Altaıda jeltoqsanǵa jetpeı túsetin qys qarashanyń bel ortasynda-aq kárine mindi. Shyǵys óńirinde birneshe kún qatarynan aıazdyń beti qaıtpaı tur. Qyryq gradýsqa deıingi qatty aıazǵa baılanysty mektepterde sabaqtardyń toqtatylǵanyna bir aptaǵa jýyq ýaqyt boldy. Saqyldaǵan sary aıaz býyp turǵanda О́skemende eki birdeı jylý ortalyǵynda apatty jaǵdaı oryn aldy. О́skemen jylý elektr stansasynyń 9 qazandyǵynyń biri isten shyqsa, Sogradaǵy jylý ortalyǵynyń úsh qazandyǵynyń ekeýi istemeı, qalanyń birqatar bóligi jylýsyz qaldy. Qazaqstandaǵy AES kompanııalar tobynyń qoǵammen baılanys qyzmetiniń málimetinshe, О́skemen JEO-nyń №11 qazandyǵy 17 qarashada saǵat 16.00-de aqaý tabylýyna baılanysty qyzmetin toqtatqan. Stansa mamandary aqaýdy 18 qarasha kúni qazandyq sýyǵan soń qalpyna keltirdi. Jóndeý jumystarynan keıin qazandyqqa ot jaǵylyp, iske qosyldy. О́skemendikterdiń úıleriniń salqyndap ketýiniń negizgi sebebi – osy. Al Sogra jylý ortalyǵyndaǵy jaǵdaı qıyn. Úsh qazandyqtyń bireýi ǵana jumys istep tur. №2 qazandyq 23 qarashaǵa deıin jóndeýden ótýi tıis bolǵandyqtan iske qosylmaǵan. Al 18 qarashanyń túninde 1 qazandyq agregaty apatty jaǵdaıda toqtady. Osyǵan baılanysty jóndeýde turǵan №2 qazandyqty iske qosýǵa týra kelgen.
Oblys basshylyǵy atalǵan stansalardyń menshik ıesi bolyp tabylatyn amerıkandyq kompanııanyń óz mindettterin tolyǵymen oryndamaǵanya jáne jóndeý jumystaryn júıeli júrgizbegenine baılanysty aıyptap otyr.
– Kompanııa tarapynan mıllıardtaǵan ınvestısııa quıylady delingen ýáde bolǵanymen, is júzinde júzege asyrylǵan joq. Jóndeý jumystary tolyq oryndalmady, degen óńir basshysy Danıal Ahmetov qala basshylyǵy men jylý mamandaryna táýliktik kezekshilik uıymdastyrýǵa tapsyrma berdi. Aldaǵy ýaqytta oblys basshylyǵy atalǵan máseleni kompanııanyń óńirlik jetekshilerimen birge AQSh ókilderimen de talqylamaq.
Sondaı-aq aıazdyń kesirinen qaladaǵy qoǵamdyq kólikterdi kútken jolaýshylardyń aıaldamada uzaq turyp qalýy jıiledi. Qalalyq turǵyn úı-kommýnaldyq sharýashylyǵy bóliminiń málimetinshe, avtoparkterdegi 309 avtobýstyń 126-sy dızeli qatyp qalǵandyqtan jolǵa shyǵa almaı qalǵan. Tipti, turǵyndardyń jeke kólikteriniń de kópshiligi otalmaı qalǵandyqtan taksı qyzmetine suranys artqan. Bul baǵanyń 100 paıyzǵa deıin qymbattaýyna sebep bolyp otyr.
Aıazdy kúni Kúrshim aýdanynda 5 adam júzdegen malmen (100-den astam qoı men 10 shaqty jylqy) birge dalada arnasynan asyp jaıylǵan ózenniń qorshaýynda qalǵan. Qaljyr ózeninde qabyrshaq muz qatyp qalǵandyqtan sý arnasynan asyp, jaǵalaýǵa tegis jaıylǵan. Qystaýdan shyqqan malshylar óz aýyly – Jańaaýylǵa deıin jete almaı, qutqarýshylardyń kómegine júginýge májbúr boldy. Aýdannyń tótenshe jaǵdaılar qyzmeti men jergilikti ákimdik qyzmetkerlerinen quralǵan mamandar toby shynjyr tabandy tehnıkamen túni boıy qutqarý jumystaryn júrgizdi.
– Túnde túk kórinbeıtin qarańǵylyq boldy. Bizdi malshylarmen bólip turǵan qaýipti beldeý shamamen 500 metrdeı edi. Shynjyr tabandy tehnıkamen ótý óte qaýipti bolatyn. О́ıtkeni aldynda beti qatyp qalǵanymen túbi qýys, tereńdigi 3-4 metrge deıin jetetin jyra boldy. Táýekelge bel býyp, jaıaý júrdik. Malshylar bizdiń baǵyttan jańylmaýymyz úshin ot jaqty, deıdi aýdandyq tótenshe jaǵdaılar bóliminiń bastyǵy Azamat Abdrahmanov. Aýdan ákimdigi qyzmetkerleri Qaljyr ózenindegi sý tospasyn tekserdi. Atalǵan bógetten eldi-mekenge qaýip joq.
Dýman ANASh,
"Egemen Qazaqstan"
Shyǵys Qazaqstan oblysy.
