Elbasynyń eńbegi qandaı qurmetke de laıyq

Teńgeniń mereıtoılyq banknotynda Elbasy Nursultan Nazarbaevtyń beınelenýin Qazaqstan azamattary qyzý qoldaýda. Biz Senat Tóraǵasynyń orynbasary Bektas BEKNAZAROVTYŃ oı-paıymyn jazyp alǵan edik. – Bektas Ábdihanuly, áýeli ulttyq valıýtamyzdyń qoǵam ómirindegi róli týraly aıtyp berseńiz? – Kez kelgen memlekettiń qalyptasýy men onyń damý tarıhy sol memlekettiń mindetti rámizderiniń biri bolyp tabylatyn ulttyq valıýtasy tarıhymen tyǵyz baılanysty ekeni belgili. Sondyqtan, biz elimizdiń 25 jyldyq táýelsizdik tarıhy týraly sóz qozǵaǵanda, onyń ulttyq valıýtasyna da toqtalyp ótetinimiz zańdylyq. Jýyrda ǵana biz elimizdiń ekonomıkalyq táýelsizdiginiń sımvoly – Ulttyq valıýtamyzdyń dúnıege kelgen kúnin atap óttik. Naryqtyq júıeni júzege asyra bastaǵan Qazaqstan úshin ótken ǵasyrdaǵy sol 1991-92 jyldar aqsha júıesiniń turaqsyzdyǵyn ábden bastan keshirgen qıyn jyldar boldy. Qazirgi jas býyn onyń bárin kitaptan oqyp bilse, bizder ony ózimiz bastan keshirdik. 1993 jyldyń qarasha aıynda óz teńgemizdiń aınalysqa shyǵarylýy bizdiń jas táýelsiz elimizdiń jylnamasyndaǵy eń mańyzdy oqıǵalardyń biri boldy. Men óz otbasym týraly aıtsam, zaıybym bank qyzmetkeri bolatyn. Aqsha aýysady, endi biz óz teńgemizdi paıdalanamyz dep júrgen sol kúnderi ol táýliktep jumysynan shyqpaıtyn. Tún ortasynda jumysynan kelgende, qunsyz qaǵazǵa aınalǵan «aǵash aqshanyń» esebin mıllıardtap sanaǵanyn aıtyp keletin. Al endi jap-jańa teńge banknottary qolymyzǵa tıgende, ony qalaı uqyptap ustaǵanymyz, óz aqshamyz úshin keýdemizdi qandaı maqtanysh kernegeni de esimde. – Tól teńgemizdi engizýdegi Elbasy N.Nazarbaevtyń eńbegi qandaı? Mereıtoılyq banknotqa Elbasy beınesiniń salynýyna qalaı qaraısyz? – Keńes ókimeti taraǵan soń kóp uzamaı ulttyq valıýtamyzdyń aınalysqa engizilýi Elbasymyzdyń strategııalyq kóregendigi ekendigi daýsyz. Teńge týraly suraqty Elbasy táýelsizdiktiń alǵashqy qadamdarymen qatar kóterip, kóptegen uıymdastyrý máseleleri sol alǵashqy kezeńde qupııa júrgizilgenin biz keıin bildik. Teńgeni jasaýdaǵy Tuńǵysh Prezıdentimizdiń eren eńbegin árqaısymyz, árıne, jaqsy bilemiz. Al endi búgin ózimiz kórip otyrǵan­daı, Memleket basshysy beınesiniń mereı­toılyq banknotqa basylyp shyǵarylýy – búkil halqymyzdyń Elbasyna degen erekshe qurmetiniń kórinisi dep bilemin. 25 jyldyq tarıhynda Nursultan Ábishuly Nazarbaevtyń basqarýymen bizdiń elimiz aldyna nebir joǵary dárejeli maqsat qoıǵan damyǵan memleketke aınaldy. Birlik pen kelisimniń arqasynda elimiz saıası turaqtylyqtyń tuǵyrynda, joǵary ekonomıkalyq jáne áleýmettik órleýge jetti. Osynyń bári ońaı boldy dep eshkim aıta almaıdy. Táýelsizdigimizdi endi jarııalaǵan jyldardaǵy eldiń basynan ótken tar jol – taıǵaq keshýler búkil Qazaqstan halqyna aýyr syn bolǵany aıan. Osy bir kúrdeli kezeńde barlyǵymyz el Prezıdentine sendik, onyń eldi barlyq qıyndyqtardan aman alyp shyǵa alatynyna kúmánimiz bolǵan joq. «Memleketti qutqarý úshin bir uly adamynyń bolǵany jetkilikti» degen oıshyl Volterdiń sózi bar. Osy aıtylǵan «uly adam» – bizdiń Elbasymyz Nursultan Nazarbaev boldy. Ekonomıkasy men qarjylyq jaǵdaıy eń myqty degen elderdiń ózi qazir ártúrli saladaǵy daǵdarystardy bastan keship jatyr. О́kinishke qaraı, mundaı jaǵdaı Qazaqstandy da aınalyp ótken joq. Biraq bizde bul jaǵdaıdan alyp óter «Ult jospary» bar, baǵytymyz anyq jáne aıqyn. Zamanynda ǵulama Konfýsıı «Alysyn boljaı almaǵan adamdy jaqyn qaterler kútip turady» degen eken. Elbasymyz bizdiń aldymyzǵa «Máńgilik El» bolý maqsatyn qoıdy, qazir búkil qazaqstandyqty osy maqsatqa qyzmet etýdi úılestirip jatyr. Alysyn boljaı bilý degen – osy! Endeshe, osy maqsatqa jeter eńbegimiz jemisti bolsyn. – Aıtqanyńyz kelsin! Áńgimelesken Jaqsybaı SAMRAT, «Egemen Qazaqstan»