Syr men symbattyń Núketaıy

M.Áýezov atyndaǵy Qazaq memlekettik akademııalyq drama teatrynda Qazaqstannyń halyq ártisi, «Parasat» ordeniniń ıegeri Núketaı Myshbaevanyń 80 jasqa tolý mereıtoıy atalyp ótti. Teatr óneriniń negizin qalaǵan maıtalmandardyń kózin kórip, tárbıesin alǵan, áıgili Asqar Toqpa­novtyń shákirti, sahnada sandaǵan obrazdar galereıasyn jasap, birneshe býyn kórermenniń súıikti aktrısasyna aınalǵan Núketaı Myshbaevanyń seksenniń seńgirine shyqqan toıyna mádenıet pen ádebıet, óner salasynyń qaı­rat­kerleri, teatr ujymy, kó­rer­men qaýym kóp jınaldy. Almaty oblysy Narynqol aýylynda dúnıege kelip, 1954 jyly Almatydaǵy Qurmanǵazy atyndaǵy konservatorııanyń akterlik bó­limine túsken jas Núketaı oqýdy bitirgen soń M.Áýe­zov atyndaǵy akademııalyq drama teatrynyń akterlik tobyna qabyldanǵan. Sodan bergi alpys jylǵa jýyq ýaqyt boıy teatr qara shańyraǵynda úzbeı eńbek etip, sahnanyń aýyr júgin seriktesterimen birge kóterip kele jatqan aktrısa búginde halyqtyń súıiktisi, qazaq óneriniń kórnekti tulǵasy bolyp otyr. Rejısser Ázirbaıjan Mám­betovtiń «Beý, qyzdar-aı!» spek­taklinde sátti shyqqan Aı­su­lý­dy alǵashqy róli retin­de som­daǵan Núketaı sol kezderi Áb­dilda Tájibaevtyń «Toı bolar­dasyndaǵy» Aıbala, «Kóńil­des­ter» dramasyndaǵy Roza, Qaltaı Mu­hamedjanovtyń «Quda­ǵı ke­lipti» komedııasyndaǵy aqkó­ńil de adal Marfýǵa sııaqty kome­dııalyq rólderdi sahnalaı júrip, osy janrdyń úlken sheberine aınaldy. Núketaı Myshbaevanyń dra­ma janryndaǵy alǵashqy kúr­deli eńbegi «Ana – Jer-ana» spek­taklindegi Álıman rólin som­daýy boldy. Aktrısanyń osy róline qatysty Shyńǵys Aıtmatov: «Nú­ke­taı Myshbaeva Álımandy meniń shyǵarmamdaǵydan da tereń oınady» dep joǵary baǵa bergen edi. Kúrdeli áleýmettik dramalarda ulttyq dúnıetanymy, qazaqy paıym-parasaty, rýhy myqty, kesek minezdi qazaq áıeline tán aıryqsha qasıetterdi asha bilgen Núketaı aktrısanyń jalpy teatr sahnasyndaǵy úlkendi-kishili seksenge jýyq róliniń barlyǵy da onyń júrek lúpili, óner izderi, ómirlik tájirıbesi men úlken rýhanı izdenisteriniń jemisi hám jeńisi. Negizgi shyǵarmashylyǵy sahna bolǵanymen, Núketaı Myshbaeva kıno men dýblıajdyń da maıtalman mamany. Kınodaǵy alǵashqy basty róli – «Qazaqfılm» kınostý­dııasynyń «Shyǵys joly» (1968 j.) kórkem fılmindegi jylqyshy áıel. Sondaı-aq, ol «Jazda jaý­ǵan qarda» (1965 j.) Hatsha, «Aǵam úshin qalyńdyqta» О́zgen, «Alpa­mys mektepke baradyda» meıirbıke, «Jambyl» (1996 j.) fılminde Jambyldyń anasy, «Tas­tandylarda» Sábıthan apa rólderinde kóringen. Sahna sańlaǵynyń mereıtoıyna oraı ótken keshke arnaıy kelgen Mádenıet jáne sport vıse-mınıstri Aqtoty Raıym­­qulova Elbasy Nursultan Nazarbaevtyń quttyqtaý hatyn oqyp berdi. Qazaqstan Jazýshylar odaǵynyń basqarma tóraǵasy Nurlan Ora­zalın Memlekettik hatshy Gúl­shara Ábdiqalyqovanyń, Senat Tóraǵasy Qasym-Jomart Toqaev­tyń, Májilis depýtaty Serik Seıdýmanov Májilis Tóraǵasy Nur­lan Nyǵmatýlınniń, qut­tyq­taýlaryn jetkizdi. Kesh­ke aktrısanyń týǵan jeri – Naryn­qol aýylynyń ákimi de kelip, mereıtoı ıesine syı-sııa­pa­tyn usyndy. Merekelik kesh sah­nalyq kórinispen jáne Núket­aı Mysh­baeva oınaǵan qoıy­lym­dar­dyń úzindilerin kórsetýmen jalǵasty. Mıra BAIBEK, «Egemen Qazaqstan» ALMATY