Elordada 5 jylda 100 myń páter salynady

Turǵyn úı qurylysyn damytý máseleleri boıynsha elordadaǵy qurylys kompanııalarynyń ókilderimen ótken basqosý barysynda aldaǵy 5 jyl ishinde Astanada 10 mıllıon sharshy metrden astam turǵyn úı salynatyndyǵy atap kórsetildi. Qurylys kompanııalary ókil­derimen bolǵan kezdesý barysynda Astana qalasynyń ákimi Áset Isekeshev elordadaǵy turǵyn úı qurylysyn damytý máselesiniń mańyzdylyǵyna toqtala kelip, «Memlekettik baǵdarlamalar aıasynda jáne jeke ınvestısııalar arqyly salynatyn barlyq jobalardy esepke alǵanda, aldaǵy 5 jylda Astanada 10 mıllıon sharshy metrden astam turǵyn úı salý kózdelinip otyr. Bul – 100 myńnan astam páter. Jylyna elordada orta eseppen 2 mıllıon sharshy metr turǵyn úı paı­dalanýǵa beriletin bolady», dep atap kórsetti. Elbasy Nursultan Nazarbaev­tyń táýekelshil bas­tama­­sy­­men ómirge kelgen egemen elimizdiń bas qalasy – Astana bar álemdi tamsandyrǵan tarıhı qubylysqa aınalyp, kúnnen-kúnge qanatyn keń jaıyp keledi. Arqa tósindegi sáni men saltanaty jarasqan elorda búginde ozyq ıdeıalardy, jańa ǵylymı sheshimder men sáýlet óneriniń ozyq úlgilerin ómirge ákeletin sátti jer­uı­yq ispettes. Memleket basshysy elordany kóshirýdiń 10 jyl­dyǵyna arnalǵan saltanatta sóılegen sózinde «As­tana­nyń qurylysy osynaý jyldary bizdiń elimizdiń áleýetin tanytyp, búkil postkeńestik keńistiktegi eń orasan megajobaǵa aınaldy», dep atap kórsetken bolatyn. Aqıqatynda qazir Astanada qurylys salasynyń barlyq qurylymyn qamtıtyn elimizdiń jańa qurylys klasteri qalyptasty. Álemniń damyǵan elderiniń ózinde qurylys ındýstrııasyn turalatyp, qýatty ekonomıkalardy resessııaǵa ushyratqan jahandyq qarjy daǵdarysy kezinde de Astana qurylysynyń toqyraýǵa tótep bergendigi sonyń aıǵaǵy bolsa kerek. Zamanaýı talaptarǵa saı damyǵan astanalyq qurylys ındýstrııasy búgin qandaı da bol­masyn mindetterdi sheshýge qabiletti. Oǵan álemniń júz­den astam memleketteri ózde­riniń ozyq jetistikteri men tehno­logııalaryn pash etetin Búkil­álemdik jetistikter kórmesi – EKSPO-2017 qalashyǵyn qazaq­standyq qurylysshylardyń óz kúshimen, óz tehnologııalarymen turǵyzǵandyǵy dálel. Elordanyń árbir qurylys nysanyn basty nazarynda ustaı­tyn Elbasy bas qalanyń ma­ńyzdy qurylys nysandarymen birge halyqtyń áleýmettik áleýetin jaqsartýǵa negiz bolatyn turǵyn úı keshenderiniń qurylysyn jandandyrýǵa barynsha basymdyq berip keledi. Bul ıgi úrdis jyldan-jylǵa laıyqty jalǵasyn tabýda. Atap aıtar bolsaq, Táýelsizdigimizdiń shırek ǵasyrlyq shejireli merekesi atap ótiletin bıylǵy jyldyń 10 aıynyń qorytyndysy boıynsha Astanada 1807 myń sharshy metr turǵyn úı qurylysy nemese 16 671 páter paıdalanýǵa be­rildi. Bul ótken jyldyń sáı­kes kezeńindegi kórsetkishten 130 paıyzǵa artyq. Aǵymdaǵy jyl­dyń 10 aıy ishinde tek bıýdjet qar­jysy esebinen jalpy aýdany 189 myń sharshy metr turǵyn úı qurylysy turǵyzyldy. Iаǵnı 2500 elordalyq otbasy qonys toıyn toılady. Táýelsizdik alǵan jyldar ishinde Astana turǵyndarynyń turǵyn úımen qamtamasyz etilýi bir adamǵa shaqqanda 15 sharshy metrden 25 sharshy metrge deıin ósti. Astana qalasyn abattandyrý aıasynda qalamyzdaǵy ótken ǵasyrdyń ortasynda salynyp, tozyǵy jetken apatty úılerdi jańǵyrtýdyń da ma­ńyzy zor. Osyǵan baılanysty elimizde alǵash ret elordada 2017 jylǵa deıin 228 kóp páterli apatty turǵyn úılerdi buzyp, tur­ǵyndardy jaıly da jańa páter­lermen qamtamasyz etý jóninde qanatqaqty baǵdarlama is júzine asyrylýda. Qalamyzdaǵy apatty turǵyn úılerdiń jalpy kólemi 150 myń sharshy metrden asady. Iаǵnı, osy baǵdarlama aıasynda bas qalamyzda 3519 otbasy apatty úılerden jańa páterlerge kóshedi. Memleket basshysy bekitken qalanyń Bas josparyna sáıkes sońǵy ýaqytta elordany damytý basymdyq berilgen bes ba­ǵyt boıynsha júzege asyrylyp keledi. Birinshi – bul «Qazaq eli» alańy aýdanyndaǵy Táýelsizdik saraıynyń syrtyndaǵy «Myń­jyldyq» alleıasy. Munda ıge­riletin aýmaqtyń kólemi 335 gek­tardy quraıdy. 2020 jyl­ǵa deıin munda 25 turǵyn úı kesheni salynbaq. Ekinshi – «Máń­gilik El» saltanatty arkasy aýma­ǵyndaǵy Orynbor kóshesiniń boıy. Bolashaqta bul jerde elor­damyzdyń eń sáýletti shaǵyn aýdany boı kóteretin bolady. Bul jerde qurylys alańyna bólingen 182 gektar aýmaqta 42 qurylys uıy­my jumys isteıdi. Olar 28 turǵyn úı keshenin paıdalanýǵa berýge tıis. Eń mańyzdy baǵyt – «Jasyl kvartal» aýmaǵy bolmaq. Elbasynyń bastamasy boıynsha bul qurylys aýmaǵynda «Jasyl ekonomıkanyń» barlyq tetikteri paıdalanylatyn bolady. Atal­mysh kvartal «Han Shatyr» saý­da ortalyǵy aýmaǵyndaǵy 146 myń sharshy metr aýmaqta boı kóteredi. Onyń 100 myń sharshy metri turǵyn úı keshenderi bolsa, 45 myń sharshy metri saýda-ofıstik ortalyqtar bolady. Ekonomıkany qıyndyqtarǵa tiregen álemdik daǵdarys sal­qynyna qaramastan elimizdegi qury­lys ındýstrııasy qarqy­nyn báseńdetken joq. Bul As­tana qalasyndaǵy qurylys nysandaryndaǵy tolassyz qı­myl­dan anyq tanylady. Qazirgi ýaqytta elordada 273 kóp páterli, kóp qabatty jáne az qabatty kommersııalyq turǵyn úılerdiń qurylysy júrip jatyr. Olardyń jalpy aýdany – 7 mıllıon 246 myń sharshy metr. Bul aldaǵy ýaqytta elordalyq 75 myń otbasy páter kiltine ıe bolady degen sóz. Sonymen birge, 281 myń sharshy metr aýmaqta jalpy kólemi 85 myń páterden turatyn turǵyn úı keshenderi jobalaný ústinde. Qazirgi ýaqytta júzege asyrylyp jatqan baǵdarlamalardyń aıasynda bıýdjet qarjysyn tartý arqyly jalpy aýdany 1 mıllıon 400 myń sharshy metr turǵyn úı qurylysy salynýda. Salynyp jatqan osy 37 turǵyn úı keshe­niniń qurylysy aıaqtalǵanda taǵy da 23 myń astanalyq otbasy qonys toıyn toılaıtyn bolady. Elordadaǵy qurylys kompa­nııalarynyń ókilderimen ótken osy basqosý barysynda turǵyn úı qurylysyn damytý maqsatyndaǵy alda turǵan keleli mindetter aıqyndalyp, atqarylatyn naqty sharalar pysyqtaldy. Astana qalasynyń ákimi qurylys kompanııalaryn jumysty sapaly da júıeli júrgizýge shaqyrdy. «Arqa tósinde arý qala Astananyń boı kótere bastaǵan 19 jyl ishinde bas qalamyzda 17 mıllıon sharshy metr turǵyn úı paıdalanýǵa berilipti. Ústimizdegi jyly biz taǵy 2 mıllıon sharshy metrden astam turǵyn úıdi tapsyrýdy josparlap otyrmyz. Tur­ǵyn úı qurylysy kóleminiń jyl saıynǵy ósim qarqyny Memleket basshysy tarapynan berilgen tapsyrmalardyń aıasynda memlekettik qoldaý baǵdarlamalarynyń arqasynda júzege asyrylyp otyr. Biz álemniń ozyq jahandyq qalalarynyń damý tájirıbesin zerttep, elordanyń aldaǵy damý úrdisinde jáne qalanyń baǵdarlamalyq jobalarynda osy ozyq úlgilerdi keshendi paıdalanýdy kózdep otyrmyz. Qalanyń bolashaqtaǵy damýy ekologııalyq taza tehnologııalardy jáne qoǵamdyq keńistikterdi úılesimdi abattandyrýdy ózara baılanystyrý arqyly qarastyrylýda», – dep atap kórsetti Astana qalasynyń ákimi Áset Isekeshev. Jylqybaı JAǴYPARULY, «Egemen Qazaqstan»