Azǵyr polıgony aýyl sharýashylyǵyna beriledi

Atyraý oblysyndaǵy Azǵyr polıgonynyń 750 myń gektar jeri jergilikti sharýalarǵa beriledi, dep habarlaıdy QazAqparat. Azǵyr ıadrolyq polıgonyn áskerıler «Galıt» dep te ataıdy. Ol KSRO Qorǵanys mınıstrligi men Atom ónerkásibi mınıstrligi jáne Búkilodaqtyq eksperımenttik fızıka ǵylymı-zertteýler ınstıtýty mamandarynyń basqarýymen ıadrolyq jarylystar synalǵan qupııa synaq aımaǵy. Polıgonnyń jalpy aýdany — 600 myń gektar. Onda 1966 jyldyń sáýir aıynan 1977 jyldyń qazanyna deıin 17 jerasty ıadrolyq jarylysy synalǵan. Azǵyr aımaǵynyń qazirgi jaǵdaıy týraly QR Parlament Senatynyń depýtaty, jerdi qaıtarý rásimine qazaqstandyq jáne reseılik áskerıler tobynyń quramynda qatysyp jatqan Sársenbaı Qurmanov aıtty: «Qazirgi ýaqytta bul aýmaq zerttelip jatyr. Topyraqtyń, aýanyń jáne sýdyń synamalary alyndy. Polıgon 20 jyldan beri qoldanylmaǵan, biraq qandaı da bir bólikteriniń qaýipsiz ekenine naqty kóz jetkizý qajet. Bıyl rásimder aıaqtalǵan soń, alqaptar jergilikti fermerlerge jalǵa beriledi. Olar óz sharýashylyqtaryn dóńgeletip, jeńildikpen nesıe alatyn bolady. Mundaı úlken aýmaqta munaıshylar da barlaý jumystaryn júrgize alady», — dedi.