Bul rette oqýshylar oqý baǵdarlamasynan qalyp qoımaıdy, ótpeı qalǵan taqyryptar rezerv saǵattardyń esebinen nemese qaıtalaý sabaqtarynda meńgeriledi. Tıisinshe, kanıkýl ýaqyty da qysqartylmaıdy. Bul týraly búgin Astana qalasy Bilim basqarmasynyń jalpy orta bilim berý bóliminiń basshysy Botagóz Júnisova málim etti. Sabaqtardy toqtatý QR Bilim mınıstriniń «Qolaısyz aýa raıy meteojaǵdaılarynda orta bilim berý uıymdarynda, sondaı-aq tehnıkalyq jáne kásiptik bilimniń bilim berý baǵdarlamalaryn iske asyratyn bilim berý uıymdarynda sabaqtardy toqtatý qaǵıdalaryn bekitý týraly» buıryǵymen reglamentteledi. Oǵan sáıkes, árbir mekemede ishki buıryqtar shyǵarylady, jáne onda sabaqtar toqtatylǵan kúnder, ol kúnderi sabaq ótkizbegen muǵalimder kórsetiledi. Osy rette árbir muǵalim balalar ótpeı qalǵan taqyryptardy ıntegrasııalaý esebinen kúntizbelik-taqyryptyq josparlaýǵa ózgertýler engizedi. «Sabaqtardyń toqtatylýyna baılanysty ótpeı qalǵan taqyryptardy muǵalim rezerv saǵattar nemese qaıtalaý men jalpylaý sabaqtary esebinen osy toqsannyń ishinde balalarǵa túsindirýge tıis. Balalar kanıkýl nemese qosymsha saǵattar esebinen oqymaıdy. Budan basqa, eger balalar sabaq toqtatylǵan kúni mektepke kelse, olar kúnderin sonda ótkizýge tıis, balalardy eshkim úılerine qaıtarmaıdy. Bir nemese eki oqýshy kelse, muǵalim oǵan sabaq ótkizýge mindetti, jáne eger sol sabaqta baǵa qoıylsa, ol baǵa túzetý engizilgen kúni qoıylady», - deıdi Botagóz Júnisova. Pán muǵalimi de balalardyń óz betimen jasaıtyn jumystarynyń túrin ózi tańdaı alady, bul tapsyrmalar synyp jetekshilerine beriledi, sońǵylary oqýshylar men ata-analarǵa habarlaıdy. Oqýshylar tapsyrmalardy úıde oryndap, sabaqtar bastalǵan ýaqytta tekserýge ákelýge tıis.
