Qonys toılar kóbeıedi

Búginde eldiń basty máselesi  baspanaly bolý ǵoı. Sońǵy jyldary memleketimizdiń serpindi damyp, turǵyn úımen qamtý baǵdarlamalarynyń júzege asyrylýymen halqymyzdyń páterli bolýǵa degen senimi kúsheıdi. Elbasy qazaqstandyqtardy qoljetimdi baspanamen qamtamasyz etýdi basty mindet etip qoıǵany belgili. «Báıterek Development» AQ basqarýshy dırektory Asyljan Qurtaevtyń aıtýyna qaraǵanda, bul mekemege kredıttik jáne jalǵa beriletin turǵyn úıler salý baǵyty boıynsha 113 mlrd teńge qarajat bólinipti. Taǵy 67 mlrd teńge qoǵamǵa jergilikti atqarýshy organdar arqyly turǵyn úı nysandarynyń qurylysyn qarjylandyrý úshin jumsalady. Búgingi kúni «Báıterek Development» AQ Taraz qalasynda 395 páter salýǵa jeke qurylys salýshylarmen 5 ınves­tısııalyq shart jasasty. Sóıtip, 2016-2017 jyldary bul mekeme Jambyl oblysynda 22,5 myńnan astam sharshy metr turǵyn úılerdiń qurylysyn salýdy josparlap otyr. Qazir Taraz qalasynyń «Araı» turǵyn úı massıvinde alty kóp páterli turǵyn úıdiń biriniń qurylysy aıaqtalýda. Bul úıler osy qarasha aıynyń sońyna deıin paıdalanýǵa beriledi. Sondaı-aq, jeltoqsan aıynda taǵy 80 otbasy memlekettik baǵdarlama boı­yn­­sha salynǵan jańa páterlerge qo­nys­tanbaq. Al 2017 jyldyń birinshi jartyjyldyǵynda osy shaǵyn aýdanda taǵy 315 páterdiń qurylysyn aıaqtaý jos­parlanyp otyr. Árıne, osynaý jap-jańa baspanalarda eldiń qýanyshy, jańa páterge ıe bolǵan qanshama otbasynyń nemese qanshama jandardyń batasy, baqyty, alǵysy jatqany anyq. Endeshe, elimizde qonys toılar kóbeıe bergeı. Oralhan DÁÝIT, «Egemen Qazaqstan» Jambyl oblysy