Almatyda bir kúnde 75 kólik apaty boldy

Aýa raıynyń kúrt ózgerýine baılanysty Almaty polısııasy azamattardy jol ústinde asa muqııat bolýǵa shaqyrady, dep habarlaıdy qalalyq IID. «Biz barlyq júrgizýshiler men jaıaý júrginshilerdi jalpyǵa ortaq erejelerdi saqtaýǵa shaqyramyz. Qazirgi aýa raıynda bul asa mańyzdy,  ásirese júrgizýshiler qala joldarynda asa muqııat bolyp, kólik quralyn qys mezgiline keshiktirmeı daıyndaǵany jón. О́tken túnnen beri Almatyda 75 jol-kólik apaty tirkeldi, 17 adam túrli jaraqat aldy», - dep habarlady Almaty IID jergilikti polısııa qyzmetiniń basshysy, polısııa podpolkovnıgi Jasulan Baıkenov. Mekeme bul kúnderi qala aýmaǵynda jol qozǵalysy qaýipsizdigi aptalyǵy ótip jatqanyn eske saldy. Atap ótken jón, túnde Almatyda qar jaýyp, tańerteń qala joldaryndaǵy keptelis ulǵaıdy. Almaty ákimdiginiń resmı Instagram akkaýnty túnnen beri úzdiksiz júrip jatqan qar tazalaý jumystarynyń vıdeolaryn jarııalady. Kóktaıǵaqty boldyrmaý úshin joldarǵa hlorıd qumy sebilýde. Kúni keshe qala bıligi qalyń qar jaýady dep eskertken edi. Olar turǵyndarǵa aýa raıy boljamynan únemi habardar bolyp, jumysqa qoǵamdyq kólikpen barýǵa keńes berdi.