Qostanaıda «Meniń elim—Máńgilik el!» respýblıkalyq aksııasy aıasynda oblystyq patrıottar forýmy ótti. Oǵan jastarmen qatar aǵa urpaq ókilderi qatysty. Oblys ákimi Arhımed Muhamedov forýmǵa qatysýshylardy alda kele jatqan Qazaqstan Táýelsizdiginiń 25 jyldyq merekesimen quttyqtady.
«Táýelsizdik jyldary jastardyń qandaı jetistikke jetkeni kitapqa toltyrylady. Bizdiń «Qostanaı oblysy jastarynyń Altyn kitabyna» osy kúnge deıin ómirdiń ár salasynda jetistikke jetken oblystaǵy 72 jastyń aty altyn árippen jazylǵan. Jastar Táýelsizdik jyldary "Bolashaq", "Jumyspen qamtýdyń jol kartasy-2020", "Dıplommen –aýylǵa!" sııaqty kóptegen baǵdarlamalar arqyly memleket qamqorlyǵyn sezindi. Jastar—elimizdiń bolashaǵy, olar jetken tabystar arqasynda Qazaqstan moıyny ozyq 30 eldiń qatarynan oryn alatyn bolady», - dedi Arhımed Begejanuly.
Sonymen qatar óńir basshysy patrıottar forýmynyń el Táýelsizdigin toılaıtyn kúnge deıin 25 juldyzdy kúnniń bastalǵanyn, onyń osy mańyzdy sharamen tuspa-tus kelgenin de atap ótti. Qazaqstan Táýelsizdiginiń 25 jyldyǵy taqyrybyna arnalǵan vıdeorolıkter oblystyq baıqaýynyń jeńimpazdary oblys ákimi qolynan júldeler aldy.
Ardager Kenjebek Úkın, Qazaqstan halqy assambleıasy jastar qanatynyń kóshbasshysy Maksım Spotkaı forýmǵa qatysýshylardy quttyqtady. Munan keıin sahnaǵa búginde joǵary oqý ornyn bitirip, eńbekke aralasyp, elge qyzmet etip júrgen Táýelsizdik qurdastary shyqty. Solardyń biri «Qostanaı oblysy jastarynyń Altyn kitabynyń» laýreaty Oljas Dúısekov forýmǵa qatysýshy jastardyń Elbasyǵa úndeýin oqydy. Mereıtoılyq kitap Pavlodar oblystyq «Qoǵamdyq kelisim» memlekettik mekemesi basshysynyń orynbasary Jaqııa Qaıratqa saltanatty túrde tabys etildi.
Názıra Járimbetova,
"Egemen Qazaqstan".
Qostanaı
