Asanáli Áshimov. Qazaq úshin júrek maıyn sham qyldy

Táýelsizdik alǵaly beri qol jetkiz­gen tabystarymyz ben jetistik­terimizdi keń kólemde saralap, syndarly kózqaraspen 25 jylǵa sholý jasaǵan «Uly Dala ula­ǵattaryn» oqı otyryp, Prezıden­timizdiń memleketshil sanamen oılap, qazaqy tilmen sóz saptaı­tynyna taǵy bir súısindim. Qa­zaqstannyń jańa tarıhynda, memleket irgetasyn qalyptastyrýda erekshe eńbek sińirgen tulǵa asqaraly beles bıiginen ótkenge kóz sala turyp, tereń paıymdar jasaıdy. Sóziniń jalǵany joq. El týraly oılansa da, jer jó­nin­de tolǵansa da, qazaq jastaryn qaýip-qaterden saqtandyryp, tili men dinin qurmetteýge shaqyrsa da, paıymy men oıy Prezı­den­t­tik mindetinen ǵana emes, osy ult­tyń azamaty retindegi perzent­tik janashyrlyǵynan, aǵalyq qam­qor­lyǵynan týǵanyn baıqatady. Saıası jáne ekonomıkalyq tyǵyryqqa tirelýge jol bermeı, barlyq qıyn kezeńderden aqylmen jol taýyp, Qazaqstandy alǵa súırep kele jatqan qyzmeti kóz aldymyzda. Prezıdent bul kitabynda ádettegi demokratııalyq, saıası, ekonomıkalyq tolǵamdarymen emes, halyqtyq qundylyqtardy, ǵasyrlar boıy tirnektep jınaǵan asyl qazynasyn – til, din, óner, dástúr, izgilik, adamgershilik dep atalatyn jan baılyǵyn qurmetteýge, qorǵaýǵa, saqtaýǵa úndepti. Basqany bilmeımin, mundaı áńgime, ásirese bizdiń, óner adamdarynyń qulaǵyna maıdaı jaǵady. Kitaptyń sońǵy «Jańǵyryp keler jas tolqyn», «Qarııalarymyz – qazynalarymyz» degen besinshi jáne altynshy taraýlaryndaǵy jańashyl jastarymyz ben qadirli qarııa, abzal aqsaqaldarymyzǵa qaratyla aıtylǵan oıdy halyqtyq tárbıemen ósip, tulǵalyq turpaty obal-saýap, ar-ojdan sekildi tórt taǵanmen bıiktegen adam ǵana aıta alady. О́zimiz de aqsaqal jasyna jettik, qazaqtyń otbasylyq ınstıtýtyn quraıtyn dástúrli uǵymdardy – qarııa kim, aqsaqal kim, abyz kim, Prezıdent arajigin ádemi ashyp, tarqatady. Balalyǵy – jastyqqa, jastyǵy – qarttyqqa ulasatyn qýys keýdeli adam balasy bile júrýi tıis kerek oı, kádemizge jarasa, qane? Prezıdentimizdiń osy eńbegin oqı otyryp, Sultanmahmut Toraıǵyrovtyń «Qazaq úshin júrek maıyn sham qyldy» degen sózi eske túsedi. Rasynda da, Elbasymyzdyń qaıratkerlik kelbeti el ómiriniń tirshilik-tynysyn tereń bilýimen, memleket ishindegi jáne álemdik ahýaldarmen sanasa otyryp, batyl qadamdarǵa barýymen, oıǵa alyp, dittegen ıdeıasyn tabandylyqpen júzege asyrýymen daralanady. Elimiz synǵa túsken egemendiktiń árbir kúni aıǵa, árbir aptasy jylǵa, árbir jyly ǵasyrǵa bergisiz bolyp keledi. Sodan beri úmit artyp, taǵdyrymyzdy tapsyrǵan Kóshbasshymyz qııannan jol taýyp, adastyrmaı alǵa súırep, azamattyǵyn tanytýmen keledi. 25 jyl degenińiz onsha kóp ýaqyt emes, biraq mańyzy úlken. Elimiz eshkimge táýeldi bolmaı, úlken jeke memleket bolǵanymyz – baqytymyz. Osy Táýelsizdikti ustap tura alsaq, sol bizdiń mindetimiz. Budan ary da bizdiń qajyr-qaıratymyz, erik-jigerimiz tolyǵymen osy uly maqsatqa jumsalýy kerek.