Qazaqstan eksporttaýshy 50 eldiń qatarynda

Ortalyq kommýnıkasııalar qyzmetinde otandyq brendterdi jasap, qoldaýǵa arnalǵan baspasóz máslıhaty ótti. Oǵan Investısııalar jáne damý mınıstrliginiń Indýstrııalyq damý jáne ónerkásiptik qaýipsizdik komıteti tóraǵasynyń orynbasary Tımýr Nurashev, «Saraptamalyq ortalyq» JShS bas dırektory Qaırat Sádýaqasov pen «Kaznext invest» AQ-tyń eksportty jyljytý departamentiniń dırektory Aısáýle Sultanmuratova qatysty. Brıfıngte atalǵan komıtet tóra­ǵa­synyń orynbasary otandyq brendtti jasap, ony shetelge nasıhattaýda at­qarylyp jatqan jumystar týraly aıtyp berdi. Onyń aıtýynsha, qazirgi kezde elimiz 118 memleketke taýardyń 970 túrin satýmen aınalysyp jatyr. Jylyna shamamen 200 myńnan asa otandyq ónim shetelge satylady. – Búginde elimizde shetelge otandyq ónimderdi shyǵarýmen 1 800 eksporttaýshy jumys isteıdi. Olar turaqty túrde 1 mln AQSh dollarynan astam paıda túsirip otyr, – dedi Tımýr Nurashev. Sonymen birge, ol aýyl sharýashylyǵy kesheninde elimizdiń betke ustar markalaryn jasaý úshin «Qazaq Organic Food», «Halal», «Et brendi» brendteriniń ázir­len­genin aıtty. «Bul brendter bel­gili bir naryqqa baǵyttalǵan. Budan bas­qa biz elimizdiń atyn álemge tanytý úshin 10 kompanııany arnaıy tańdap aldyq. Qazirgi kezde olardyń ónimderine jaqyn jáne alys shetelder qyzyǵýshylyq tanytyp jatyr. Mysaly, elimizdiń et ónimderi Qytaı, Reseı, Taıaý Shyǵys pen Avstralııa sııaqty elderdiń suranysyna ıe. Al arab memleketterin halal ónimderi qyzyqtyrady. Árıne, arab elderine biz arnaıy tekserýden ótken ónimderdi jetkizemiz», dedi Tımýr Nurashev. Baspasóz máslıhatynda «Sarap­ta­ma­lyq ortalyq» JShS bas dırektory Qaırat Sádýaqasov otandyq brendterdi jasaýdyń mańyzdylyǵy týraly aıtyp berdi. Ol elimizde jeńil jáne aýyr ónerkásipti damytý úshin brendter jasaý kerektigin, osynyń ózi álemge qazaqstandyq ónimdi nasıhattaýda jáne damytýda mańyzdy ról atqaratynyn aıtty. – Qazirgi tańda Qazaqstan eksporttaý­shy iri 50 eldiń qataryna kiredi. Elimiz táýelsizdik alǵan kezden beri shetelge ýran, un, bıdaı, munaı jáne basqa da ónimderdi shyǵarýmen aınalysýda. Al shıki munaı men et ónimderi jaqsy satylyp jatyr. Mysaly, bir Qytaıdyń ózi jyl saıyn elimizden 800 000 tonna sıyr etin alsa, elimiz shıki munaı satýmen aınalysatyn 10 memlekettiń qataryna kiredi, – dedi ol. Qoryta aıtqanda, brıfıngke qaty­sý­shylar otandyq brendti jasaýda jáne ony qoldaýda memleket tarapynan qolda bar múmkindiktiń jasalatynyn atap ótti. Dastan KENJALIN, «Egemen Qazaqstan»