Qolaıly nesıe kózi

«Sybaǵa» aýyl sharýashylyǵy taýarlaryn óndirýshiler úshin eń qoljetimdi nesıelendirý baǵdar­lamasynyń biri. Sondaı-aq, bul osy baǵytta óz bıznesin ashýǵa nıettengen, biraq, mal sharýashylyǵy salasynyń jumysynda tájirıbesi joqtar úshin tıimdi. Buǵan qosymsha, nesıelendirý jaǵdaıyn jasaý kezinde jekemenshik bıznestiń múddesi men múmkindigi esepke alyndy. Syıaqynyń paıyzdyq deńgeıi de tómen. Iаǵnı, 14 paıyzdyń jartysyn memleket sýbsıdııalaıdy. Onyń ústine, qaryz toltyrý jumysy men jeńildik merzimin kepildikpen qamtamasyz etý talaby da qysqartylǵan. Taýarlyq tabynnyń tuqymdyq sapasyn jaqsartýdy kózdeıtin baǵdarlamaǵa Ar­shaly aýdanynda aıryqsha qy­zyǵýshylyq baıqalady. Máse­len, bıylǵy jyly aýdanda 5 sharýashylyq baǵdarlamaǵa qatyssa, eki sharýashylyq 53 mıllıon 250 myń teńge nesıeni rásimdedi. Aýyl sharýashylyǵy taýarlaryn óndirýshiler et baǵytyndaǵy 162 iri qara satyp aldy. Atap aı­tatyn bolsaq, «V.Sýraev» sharýa qojalyǵy 63 iri qara, «Ar­nur» jeke kásiporny 30 bas, «Mıhaılovskıı» seriktestigi 30 bas, «Narnur» jeke kásiporny 17 bas jáne bir buqa, «Ǵazes» sharýa qojalyǵy 20 bas iri qara jáne bir buqa satyp aldy. Jýyrda «Dana» sharýa qojalyǵy men «Qojahanov» jeke kásiporny asyl tuqymdy 259 iri qara mal satyp alý qujattaryn daıyndady. «V.Sýraev» sharýa qoja­lyǵynyń basshysy Vıktor Sý­raev­pen tildeskenimizde ol: «Ma­ǵan aýdandyq aýyl sharýa­shylyǵy bóliminiń qyzmet­kerleri, ásirese, bas maman Meń­gúl Ybyraeva tıisti qujat­tardy daıyndaýyma kómek­testi. Baǵdarlamanyń árbir tar­maǵyn jete túsindirdi. Aýyl tur­ǵyn­darynyń kóbi nesıe alýǵa jú­reksinedi. Qıynshylyqtan qash­paıtyn adamdarǵa memleket sýbsıdııalaý arqyly qoldaý kórsetip, jan-jaqty kómektesetini qan­daı ǵanıbet. Memlekettiń qoldaýyn­syz mal basyn kóbeıte almas edik. Bul úlken eńbek. «Sybaǵa» aýyl adamdaryn úlken isterge jigerlendiredi».