Petropavlda 8 myń tekshe metr qar shyǵaryldy

Petropavlda qala kóshelerin tazalaý barysynda bir apta ishinde 8 myń tekshe metrden astam qar syrtqa shyǵaryldy, dep habarlaıdy QazAqparat. Qys bastalmaı jatyp, SQO-nyń ortalyǵyn qalyń qar basty. Bir táýlik ishinde bir aılyq normaǵa teń qar túsken. Aýa raıynyń aýytqýynan júrginshiler júretin jolda muz qatparlanyp qaldy. Qalanyń kommýnaldyq qyzmeti qar shyǵarýdy áli toqtatqan joq. Petropavl ákimdiginiń baspasóz qyzmeti habarlaǵanyndaı, qar jınaý keshke 21:00-de bastalady. «Qar shyǵarý jumystary 7 qarashada bastalǵan bolatyn. Búgingi ýaqytta 8 myń tekshe metr qar shyǵarylyp úlgerdi. Kún saıyn atalmysh jumystarǵa 50 arnaıy tehnıka jumyldyrylǵan», - dep habarlady baspasóz qyzmetinen. Bas merdiger - «SÝ 808» kompanııasy. Qosymsha 5 uıym - qosalqy merdiger. «SÝ 808», «Nord Joldary», «Kommýnstroıservıs», «Kommýnhoz-Petropavlovsk» bazasynda 3,5 myń tekshe metr tuzdy topyraq daıyndaldy. Osy aralyqta muztaıǵaqpen kúresý úshin 650 tekshe metr topyraq jolǵa shashyldy. Qazan aıynda SQO ákimi qysqy merzimge tehnıkanyń daıyndyǵyn bir pysyqtap shyqqan bolatyn. Ol kezde «Sý-808» JShS dırektory Vıacheslav Starýhın aımaq basshysyna tehnıka qysqy maýsymǵa tolyqtaı daıyn turǵanyn habarlaǵan. Degenmen qazirgi ýaqytta qys óz qaharyna minbeı jatyp, kommýnaldyq qyzmettiń qar tazalaýdaǵy sylbyr jumysyna qatysty syndar áleýmettik jelide qaptap ketti. Petropavldyqtar ásirese, trotýarlardaǵy muztaıǵaqqa qatysty kóp shaǵymdanýda. Keıbiri tipti qalada fleshmob uıymdastyryp, trotýarlarǵa topyraq shashýdy usynýda.