Qazaqstannyń Syrtqy ister mınıstri Erlan Ydyrysov elimizge resmı saparmen kelgen Chexııanyń syrtqy jáne eýropalyq ister mınıstri Lıýbomır Zaoralekpen kezdesti. Kezdesý aıasynda qos taraptar Praga qalasynda qazaqtyń uly aqyny Abaı Qunanbaevqa arnap eskertkish turǵyzýǵa ýaǵdalasty, dep xabarlaıdy
QazAqparat.
«Búgingi kezdesýde ekijaqty saýda-ekonomıkalyq, mádenı-gýmanıtarlyq jáne xalyqaralyq máseleler talqylandy. Qazaqstan men Chexııa arasyndaǵy yntymaqtastyqtyń jańa baǵyttaryn belgiledik. Biz Chexııanyń mashına jasaý, aýyl sharýashylyǵy men densaýlyq saqtaý salasyndaǵy úlken áleýetin bilemiz. Dál, osy baǵyttarǵa basymdyq beriledi. Qazirgi kezde Chexııa jerinde kóptegen qazaqtandyq stýdentter bilim alyp júr. Al mádenıet salasyna keler bolsaq, jaqyn arada Praga qalasynda bizdiń uly aqynymyz Abaıǵa eskertkish ornatylady dep senemiz», – dedi kezdesýden keıingi brıfıngte E.Ydyrysov. Sonymen qatar, mınstr: «Biz Chexııanyń astanasy – Praga qalasynda Abaı eskertkishin ornatýǵa kelistik», – dedi.
Aldaǵy ýaqytta eskertkishtiń jeri anyqtalady. Ony qalanyń qaq ortasynda ashý josparlanǵan. Chexııa syrtqy ister mınıstri Lıýbomır Zaoralek óz kezeginde qazaq tilinde amandasyp, Astanadaǵy qonaqjaılylyq úshin óz alǵysyn da qazaq tilinde jetkizdi. Sapar barysynda onyń Prezıdent N.Nazarbaevpen kezdesetini josparlanǵan. Budan bólek, Qazaqstan-Chexııa bıznes forýmyna qatysady.
Aıta keteıik, L.Zaoralekpen birge kelgen delegasııanyń quramynda 30-dan astam bıznesmen, osy eldiń aımaqtyq damý mınıstri, sondaı-aq Astanadaǵy EKSPO-2017 kórmesindegi Chexııa pavılonynyń ulttyq komıssary bar. E.Ydyrysovpen ótken búgingi kezdesý aıasynda QR Prezıdenti janyndaǵy basqarý akademııasy men Chexııanyń syrtqy ister mınıstrliginiń dıplomatııalyq akademııasy arasynda ózara yntymaqtastyq týraly memorandýmǵa qol qoıyldy.
