Chernobyl qurbandaryna eskertkish qoıyldy

Jezqazǵan qalasynda Chernobyl apatynyń qurbandaryna eskertkish ornatyldy. Otyz jyl buryn oryn alǵan tehnogendik apat zardabyn joıýǵa qatysyp, sonyń saldarynan mezgilinen buryn baqılyq bolǵan bozdaqtardy este qaldyrý belgisi «Qazaqmys» korporasııasy» JShS-niń demeýshiligimen qoıyldy. Sonaý 1989 jyldyń 26 sáýirinde Chernobyl atom elek­tr stansasynda bolǵan jarylys, onyń saldary myńdaǵan adamnyń ómirin jalmady. Apat zardaptaryn joıýǵa Keńes Odaǵynyń túkpir-túkpirinen 600 myńdaı adam tartyldy. Bir ǵana Qazaqstannan 30 myńnan astam adam barsa, sonyń eki júzden astamy jezqazǵandyq azamattar bolǵan. Solardyń bári aýaǵa jaıylǵan asa qaýipti radıasııadan beıhabar edi. Jarylystyń ózinen emes, onyń saldarynan, ıaǵnı, apat bolǵan jerdi tazartamyz dep, ózderi kesel tapqan beıbaq jandardyń deni osy kúnderge jete alǵan joq. Keıin belgili bolǵandaı, Chernobyl AES-yndaǵy jarylys Hırosıma men Nagasakıge tastalǵan atom bombasynan 400 ese kúshti bolǵan eken. Eskertkishtiń ashylýyna arnalǵan jıynǵa Jez­qazǵan qalasynyń ákimi Ba­tyrlan Ahmetov, Jezqazǵan qala­lyq máslıhatynyń hatshysy Sovetbek Medebaev, «Cher­no­byl jańǵyryǵy» qoǵamdyq bir­lestiginiń tóraǵasy Muhıt Úńgitbaev sóz alyp, lebizderin bildirdi. Jınalǵan kópshilik apat qurbandaryna taǵzym etip, eskertkishke gúl shoq­taryn qoıdy. Jezqazǵanda búginde Cher­nobyl apatynyń zardaptaryn joıýǵa qatysqan 93 azamat turyp jatyr. Eskertkishtiń orny solardyń usynysymen osydan jarty jyldaı buryn belgilengen bolatyn. Jez­qazǵandyq jazyqsyz qurban­dardyń esimderi eskertkishtiń qos qaptalyna qashalyp jazyl­ǵan. Qaırat ÁBILDINOV, «Egemen Qazaqstan» Qaraǵandy oblysy, Jezqazǵan qalasy