndaý jónindegi sheshimin bekitýi kerek bolyp, Almatyǵa ketken-di. Úıge kelip keshki tamaq iship otyrǵanda telefon shyryldady. Qońyraýlatyp turǵan sol eken. – Aldan, – dedi abyrjyp. – Mınıstrliktiń kollegııasynan óte almadym. Qoldaý surap barǵan adamdarymnan qaıran bolmady. Ne isteımiz? Men ne isteı alýshy edim, mınıstrlikte tamyr-tanysym joq. Ony basqaryp otyrǵan Qanat Saýdabaev ómirimde kórmegen adamym. Orynbasarlarynyń kim ekenin de bilmeımin. Jaqypqa sony aıtyp edim, sharyldap qoıa berdi. – Qaıtken kúnde de bir amalyn tabýymyz kerek. Braýnǵa aıtqyzsań, mınıstrlik ıliger edi, – dep qolaısyz qolqa saldy. Obkomnyń birinshi hatshysyna mundaı ótinish aıtý ábestik. – Oǵan bara almaımyn, – dedim. – Sonda meniń dalada qalǵanym ba? – dep kúıindi Jaqyp. – Almatydaǵy birge oqyǵan jigittermen sóıleseıin, sońyra habarlasyńyz, – dep zorǵa toqtattym. Birazdan soń aqyn Nurlan Orazalınge telefon soqtym. Qazaq memlekettik ýnıversıtetiniń fılologııa fakýltetin birge bitirgenbiz. Bes jyl jubymyz jazylǵan joq. Saǵat Áshimbaev, Áshirbek Kópishev, Saılaý Jumabekov, Ádilbek Taýasarov bárimiz tonnyń ishki baýyndaı bite qaınasyp ketip edik. Nurlan úıinde eken. – Jaıshylyq pa, – dedi, – tún ishinde qońyraýlatyp jatsyń ǵoı. Jaqyptyń habarlasqanyn, Mádenıet mınıstrliginiń kollegııasynan ótpeı qalǵanyn aıttym. – Sen bylaı iste, – dedi Nurlan. – Jaqyp Almatyda aıaldaı tursyn. Men mán-jaıdy bileıin. Aq ter, kók ter bolyp teatr ashyp jatyrsyńdar ǵoı, qolymnan kelgenin jasaımyn. Tek oǵan menimen sóıleskenińdi, bolǵan áńgimeni aıtpa. Habaryn ózim beremin. Arada úsh kúndeı ýaqyt ótti. Jaqyp jıi qońyraýlatady. «Tosa turyńyz» – deımin. Sóıtip júrgende Nurlan da habarlasty-aý. – Máselesin sheshtim. Kollegııa músheleriniń betin beri qarattym, – dedi. Budan ózge sóz qozǵaǵan joq. Mınıstrlik nege qyryn qaraǵanyn aıtpady. «Ońaıǵa túspedi» – dedi de qoıdy. – Rahmet! – dedim. – Talaı tabaldyryqty tozdyrǵan shyǵarsyń. Alla razy bolsyn! * * * Jaqyp qalaǵa kelgen soń habarlasqan joq, ózim izdedim. – Teatrǵa Oktıabr kınoteatryn alyńdar dep jatyr. Birge baryp kóreıik, – dedim. Sol jerde kezdestik. Almaty sapary jaıly lám-mım demedi. Oblystyq, qalalyq atqarý komıtetteriniń ókilderi, «Til jáne mádenıet» qoǵamynyń basqarma músheleri Qanat Qalıev pen Jeńis Káribaevtardy tostyq ta, olar kelgen soń ishke kirdik. Salynǵanyna otyz-qyryq jyldan asqan ǵımarat tozypty. Kórermender zalynyń edeni syqyr-syqyr etedi. Oryndyqtar da eskirgen. Sahnanyń jaǵdaıy da osyndaı. Qyzmet bólmeleri qarańǵy ári salqyn. Jaqyp uzaq aralap: – Kúrdeli jóndeýden ótkizse, jarap qalar, – dedi. – Muny bastan-aıaq jóndeýge qarjy tabylǵansha, qurylys jumystary bitkenshe qaı zaman?! – dedi Jeńis. – Basqa ne bar, joǵarǵy jaqpen áli de aqyldasaıyq. Bárimiz osyǵan toqtap Saılaý Baıbolovqa keldik. – Ortalyqtaǵy teatrǵa laıyq úı osy ǵana, – dedi ol. – Yńǵaıy keletin taǵy bir ǵımarat bar, «Sholpan» kınoteatry, ol shet jaqta. – Temirjolshylar saraıy she? – dedi Qanat. – Ol da tozǵan, ári ortalyqtan alys, – dep Jeńis qarsy boldy. Oblystyq atqarý komıtetiniń qazaq teatryn ashý jónindegi sheshimi shyqqannan keıin qoǵam basqarmasynyń osy jeńisimizge arnalǵan otyrysynda oǵan qaı úı qolaıly degen sóz qozǵalyp, kókeıge bir oı uıalap edi: Áli kúnge ishimde júrgen. Estigen ol: «Mynanyń deni durys pa?!» – deı me dep tartyna bergem! Sony osy jerde aıtýǵa bekindim. Qolynda bıligi de, yqpaly da bar komıtet tóraǵasynyń orynbasary ne deıdi eken, kóreıin. – «Oktıabr», «Sholpan», Temirjolshylar saraıy dep basty qatyrmaıyq. Teatrǵa qalanyń qaq ortasyndaǵy qalalyq partııa komıtetiniń úıin alyp bereıik. Bári jalt qarady. – Al kerek bolsa, – dedi Saılaý. – Jyǵylsań nardan jyǵyl. Durys, – dedi Qanat. – Osy oı kókeıge qonǵannan keıin sonda baryp arnaıy qaradym. Eki júzden astam adamdyq akt zaly, onyń ortan qol sahnasy bar, qyzmet kabınetteri jetkilikti. Eń bastysy jańa, syńǵyrlap tur, – dedim. – Ony men de bilemin, – dedi Saılaý. – Qalalyq partııa komıtetin ornynan qalaı qozǵaısyzdar? – Bul ǵımarat áýelde qalalyq halyqtyń baqylaý komıtetine arnalyp salynǵan. Partııa komıteti sony kóshirip, jiberip kirgen bolatyn. Oǵan deıin qazirgi aýyl sharýashylyǵy basqarmasynyń ǵımaratynda otyrdy. Sonda qaıta barsyn, – dedim. Osy kúnderge búgingi shaý tartqan kezdiń kózimen qarasam, jalyndap janyp júrippiz ǵoı. Bolmasty boldyryppyz, tynbasty tyndyryppyz. Aqyry bizdiń talabymyz qanaǵattandyryldy. Biraq ońaıǵa soqqan joq. Qalalyq partııa komıtetiniń sol tustaǵy birinshi hatshysy Osıpenko: – Selınogradta on jeti myń kommýnıst bar. Solardy ereýilge shyǵarsam da keńseni bosatpaımyn! – dep tiresip baqty. Oǵan qazaqqa júregi jibimeıtin, áýelden qany qas ásire kommýnıster julqyna qosyldy. Gorkıı atyndaǵy orys drama teatryna kiriptar etpek boldy. «Sonda barsyn. Anda-sanda bir spektakl qoısa jetip jatyr» – dep shýlady. Biraq oıana bastaǵan eldiń aldynda aqyry tize búkti. Sol shaqta han saraıyndaı kórinetin, shahardyń kindik tusyndaǵy jańa ǵımaratqa qazaq teatry saltanatpen kirdi. * * * Oryndalǵan ulttyq murattyń qýanyshy sheksiz ǵoı, shalqyp júrdik. Teatr ujymy da iske aıryqsha qulshynyspen kiristi. Attaı qalap alǵan akterlerimiz Ramazan, Serdesh, Qaırat, Shámil jáne basqalary Jastar aýdany jaqtan jaıly páter alyp, qustaı ushyp júrdi. El alǵashqy spektaklge asyqty. Aıańdap ol kún de jetti. 1991 jylǵy 15 qarashada teatr shymyldyǵyn Ǵabıt Músirepovtiń «Aqan seri – Aqtoqty» dramasymen ashty. Bul kúnderi «Til jáne mádenıet» qoǵamy taǵy bir asa mańyzdy sharamen qyzý aınalysyp jatqan. Aqmola qalasy men oblystyń tarıhı atyn qaıtarý úshin halyqtan qol jınap, kóbine aýdandarda júrdik. Bir jaǵy Pavlodarmen shektesetin Sileti, Ereımen, ekinshi qıyry Qostanaımen qaptaldas Atbasar, soltústigi Kókshemen qonystas Bulandy, aralap shyǵý ońaı emes. Osylaı at ústinde júrgende arada baqandaı eki jyldyń ótip ketkenin ańǵarmappyz. Qala men óńirdiń baıyrǵy ataýy qaıtqan 1993 jyly Almatydan Mádenıet mınıstrliginiń orynbasary Áshirbek Syǵaı keldi. «Teatrda otyr, eldi jınap jatyr. Sizdi de shaqyrdy» degen soń bardyq. Aqmola oblysy ákiminiń orynbasary Svetlana Jalmaǵanbetova da sonda eken. Qaladaǵy zııaly qaýym ókilderi de júr. Shaqyrylǵandardyń bas-aıaǵy jınalǵan soń kórermender zalyna baryp jaıǵastyq. Áshirbek qyzmetin, Aqmolaǵa qandaı ótinish-tapsyrmamen kelgenin aıtty. Teatrǵa Qalıbek Qýanyshbaevtyń atyn berýdi usyndy. Biz Ilııas Esenberlınge toqtap júrgenimizdi aıttyq. Mınıstrliktiń rýhtardy osylaı teketirestirip qoıǵanyna renjidik. Isi qazaq qadirleıtin Qalekeńdi qalaı keýdeden ıteresiń?! Barsha halyq qurmetteıtin Ilekeńdi qalaı shettetesiń?! Alaıda, aıttym bitti degizetin bılik joq. Teatrǵa Qalybek Qýanyshbaevtyń esimi beriletin boldy, biraq bir shartpen. Kórnekti akterdiń 100 jyldyǵy qurmetine Jaqyp jáne beldi akterler marapattalýy kerek. Áshirbek solaı bolatyndyǵyna sendirdi. Solaı boldy da. Búginde osyndaı qıly tarıhy bar teatrǵa 25 jyl tolyp otyr. Zaman da, el de ózgerdi. Aqmola astanaǵa, teatr elordalyq sahna oshaǵyna aınaldy. Onyń endigi baıanyn keıingi tolqyn jazyp jatyr.