Qoǵamdyq birlestikterge senim artylady

Ońtústikte úkimettik emes uıymdardyń VII Azamattyq forýmy ótti. El ishinde kúrmeýi sheshil­megen, mánisi tarqatylmaǵan máseleler kóp. Onyń barlyǵyna úkimettik qurylymdar aralasa almaıdy. Mundaıda úkimettik emes uıymdardyń múmkindigi úlken. Osy forýmǵa arnaıy qatysqan oblys ákimi Janseıit Túımebaev elimizdiń saıası jáne áleýmettik-ekonomıkalyq turǵydan damýynda belsendi qoǵamdyq uıymdar men jekelegen bastamashyl azamattardyń úlesi myqty ekendigin aıtty. – Elbasymyzdyń «100 naqty qadam» Ult josparyndaǵy halyq aldynda esep beretin memleketti qalyptastyrý maq­sa­tynda «Qoǵamdyq keńester týraly» Zań qa­byldanyp, respýblıkalyq, oblystyq, aýdandyq, qalalyq deńgeılerde qoǵamdyq keńester qurylǵan. Osyndaı uıym­dardyń quramyna qoǵamnyń túrli salasynyń múddesin bildiretin birlestikterdiń 80-ge jýyq jetekshileri engizilgen. Bul Ata zańymyzda kórsetilgen azamattyq qoǵamdy damytýǵa degen memlekettiń kezekti bir qadamy deýge bolady, – dedi J.Túımebaev. Oblys basshysy óz sózinde azamattyq qoǵam­dy damytý baǵytynda birtalaı usy­nys­taryn bildirdi. Áleýmettik jaǵynan qor­ǵalmaǵan adamdardyń toby bar. Ospadar bi­reýlerdiń tarapynan zorlyq-zombylyqqa túsken, qorlyq kórgen názik jandylar men jas balalardyń problemasy jıi aıtylady. Olardyń daýysy joǵaryǵa jete bermeıdi. Dinı ekstremızm men terrorızmge ıyǵyn berip, adasyp júrgen jastar taǵy bar. Din atyn jamylyp túrli jıhadqa shaqyryp júrgenderdiń aldy Aqtóbe oblysyndaǵy oqıǵada boı kórsetti. Ońtústik ondaı indetten aman dep qol qýsyryp qarap otyra berýge bolmaıdy. Memleket basshysynyń ózi úlken mán berip otyrǵan máselege úkimettik emes uıymdar barynsha mán berip, jalǵan nanymnyń jeteginde júrgenderdiń kózin ashýǵa, olardy el paıdasyna jumys jasaýǵa tartý kerek. Jastardy otansúıgishtik rýhta tárbıeleýde jattandy súrleýden shyǵyp, jańasha jumys joldaryn izdestirý, bir maqsat, bir múddege qyzmet jasaýǵa tárbıeleý kerek. Qoǵamdyq saıası-turaqtylyqty saqtap, memlekettiń alǵa qaraı damýyna tyń serpin jasaýǵa septesý qoǵamdyq uıymdardyń qolynan keledi. Forýmda sóz alǵandar áńgimesiniń arnasy osy baǵytta toǵysyp jatty. Úkimettik emes uıymdar úlken kúsh. Osyǵan baılanysty oblysta memlekettik áleýmettik tapsyrys boıynsha bastapqyda bir ǵana oblystyq basqarma jumys istese, búgingi kúnde úkimettik emes uıymdarmen aýdan, qala ákimdikterimen qatar, bes oblystyq basqarma qyzmet etip keledi. Forým sońynda belsendi úkimettik emes uıym músheleri marapattalyp, áleýmettik ıdeıa­lar men jobalar jármeńkesiniń jeńimpazdary laıyqty baǵasyn aldy. Baqtııar TAIJAN, «Egemen Qazaqstan» Ońtústik qazaqstan oblysy