Astanada jańa kitaptyń tusaýy kesiledi

19 qarashada Astana qalasynadaǵy Balalar kitaphanasynda belgili qalamger, jazýshy, Qazaqstan Jazýshylar odaǵynyń múshesi Janbolat Bashardyń «Qabir ústindegi zulmat» dep atalatyn jańa kitabynyń tusaýkeseri ótedi. Oǵan QR Memlekettik syılyǵynyń ıegeri, aqyn Nesipbek Aıtuly, Eýrazııa Ulttyq ýnıversıetiniń professory, belgili ǵalym Serik Negımov, Astana qalasy ákimdiginiń til basqarmasynyń tóraǵasy Tileýǵalı Qyshqashbaev, Halyqaralyq «Alash» ádebı syılyǵynyń ıegeri, aqyn Abzal Bóken, Mádenıet qaıratkeri, jazýshy Qaıyrbek Sadýaqasov, jazýshy, ádebıettanýshy, «Daryn» Memlekettik jastar syılyǵynyń ıegeri Aıgúl Kemelbaeva, Tólegen Aıbergenov atyndaǵy syılyqtyń ıegeri, aqyn Ilııas Muqaı jáne  basqa da qalamgerler men BAQ ókilderi qatysady. Janbolat Bashardyń sońǵy ýaqyttarda jazǵan «Qabir ústindegi zulmat» atty ádebı shyǵarmasynda, otyzynshy jyldary qazaq halqynyń basyna tóngen qýǵyn-súrgin men asharshylyq qurbandarynyń jantózgisiz azaby, zulmat jyldardaǵy halyqtyń qaıǵy-qasireti sýrettelgen. Shyǵarma ózegi - Qaraǵandy oblysynyń Aqtoǵaı aýdany aımaǵynda, el ishinde «ýyq kóterilisi» dep atalyp ketken Toqyraýyn kóterilisi. Bul týraly kezinde eshteńe jazylmady, aıtylmady. Avtor sol bir zulmat jyldardy shyǵarma ózegine aınaldyryp, eldiń eńsesin ezgen saıası ozbyrlyqqa qarsylyq jasaǵan Jabaıdyń Sádýaqasy syndy el azamattarynyń aqyryp atqa qonýyn, el basyna túsken ashtyq náýbetiniń jantózgisiz qasireti shynaıy sýrettegen. Sonymen birge, kitapqa jazýshynyń «Peri men Perishte, «Aıǵana», «Ańshynyń ajaly», «Úreı», «Soǵystan qalǵan syz» taǵy basqa búgingi kúnniń ómir órnegin qaýzaıtyn  jańa týyndylary engen.