Reseıde Aman Tóleevtiń taǵdyry sheshilip jatyr

14 qarasha kúni Reseıdiń tergeý komıteti Kemer oblysynyń gýbernatory Aman Tóleevtiń orynbasarlary Alekseı Ivanov pen Aleksanr Danılchenkoǵa, sonymen qatar birneshe qyzmetkerlerine qarsy qylmystyq is qozǵady. Olar 1 mıllıard rýblge baǵalanyp otyrǵan «Razrez «Inskıı» kásipornynyń aksııalaryn bopsalady dep aıyptalyp otyr. Biraq gýbernator "Eki orynbasarym ustaldy. Danılchenko, Ivanov pen Troıskaıa eshkimge kerek emes. Olarǵa keregi menmin. Men buny 2 jyldan beri sezip júrmin. Qatty talas júrip jatyr», dedi. Sonymen qatar ol óziniń orynbasarlaryna jala jabylǵandyqtan,  olardy qyzmetterinen bosatpaıtynyn aıtty. Bul iske ol kýáger retinde qatysýda. Biraq sarapshylar Tóleev te ornynan ketýi múmkin dep boljap otyr. Aman Tóleev – Reseıde bılikte eń uzaq otyrǵan gýbernator. 1997 jáne 2001 jyldary ol ashyq saılaýda jeńiske jetse, odan keıingi merzimderge ony memleket basshysy taǵaıyndaǵan bolatyn. Tóleev 1991, 1996, 2000 jyldary 3 ret prezıdenttikke de úmitker boldy. Birneshe ret partııa aýystyrdy. 2015 jyly gýbernatorlyq merzimi bitken kezde sarapshylar ony zeınetke shyǵady dep boljady. Alaıda, Aman Tóleev taǵy da saılaýǵa túsip, 96,7 paıyz daýyspen jeńiske jetti. Endi myna oqıǵadan keıin kóptegen sarapshylar ol gýbernatorlyq qyzmetti bosatady degen senimde. Al «Saıası sarapshylar tobynyń» jetekshisi Konstantın Kalachevtyń aıtýynsha, shahtaǵa qatysty daý aımaq basshysyn aýystyrýǵa esh áser etpeıdi. «Tóleevti federaldy basshylyq óńirde turaqtylyq pen tártip ornatqany úshin baǵalaıdy» dedi ol. Sarapshylar bul qylmystyq is oblystaǵy yqpaldy toptardyń arasyndaǵy Tóleev murasy úshin kúres bolýy múmkin ekenin de joqqa shyǵarmaıdy.  "Tóleev - Kemer oblysynyń basshylyq sımvoly. Ol bolmasa, bul turaqtylyqty saqtap qalý qıyn", - deıdi Aleksandr Kynev. Sonymen qatar saıasattanýshynyń aıtýynsha, qazir búkil Reseı boıynsha jergilikti mınıstrler men vıse-gýbernatorlarǵa qatysty qylmystyq ister qozǵalyp jatyr. Osy rette Kynev "Kemer oblysynyń ýaqyty jetken bolar", dep boljady. Al Olga Kryshtanovskaıa "Qylmystyq iste gýbernator tek kýáger retinde qatysady. Biraq bul shý onyń ustanymdaryna áser etip, eń birinshiden, federaldy ortalyq atqaryp otyrǵan sybaılas jemqorlyqqa qarsy saıasat úshin Tóleev ornynan ketýi múmkin" deıdi. Onyń oıynsha, prezıdent Pýtın Tóleevke jaqsy kózqarasta bolǵandyqtan gýbernatordyń saıası taǵdyry týraly sheshim jaqyn arada qabyldanbaıdy.