Almatyǵa aspanmen baratyndar azaıǵan

«Áýlıeata» halyqaralyq áýejaıynyń kesheni ótken jyly ǵana kúrdeli jóndeýden ótip, jolaý­shylarǵa jańa keıipte qyzmet etip jatyr. Tir­keý, tekserý, basqa da qyzmet oryndary zama­naýı úlgide jabdyqtalǵan. Polısııa, keden, qaýip­sizdik qyzmetteriniń alańsyz jumys isteýine de barlyq jaǵdaı jasalypty. Ushý, ushyp kelý, «VIP», jalpy zaldarda jolaýshylarǵa minsiz qyzmet kórsetiledi. Meıramhana, dúken, gazet-jýrnal satatyn oryn, oıyn alańy, ana men bala bólmesi, medpýnkt, dárihana, júk saqtaıtyn, aqsha aıyrbastaıtyn oryndar, tipti bankomatqa deıin bar. Mundaǵy ataýlar da, baǵyt bildiretin jazýlar da qazaq, orys jáne aǵylshyn tilderinde jazylǵan. Áýejaı halyqaralyq talaptarǵa saı. Jolaýshylar termınalynyń jalpy kólemi 6800 sharshy metrdi qurasa, saǵatyna 600 jolaýshy qabyldap, bir saǵatta – 3, bir jylda 6500 reısti júzege asyrady. «Áýlıeata» AQ basqarma tóraǵasynyń orynbasary Anatolıı Nesterenkonyń aıtýyna qaraǵanda, «Batys Eýropa-Batys Qytaı» halyq­aralyq kólik dálizi paıdalanýǵa berilgeli beri Tarazdan Almatyǵa ushatyn jolaýshylardyń sany kúrt azaıyp ketipti. Aqyrynda bul reısti jabýǵa májbúr bolǵan. О́ıtkeni, Taraz ben Almatynyń arasy 500 shaqyrymnan sál-aq astam. Júıitkigen kólikter kóne qaladan ońtústik astanaǵa 4-5 saǵatta jetip barady. Ári taksı baǵasy da ushaqtyń bıletiniń qunyna qaraǵanda múldem arzan. Degenmen, áýejaı basshylyǵy Áýlıeata­dan Almatyǵa jańa reıs ashýdyń basqa joldaryn qarastyryp jatyr eken. Búginde áýejaıdan SCAT kompanııasynyń ushaqtary ishki baǵyt boıynsha Astanaǵa aptasyna tórt ret ushsa, «Air Astana» kompanııasynyń ushaqtary úsh ret, al halyqaralyq baǵytta SCAT kompanııasynyń ushaqtary Máskeýge, Hýdjandqa aptasyna eki ret, Sýrgýtke bir ret ushady. Aldaǵy ýaqytta ishki baǵytta Aqtaý, Atyraý qalalaryna jáne halyqaralyq – Sankt-Peterbýrg, Nıjnevartovsk, Túmen, Ystanbul, Úrimshi jáne Dýbaı baǵytynda jolaýshylar ushaǵyn ushyrý josparlanyp otyr. Oralhan DÁÝIT, «Egemen Qazaqstan» TARAZ