Qoǵamdy qundylyqtar biriktiredi

Astanadaǵy «Qazmedıa ortalyǵy» ǵımaratynda Táýelsizdiktiń  25 jyldyǵyna oraı, Qazaqstan halqy Assambleıasynyń qoldaýymen, «Qazaqstandyq biregeılik, etnosaralyq kelisim jáne qoǵamdaǵy til mádenıetiniń deńgeıin arttyrý» taqyrybynda «Máńgilik El» jalpyulttyq patrıottyq ıdeıasyn ilgeriletýge baǵyttalǵan dáris ótti. Oǵan Parlament depýtattary, QHA músheleri, qoǵam qaıratkerleri, saıasatkerler, ǵylymı jáne shyǵarmashylyq zııalylar, etnomádenı jáne jastar birlestikteriniń ókilderi, eriktiler qatysty. Sharany uıymdastyrýshylardyń aıtýynsha, dáristiń maqsaty – qoǵamdyq kelisim modeli men jalpyulttyq birliktiń biregeı tájirıbesin nasıhattaý. Osy oraıda, jıynǵa qatysýshylar qazaqstandyq patrıotızm arqyly etnosaralyq qatynastar men Qazaqstan halqynyń birligin odan ári nyǵaıtyp, tájirıbe almasýǵa baǵyttalǵan ózekti máselelerdi talqy tarazysyna saldy. Dáristiń ashylýynda sóz alǵan «Qazaqstan halqy Assambleıasynyń Qory» QQ dırektory Qurmanbek Qazanbasov: «Táýelsiz eldiń, jalpy táýelsiz adamnyń arman-maqsaty bolady. Ony oryndaý úshin árbir ýaqytyn josparlaıdy. Bizdiń elimizdiń saıası turǵyda bolsyn, ekonomıka jaǵynan bolsyn 25 jylda qol jetkizgen jetistikteri az emes. Qazir Táýelsiz Qazaqstannyń sımvolyna aınalǵan, árqashan da maqtanatyn Astanamyz bar», dedi. Sondaı-aq, bul dáristiń taqyryby teginnen-tegin tańdalyp alynbaǵanyn aıtty. «Jalpy, «Máńgilik El», onyń ishinde «máńgi» degen sózdiń túp-tórkinine tereń úńiler bolsaq, ol – jer, ol – Qazaqstan memleketiniń ataýy, ol – kók Týymyz, tilimiz, dilimiz, dástúrimiz. Al olardy qurmettep, máńgi saqtaıtyn bolsaq, jerimizdiń, elimizdiń damýyna úles qossaq, Qazaqstan eliniń de máńgi bolatynyna sóz joq», dedi Qurmanbek Jumaǵalıuly. Al «Astana halyqaralyq qarjy ortalyǵy ákimshiliginiń» AQ basqarýshy dırektory Saıasat Nurbek: «Biz 3 jyl buryn úlken zertteý jumystaryn júrgizdik. Men ol kezde «Nur Otan» partııasy janyndaǵy qoǵamdyq «Saıasat» ınstıtýtynyń dırektory bolǵan edim. Sol kezde biz Qazaqstan qoǵamynyń qundylyqtaryn jete zerttep, zerdeleı bastadyq», deı kele, osydan 10-15 jyl buryn elderdiń damýy, ekonomıkalyq órkendeýi, modernızasııa qabilettiligi dástúrli uǵymdarmen túsindiriletinin, biraq, keıin tereńdetilgen zertteýlerdiń arqasynda bul uǵymdardyń aýysqanyn, olardyń ornyna basqa túsinikter paıda bolǵanyn, qazirgi tańda ınstıtýsıonaldy ekonomıkada úlken tóńkeris, úlken ózgeris bolyp jatqanyn jetkizdi. Sonymen qatar, ol kez kelgen memleket ekonomıkasynyń damýyna tek resmı ınstıtýttar emes, qundylyqtar da tikeleı áser etetinin aıtty. Bul kúni is-sharaǵa qatysqan azamattar sonymen qatar, «Ulttar arasyndaǵy kelisim – Táýelsiz Qazaqstannyń eń basty jetistigi», «Jyraýlyq – patrıottyqqa tárbıeleý quraly», «Qazaqstandyq qoǵamdyq kelisim modeli – Qazaqstan halqy Assambleıasy aıasynda azamattyq pen patrıotızmdi qalyptastyrý» degen taqyryptar boıynsha sóz sóıledi. Láıla EDILQYZY, «Egemen Qazaqstan»