Ilıa Jaqanov. Sarabdal saıasatker syry

Elbasy Nursultan Nazarbaevtyń «Uly Dala ulaǵattary» taqyry­byn­daǵy týyndysymen tanysqan sátte qazaq eliniń, qazaq halqynyń baǵy bar, degen oıǵa berik bekindim. О́ıtkeni, halqymyzdyń «El úmitin er aqtar, er ataǵyn el saqtar» deıtin támsilin Tuńǵysh Prezıdentimiz Nursultan Nazarbaevtyń táýelsiz Qazaqstandy álemdegi eń qýatty memleketter qataryna engizýdegi eńbegine baılanysty aıtýǵa bolady. Sarabdal saıasatker retinde el basqarýdaǵy san alýan isteri men tájirıbesimen bólisip, halyqpen shynaıy syrlasýǵa qurylǵan bul týyndynyń barshany tolǵandyrar tusy jeterlik. Táýelsiz Qazaqstannyń memleket retinde qalyptasý kezeńiniń bastaýyndaǵy dara tulǵaǵa sengen el azamaty retinde Elbasy saılaýynda Nursultan Nazarbaevqa úlken úmitpen alǵash daýsyn bergen sátim áli esimde. Jıyrma bes jyldan bergi kezeńde táýelsiz elimizdiń ekonomıkasynda jylma-jyl ósim baıqalyp keledi. Toz-tozy shyǵa jazdaǵan aýyl sharýashylyǵynyń tamyryna búlkildep qan júgirdi. Taqtaıdaı tegis joldar salyndy. Jańa elordamyz – Astana boı túzedi. Qazaqtyń ana tili memlekettik til mártebesin ıelendi. Shań basqan arhıvterdegi tól tarıhymyz tórimizge ozdy. Igerilýi ózimizge qıyn soǵatyn iri munaı kenishteri shetel ınvestısııasynyń salynýymen el ıgiliginiń qajetine jaraı bas­tady. Básekege qabiletti otandyq ónimder óndirilip, buryn-sońdy óńimiz túgili túsimizge kirmegen eren ister atqarylyp jatyr. Árıne, kezinde Qazaqstan táýel­sizdigine kúmánmen qarap, keleshegine oń tileýlestik tanytqysy kelmegen el­derdi de bilemiz. О́ıtkeni, olar ózderinde Nursultan Nazarbaevtaı eldiń bolashaǵyn áriden oılaıtyn, soǵan oraı tyń reformalardy taban­dylyqpen qolǵa alatyn batyl basshysy bolmaǵannan keıin Qazaqstannyń aldaǵy kúnderine qyzǵanyshpen qaraǵan shyǵar. Táýelsizdik jyldarynda «Aldymen ekonomıka...» qaǵıdasyn ustanǵan Prezıdentimiz ulttyq ekonomıkanyń san salasyn órkendetýmen birge mádenıetke, áleýmettik salaǵa barynsha qoldaý bildirdi. О́zim kóp jyl eńbek sińirgen óner, mádenıetke qatysty aıtar bolsam, «Mádenı mura» memlekettik baǵdarlamasynyń iske asyrylýy ulttyq mádenıetimiz ben ónerimizdi bıikke kótergen oń qadam bolǵany daýsyz. Osy baǵdarlama aıasynda qanshama jaýhar dúnıelerimizdi jas urpaqtyń sanasyna sińire aldyq! Bul kúnderi Qazaqstandy álem elderi ekonomıkasy qýatty memleket retinde ǵana emes, mádenıeti men óneriniń kókjıegi keńigen el retinde tanıdy. Jáne bir aıtpaýǵa bolmaıtyn jaıt, bizdiń elimizde 130-dan astam ulttyń ókili turady. Osynshama ult ókilderi Qazaqstan degen qarashańyraqtyń astynda tatýlyqtyń, yntymaq pen birliktiń úlgisin kórsetip keledi. Tuńǵysh Prezıdentimiz álemniń ár qıyryna ártúrli sebeptermen tarydaı shashylǵan baýyrlarymyzdy atameken topyraǵyna shaqyrdy. О́zge elde sultan bolǵannan góri óz elinde ultan bolýdy kózdep, atajurtty saǵyna oralǵan qandastarymyzǵa memleket tarapynan qoldaý kórsetti. Álemdegi birde-bir el dál Qazaqstandaı, dál Nursultan Nazarbaevtaı tarıhı Otanyn ańsap jetken qandastaryna qoldaýdy da, kómekti de bere alǵan joq. Teginde, táýelsizdikti babalarymyz san ǵasyrlar boıy armandap ótti. Qazaq jeriniń ár pushpaǵy úshin jan aıamaı kúresip, ulan-ǵaıyr dalany búgingi urpaqqa amanatqa qaldyryp ketti. Endi o sheti men bu shetine ushqan qustyń qanaty talatyn, munaı men gaz, altyn men kómir, jez ben mys sekildi ózge de tabıǵı mol baılyqtyń qazynaly kómbesi sanalatyn jerimizdi, álem tanyǵan Qazaqstandaı táýelsiz elimizdi qýatty memleket retinde jahandyq básekege qabiletti etý ár qazaqtyń, ár qazaqstandyqtyń azamattyq paryzy bolýy tıis. Azamattyq paryz degennen shyǵady, muny tek áskerı boryshty óteýmen, ne memleketke adal qyzmet etýmen ǵana shektemeý kerek. Azamattyq paryzdyń aýqymy óte keń. Azamattyq paryzdy Elbasy Nursultan Nazarbaevtyń elge, ultqa adal qyzmet etý úlgisinen de kóremiz. О́ıtkeni, ol – elin shyn súıgen, eli úshin aıanbaı eńbek etýdi uly maqsatyna aınaldyra bilgen naǵyz kóshbasshy, naǵyz saıasatker. Árıne, ár adamnyń pikiri, kózqarasy ár qıly bolatyny sekildi, keıbireýler memlekettiń birinshi tulǵasy –Prezıdent laýazymynda bolýdan artyq eshteńe joq dep oılaıdy. Bárimiz de dál osylaı pendeshilik oıǵa berilsek, qatty qatelesken bolar edik. Shyn máninde memleketti basqarýdan, eldi jan-jaqty órkendetý isine jaýapty bolý eń qıyn jumys dep oılaımyn. Memleket basshysy únemi at ústinde júrgendeı bolady. О́ıtkeni, Elbasynyń el aldyndaǵy arqalaǵan jaýapkershiligi da zor, atqaratyn jumysynyń kólemi de aýqymdy. Ulttyq ekonomıkany, halyqtyń áleýmettik ahýalyn jańa deńgeıge kóterý úshin tynbaı eńbektenedi. Sol sebepten, ózgelerimiz sekildi mezgilinde tynyǵýyna da, mezgilinde eńbek demalysyn alýyna da murshasy bola bermeıdi. Tipti, onyń az uıyqtap, kóp jumys jasaýyna týra keledi. Osy turǵydan aıtqanda, qazir Nursultan Ábishulynyń álemniń barsha elimen saýda-ekonomıkalyq, iskerlik, dıplo­matııalyq baılanystar ornatý úshin aptalap shet memleketterge barǵan saparlarynyń jemisin kórip otyrmyz. Jalpy, memleket basqaratyn tulǵanyń bilimi – tereń, tili – sheshen, kóshbasshylyq pen tulǵalyq, kisilik pen kishilik, kósemdik pen parasattylyq, qaıyrymdylyq pen meıirimdilik qasıetteri mol bolsa ǵana eliniń abyroıy da, mártebesi de bıikteı túsedi. Nursultan Nazarbaevtyń boıynan osynaý adamı qasıetterdiń bári tabylady. Bir basynda san óner de toptasqan. Qazaq eliniń baqýatty turmysy men kemel keleshegi, halqynyń namysy men abyroıy úshin ulaǵatty is atqarýdy paryzy sanaǵan Erdiń – Tuńǵysh Prezıdentimiz Nursultan Nazarbaevtyń erlikke para-par eńbeginiń jemisin barshamyz kórip otyrmyz.